مىندەتتى ساقتاندىرۋى جوق ادامدارعا مەديتسينالىق قىزمەت كورسەتىلە مە؟

«الەۋمەتتىك مەديتسينالىق ساقتاندىرۋ قورى» كەاق شقو بويىنشا فيليالى ءباسپاسوز قىزمەتىنىڭ مالىمەتىنشە, ءوڭىر جۇرتشىلىعىن ءمامس جۇيەسىنە تارتۋ ماسەلەسى بويىنشا بۇگىن وبلىس اكىمىنىڭ ورىنباسارى شاكارىم بۇقتۇعۇتوۆتىڭ توراعالىعىمەن وڭىرلىك شتابتىڭ وتىرىسى ءوتتى.

ايماق بويىنشا 244 729 ادام ءالى كۇنگە دەيىن ساقتاندىرىلماعان. ونىڭ 78 362-ءسى جالدامالى جۇمىسشى, 14 016-سى جەكە كاسىپكەر بولسا, 88 153-ءى بىرىڭعاي جيىنتىق تولەمدى ۋاقتىلى اۋدارماعان.

«قازىرگى ۋاقىتتا ساقتاندىرىلماعان ادام سانى جاعىنان الدىڭعى ورىندا شار قالاسى تۇر. ودان كەيىن ءۇرجار, كوكپەكتى, بەسقاراعاي, زايسان جانە جارما اۋداندارى ورنالاسقان. جەڭىلدىك الاتىندار ساناتىنا ەنگىزىلگەن وبلىستىڭ 736 217 تۇرعىنى ءۇشىن جارنالاردى مەملەكەت تولەۋدە», دەدى فيليال ديرەكتورى عالىمجان ءابىلوۆ.

ونىڭ ايتۋىنشا, قيىندىق تۋدىرىپ وتىرعان تاعى ءبىر ماسەلە – مەديتسينالىق مەكەمەلەرگە تىركەلمەگەن حالىق سانىنىڭ كوپتىگى. جاز باستالعالى بەرى تەك 148 ادام تىركەۋگە تۇرعان. وسىعان بايلانىستى بيىلعى 15 قىركۇيەك-15 قاراشا ارالىعىنداعى تىركەۋ ناۋقانى كەزەڭىندە جەرگىلىكتى اتقارۋشى ورگاندارمەن اۋقىمدى جۇمىس اتقارىلماق.

«مىندەتتى مەديتسينالىق ساقتاندىرۋ - بۇل دەنساۋلىق ساقتاۋ جۇيەسىن دامىتۋدىڭ ءتيىمدى تەتىگى. سونىمەن قاتار بۇل مەديتسينالىق قىزمەتتىڭ ساپاسىن جاقسارتىپ, حالىقتىڭ قوسىمشا قىزمەتتەردى الۋ مۇمكىندىگىن ارتتىراتىندىعى ءسوزسىز», دەدى وبلىس اكىمىنىڭ ورىنباسارى شاكارىم بۇقتۇعۇتوۆ.