وسى جىلدىڭ 25 شىلدەسىندە قىزىلوردا وبلىسىنان اۋىل اكىمدەرىنىڭ سايلاۋىنا 131 ۇمىتكەر قاتىسادى. وبلىستىق سايلاۋ كوميسسياسىنىڭ دەرەگىنشە, ايماقتاعى 40 اۋىلدا سايلاۋعا تۇسەتىندەردىڭ كوپشىلىگى – ءوزىن ءوزى ۇسىنعاندار.
كانديداتتاردىڭ 82-ءسى – مەملەكەتتىك قىزمەتشى. ونىڭ ىشىندە 24-ءى – بۇرىنعى اۋىل اكىمدەرى. اۋىل باسقارۋعا تالاپ قىلىپ وتىرعانداردىڭ اراسىندا بيۋدجەتتىك سالا مەن كوممەرتسيالىق قۇرىلىم وكىلدەرى دە بار. ۇمىتكەرلەردىڭ باسىم بولىگى – مۇعالىمدەر, زاڭگەرلەر مەن ەكونوميستەر دە از ەمەس, وزگە سالا وكىلدەرى دە بار. كانديداتتاردىڭ 9-ى – ايەل. قازىر ۇمىتكەرلەردى ۇسىنۋ جانە تىركەۋ كەزەڭى ءوتىپ, ۇگىت-ناسيحات جۇمىستارى باستالدى.
وسىعان بايلانىستى ءماجىلىس دەپۋتاتى, Nur Otan پارتياسى فراكتسياسىنىڭ مۇشەسى گەننادي شيپوۆسكيح, پارتيانىڭ ورتالىق اپپاراتىنىڭ قىزمەتكەرى گۇلنار نۇراحمەتحانوۆا جانە پارتيا اتىنان قارماقشى اۋدانىنداعى اقاي اۋىلى اكىمدىگىنە ۇمىتكەر ەلميرا قازيەۆا تۇرعىندارمەن كەزدەستى.
كارانتين تالاپتارىنا ساي اۋىلدىق كلۋب الدىندا وتكەن كەزدەسۋگە اۋىل تۇرعىندارى, اقساقالدار, جاستار جينالدى.
كەزدەسۋدە گەننادي شيپوۆسكيح پارتيانىڭ سايلاۋالدى باعدارلاماسىنىڭ جول كارتاسى نەگىزىندە اتقارىلىپ جاتقان جانە جۇزەگە اسىرىلعان جۇمىستارعا توقتالىپ ءوتتى.
– پارتيانىڭ 5 جىلعا ارنالعان سايلاۋالدى باعدارلاماسىندا وسى اۋىلعا قاتىستى دا ءبىراز جاڭالىق بار. قازىر وبلىس بويىنشا جول كارتاسىندا جوبالانعان جۇمىستاردىڭ 16%-ى جۇزەگە اسىرىلىپ وتىر. اتاپ ايتار بولسام, 6000-عا جۋىق تۇرعىنى بار اقاي اۋىلدىق وكرۋگىندەگى ەلەكتر جەلىلەرىن كەڭەيتۋ جانە قايتا جاڭعىرتۋ جۇزەگە اسىپ, ونىڭ يگىلىگىن ەل كورۋدە, – دەدى دەپۋتات.
كەزدەسۋگە الداعى وتەتىن اۋىل اكىمدەرىنىڭ تىكەلەي سايلاۋىندا اقاي اۋىلدىق وكرۋگى اكىمدىگىنە Nur Otan پارتياسىنان ۇمىتكەر ەلميرا قازيەۆا جەرلەستەرىنە ءوزىنىڭ سايلاۋالدى باعدارلاماسىن جان-جاقتى تانىستىردى.
ۇمىتكەر سايلاۋدا جەرلەستەرى سەنىم بىلدىرسە, العان ءبىلىمى مەن ومىردەن جيناقتاعان تاجىريبەسىن اۋىلداستارىنىڭ ءال-اۋقاتىن, تۇرمىس-تىرشىلىگىن جاقسارتۋعا جانە شارۋاشىلىق قۇرىلىمدارىنىڭ ەكونوميكالىق نىعايۋىنا جۇمسايتىنىن ايتتى. حالىقتىڭ بۇقارالىق سپورتپەن اينالىسۋىنا, اۋىلداعى مادەنيەتتىڭ دامۋىنا مۇمكىندىك جاساپ, جاستار بوس ۋاقىتىن ءتيىمدى پايدالاناتىن ءىس-شارالاردىڭ ۇيىمداستىرىلۋىنا, پارتيالىق جوبالاردىڭ جۇزەگە اسۋىنا جانە جۇمىسسىز جاستاردىڭ ومىردەن ءوز جولىن تابۋىنا ىقپال ەتەتىنىن جەتكىزدى.
كەزدەسۋ بارىسىندا اۋىل تۇرعىندارى وزدەرىنىڭ تالاپ-تىلەكتەرى مەن ۇسىنىستارىن ايتتى.
قىزىلوردا وبلىسى