ساراپشىلار بولسا تەڭگەنىڭ ەندىگى تاعدىرى نە بولادى دەگەن ماسەلەگە الاڭداي باستادى. ۆاليۋتا باعامىنىڭ ەركىن اينالىمعا جىبەرىلگەنىنە بىرنەشە جىل بولدى. بىراق ۇلتتىق بانك اندا-ساندا بولسا دا ينتەرۆەنتسيا جاساپ تەڭگەنى «قۇتقارىپ» قالىپ ءجۇر. بۇل جولى دا ءتول تەڭگەمىز ۇلتتىق بانكتىڭ كومەگىن قاجەتسىنىپ وتىرعانى بەلگىلى بولىپ قالدى. ۇلتتىق بانكتىڭ مونەتارلىق وپەراتسيالار دەپارتامەنتىنىڭ ديرەكتورى نۇرجان تۇرسىنحانوۆ مەرەكە كۇندەرى سىرتقى نارىقتارداعى احۋال قالاي دامىدى جانە دەمالىس كۇندەرىنەن كەيىن تەڭگەنىڭ ديناميكاسىنا قانداي فاكتورلار اسەر ەتتكەنىن ايتتى, دەپ جازادى Egemen.kz.
باس بانك وكىلىنىڭ ايتۋىنشا, ۇزاق دەمالىس كۇندەرىنەن كەيىن تەڭگەنىڭ السىرەۋىنە شەتەلدەگى وقيعالار, اتاپ ايتقاندا, مۇناي ءوندىرۋشى ەلدەر وكىلدەرىنىڭ مۇناي ءوندىرۋ دەڭگەيى تۋرالى كەلىسسوزدەرى اسەر ەتتى.
اق ءۇيدىڭ ءباسپاسوز حاتشىسى دجەن پساكي 6 شىلدەدەگى بريفينگ بارىسىندا اقش بيلىگى جوعارى دەڭگەيدەگى باسشىلىقتى ۇستاپ وتىرعانىن مالىمدەدى. ساۋد ارابياسى مەن ءباا وكىلدەرىمەن كونسۋلتاتسيالار, وپەك مۇشەلەرى جانە ونىڭ سەرىكتەستەرى قول جەتىمدى باعامەن سەنىمدى ەنەرگيامەن قامتاماسىز ەتە الادى دەگەن ءۇمىت بار. وسى حابارلامانىڭ ناتيجەسىندە مۇناي باعاسى باررەلىنە 77,8 دوللاردان 74,13 دوللارعا دەيىن قۇلدىراپ, كۇندىزگى 5 پايىزدىق قۇلدىراۋدى كورسەتتى.
«ينۆەستورلاردىڭ دۇنيەجۇزىلىك تاۋەكەلدىك دەڭگەيىنىڭ تومەندەپ كەتۋى تەڭگەگە قىسىمدى كۇشەيتىپ وتىر. اتاپ ايتقاندا, كوۆيد-19 دەلتا شتامىنىڭ تارالۋى تۋرالى الاڭداۋشىلىق كۇشەيىپ, كەيبىر ەلدەر كارانتيندىك شارالاردى قايتادان كۇشەيتۋگە ءماجبۇر. ءبىزدىڭ نەگىزگى ساۋدا سەرىكتەستەرىمىزدىڭ ۆاليۋتاسى - رەسەي ءرۋبلى وسى اپتانىڭ باسىنان بەرى 1,6% السىرەدى. مۇنايدىڭ قۇبىلمالى باعالارى, جاڭا شتامداردىڭ تارالۋى جانە كوۆيد-19 پاندەمياسى ۆاليۋتالارعا, سونىڭ ىشىندە تەڭگەگە قىسىم جاساۋدى جالعاستىرۋدا. ۇلتتىق بانك سىرتقى نارىقتارداعى احۋالدى باقىلاۋدى جالعاستىرۋدا, تۇراقسىزدانعان جانە الىپ-ساتارلىق اۋىتقۋلار بولعان جاعدايدا, ۆاليۋتالىق ينتەرۆەنتسيالار جۇرگىزۋ قۇقىعىن وزىنە قالدىرادى», دەدى نۇرجان تۇرسىنحانوۆ.