وڭىرلىك كوممۋنيكاتسيالار قىزمەتىندە وبلىس اكىمىنىڭ ورىنباسارى بالجان شامەنوۆانىڭ قاتىسۋىمەن بريفينگ ءوتتى. وندا وبلىستىق سانيتارلىق-ەپيدەميالىق باقىلاۋ دەپارتامەنتىنىڭ باسشىسى دينارا جاڭابەرگەنوۆا, وبلىستىق دەنساۋلىق ساقتاۋ باسقارماسىنىڭ باسشىسى ءسابيت پازىلوۆ ايماقتاعى ەپيدەميالىق احۋال تۋرالى باياندادى.
وبلىس اكىمىنىڭ ورىنباسارى مەديتسينالىق مەكەمەلەردە, ءدارىحانالاردا ءدارى-دارمەكتەر مەن قورعانىش قۇرالدارىنىڭ جەتكىلىكتى ەكەنىن اتاپ ءوتتى. وڭىردە ەكى ايعا جەتەرلىك ءدارى-دارمەك قورى جاساقتالعان. دارىلىك زاتتاردىڭ قورىن قالىپتاستىرۋ ماقساتىندا جەرگىلىكتى بيۋدجەتتەن 488 ملن تەڭگە قارجى بولىنگەن. «جامان ايتپاي, جاقسى جوق», ەگەر ىندەت كۇشەيە تۇسسە ينفەكتسيالىق جانە پروۆيزورلىق ستاتسيونارلاردا توسەكتىك ورىن قورىن 3 200-گە دەيىن ۇلعايتۋعا مۇمكىندىك بار, 518 ورىن ورتالىقتاندىرىلعان وتتەگىمەن جابدىقتالعان.
وبلىستاعى تاۋەكەل توبىنا جاتاتىن ادامدار تۇراقتى باقىلاۋعا الىنىپ, ۇيدەن ەم جاساۋعا 138 دارىگەرلىك موبيلدىك توپ جۇمىلدىرىلدى. ۆيرۋس ءورشي قالسا, ولاردىڭ سانىڭ 161-گە جەتكىزۋگە بولادى.
جالپى, دەرت دەرەگى شىققالى بەرى وبلىستا كوروناۆيرۋس ينفەكتسياسىن جۇقتىرۋدىڭ 7 977 جاعدايى تىركەلگەن. ەپيدەميالىق احۋال كۇننەن-كۇنگە كۇردەلەنىپ بارادى.
– وتكەن اپتانىڭ جۇماسىندا 110 دەرەك انىقتالدى. بۇل – جىل باسىنان بەرگى ەڭ جوعارى انتيرەكوردتىق كورسەتكىش. سوڭعى اپتادا 492 جاعداي تىركەلدى, بۇل الدىڭعى 7 كۇنمەن سالىستىرعاندا 1,5 ەسەگە كوپ. «دەلتا» شتامىنىڭ كۇن ساناپ كوبەيۋى ەپيدەميالىق احۋالدى كۇردەلەندىرىپ وتىر, – دەدى وبلىستىق سانيتارلىق-ەپيدەميالىق باقىلاۋ دەپارتامەنتىنىڭ باسشىسى دينارا جاڭابەرگەنوۆا.
ەپيدەميالىق تالداۋ ۆيرۋس جۇقتىرعانداردىڭ جاسارىپ بارا جاتقانىن كورسەتىپ وتىر. سوڭعى ايلاردا 30-40 جاس ارالىعىندا ناۋقاستار كوپ تۇسكەن. ماماندار جاڭا شتامنىڭ بالالار اراسىندا كوپ تىركەلە باستاعانىن ايتادى. سونىمەن قاتار ىندەتكە شالدىققانداردىڭ كوپشىلىگى ۆيرۋسقا قارسى ەكپە الماعاندار ەكەنى دە انىقتالعان.
وبلىستاعى ەپيدەميالىق احۋالدى تۇراقتاندىرۋ ماقساتىندا قابىلدانعان №18 قاۋلى اياسىندا شەكتەۋ شارالارى قابىلدانعان بولاتىن. سوعان سايكەس ويىن-ساۋىق, بۇقارالىق, وتباسىلىق ءىس-شارالاردان باستاپ وبلىسارالىق, قالاارالىق تۋريستىك تاسىمالدارعا, ساۋدا ورىندارىنىڭ, سۇلۋلىق سالوندارى مەن سپورت كەشەندەرىنىڭ جۇمىستارىنا شەكتەۋلەر ەنگىزىلدى.
وبلىستىق دەنساۋلىق ساقتاۋ باسقارماسىنىڭ باسشىسى س.پازىلوۆتىڭ ايتۋىنشا, شىلدەنىڭ باسىندا ستاتسيونارلاردا 585 توسەك- تىك ورىن ۇيىمداستىرىلىپ, ءبىر اپتا وتكەن سوڭ ولاردىڭ سانى 760-قا جەتكىزىلگەن.
– بۇگىندە ينفەكتسيالىق ستاتسيونارلاردا 499 ناۋقاس ەم الۋدا, جۇكتەمەسى 66 پايىز. وسىعان سايكەس بۇگىننەن باستاپ 930 توسەكتىك ورىنعا دەيىن كوبەيتەمىز, – دەدى باسقارما باسشىسى.
ايماقتاعى 160 مونيتورينگ توبى شىلدە ايىنىڭ باسىنان بەرى كارانتين, شەكتەۋ شارالارى ءتارتىبىن بۇزعان 45 دەرەكتى انىقتادى. وبلىس اكىمىنىڭ ورىنباسارى ۇجىمدىق يممۋنيتەت قالىپتاستىرۋ ءۇشىن حالىقتىڭ كەم دەگەندە 70 پايىزى ۆاكتسينالاۋدان ءوتۋى قاجەت ەكەنىن اتاپ ءوتتى.
قىزىلوردا