قىزىلوردادا وبلىستىق سانيتارلىق-ەپيدەميالىق باقىلاۋ دەپارتامەنتىنىڭ باسشىسى دينارا جاڭابەرگەنوۆا باق وكىلدەرىنە وڭىردەگى ەپيدەميالىق احۋال تۋرالى ايتىپ بەردى.
ىندەت بىلىنگەلى بەرى وبلىستا كوروناۆيرۋس ينفەكتسياسىنىڭ 7 392 جاعدايى تىركەلگەن. ونىڭ 3 392-ءسى وتكەن جىلى انىقتالسا, 4 مىڭى جىل باسىنان بەرى بەلگىلى بولىپ وتىر. بىلتىر شىلدە ايىندا 1 775 ناۋقاس تىركەلىپ, ورشىگەن دەرت جۇرتتىڭ ەسىن شىعارعان ەدى. بيىل ىندەت 1 540 ادام بايقالعان ءساۋىر ايىندا كوپ تىركەلدى. مامىر ايىنىڭ ءۇشىنشى ونكۇندىگىنەن باستاپ ازايىپ, ماۋسىمنىڭ ورتاسىندا تاۋلىگىنە 6-7 ادامعا دەيىن تومەندەدى.
– بىراق ەلىمىزدەن مۋتاتسيالانعان ءۇندى شتامى بايقالىپ, ەپيدەميالىق احۋال كۇردەلەنىپ كەتكەنىن بىلەسىزدەر. ونىڭ بالالار اراسىندا, 1 جاسقا دەيىنگى نارەستەلەردەن انىقتالۋى ءبىزدى الاڭداتىپ وتىر. وبلىستان رەسپۋبليكاعا رەفەرەنس زەرتحاناسىنا 22 سىناما جولدانىپ, ونىڭ 13-ىنەن ءۇندى شتامىنىڭ سەروتيپى انىقتالدى, – دەيدى دەپارتامەنت باسشىسى.
دۇنيەجۇزىلىك دەنساۋلىق ساقتاۋ ۇيىمىنىڭ دەرەگى بويىنشا «دەلتا» الەمنىڭ 200-گە جۋىق ەلىنەن بايقالعان. ونىڭ جۇعۋ جىلدامدىعى الدىڭعىلارعا قاراعاندا 60 پايىزعا جوعارى جانە ينكۋباتسيالىق كەزەڭى دە 2 ەسە قىسقا. ياعني ۆيرۋستىڭ بۇل ءتۇرى ۇلكەنگە دە, كىشىگە دە قاۋىپ.
– ينفەكتسيادان قورعانۋدىڭ بىردەن ءبىر جولى ۆيرۋسقا قارسى ۆاكتسينانىڭ تولىق كۋرسىن الۋ, – دەيدى دينارا جاڭابەرگەنوۆا. – وبلىستا ەكپە جاسايتىن 106 كابينەت بار. جەتى مونيتورينگتىك توپ ەمدەۋ مەكەمەلەرىندە ۆاكتسينالاردى تاسىمالداۋعا, «مۇزداي تىزبەك» ەرەجەلەرىنىڭ ساقتالۋىنا, ەكپە سالۋدا رەگلامەنت تالاپتارىنىڭ, ارنايى ەرەجەلەردىڭ بۇزىلماۋىنا, ەكپە العان تۇرعىندارعا مەديتسينالىق باقىلاۋ جاسالىپ, مالىمەتتەردىڭ «ۆاكتسيناتسيا» مودۋلىنە ەنگىزىلۋىنە جۇيەلى تۇردە مونيتورينگتىك باقىلاۋ جاساپ وتىر. كەمشىلىكتەر وبلىستىق شتابتا قارالىپ, قورىتىندىسى بويىنشا ءتيىستى لاۋازىمدى تۇلعالارعا حاتتامالىق تاپسىرمالار بەرىلۋدە.
مەديتسينالىق اقپاراتتىق جۇيەنىڭ دەرەكتەرىنە سايكەس بيىلعى 1 اقپان مەن 6 شىلدە ارالىعىندا وبلىستا ۆاكتسينانىڭ 1 كومپونەنتىن ەكتىرگەندەر سانى 173 630 ادامعا جەتكەن. ەكىنشى بولىگىن 93 338 تۇرعىن الىپتى.
دەپارتامەنت باسشىسى تالاپ پەن تىيىمدى ەلەمەي ءتۇرلى وتباسىلىق شارا, مەرەكەلەردى وتكىزەتىندەر ازايماي وتىرعاندىعىن دا ايتىپ ءوتتى. وڭىردەگى 167 مونيتورينگتىك توپ جىل باسىنان بەرى 10 621 نىسانعا رەيد جاساعان. تەكسەرۋ كەزىندە كارانتين تالاپتارىن بۇزۋدىڭ 343 دەرەگى انىقتالىپ, ايىپپۇل سالىندى.
بريفينگتە دينارا ولجابايقىزى تىم قاۋىپتى ۆيرۋس ءتۇرىن جۇقتىرۋدان اۋلاق بولۋ ءۇشىن كوپشىلىك جەرلەرگە بارۋدى دوعارا تۇرىپ, مەرەكەلىك ءىس-شارالاردى ونلاين فورماتتا وتكىزۋ ءجون ەكەنىن ايتتى.
قىزىلوردا وبلىسى