ەۋروپا جاسىل الاڭدارىندا ءوتىپ جاتقان فۋتبولدان كارى قۇرلىق بىرىنشىلىگىنىڭ پلەي-وفف كەزەڭىندەگى باسەكەلەر ءوز مارەسىنە جەتتى. سوڭعى كۇنگى ويىندا گەرمانيا لوندوندا انگليادان جەڭىلسە, گلازگوداعى باسەكەدە ۋكراينا فۋتبولشىلارى شۆەتسيادان باسىم ءتۇسىپ, تۇڭعىش رەت ەۋروپا چەمپيوناتىنىڭ شيرەك فينالىنا جولداما الدى.
«فۋتبولدى ءبارى وينايدى, بىراق ارقاشان نەمىستەر جەڭىمپاز بولادى». بۇل وسىدان 31 جىل بۇرىن سول كەزدەگى انگليانىڭ داڭقتى فۋتبولشىسى گاري لينەكەردىڭ گەرمانيادان جەڭىلگەننەن كەيىن اشىنا ايتقان ءسوزى ەدى. وسىنشا ۋاقىت فۋتبولمەن قاتار ءومىر سۇرگەن ايگىلى ءتامسىل ەندى بۇدان بىلاي دايەكسىز بولىپ قالدى. ءدال وسى ءسوزدى اعىلشىنداردىڭ وزدەرى ايتىپ, بۇل ءسوزدى وزدەرى جوققا شىعاردى. «ۋەمبليدە» وتكەن ويىندا اعىلشىندار ستەرلينگ پەن كەيننىڭ سوققان گولىنىڭ ارقاسىندا «نەمىس ماشينەسىن» توقتاتىپ, وزدەرى ەۋروپا چەمپيوناتىنىڭ فينالىنا سەنىمدى قادام جاسادى. 2014 جىلعى الەم چەمپيوناتىندا التىن, 2010 جىلعى بىرىنشىلىكتە قولا. ەۋرو-2008-دە كۇمىس, ەۋرو-2012 جانە ەۋرو-2016 تۋرنيرلەرىندە قولا جۇلدە. 2017 جىلعى كونفەدەراتسيالار كۋبوگىندا التىن. جانە سوڭعى ەكى ءىرى تۋرنيردەگى ساتسىزدىك – 2018 جىلعى الەم چەمپيوناتىندا توپتان شىعا الماۋ, بيىلعى ەۋرونى 1/8 فينالدا اياقتاۋ. مىنە, گەرمانيا قۇراماسىنىڭ باس باپكەرى ءليوۆتىڭ «بۋندەستيمدەگى» ءداۋىرى وسىلاي اياقتالدى. جالپى, انگليا جانە گەرمانيا قۇرامالارى اراسىنداعى كەزدەسۋ قاي زاماندا دا تارتىستى وتەتىنى بەلگىلى. سەيسەنبى كۇنگى ويىن اعىلشىندار ءۇشىن ءجاي عانا جەڭىسكە جەتىپ, كەلەسى كەزەڭگە ءوتۋ كەرەك بولعان قاتارداعى 1/8 ماتچى ەمەس ەدى. ولار ءۇشىن بۇل ويىننىڭ ماڭىزدىلىعى ودان دا جوعارى بولاتىن. سەبەبى نەمىستەر «ۋەمبليدە» 1975 جىلدان بەرى جەڭىلىستىڭ نە ەكەنىن بىلمەي كەلە جاتقان-دى – جەتى جەڭىس, ءبىر تەڭ ويىن. اعىلشىنداردىڭ وسى ويىنداعى بار ماقساتى – «نەمىس ماشينەسىن» قالايدا توقتاتۋ-تىن. جانكۇيەرلەر بايقاعان بولسا كەرەك, قازىر ساۋتگەيت شابۋىلعا ەمەس, قورعانىسقا قاتتى كوڭىل بولۋدە. وسى ەۋروپا چەمپيوناتىندا انگليا ءۇش ورتالىق قورعاۋشىمەن (ۋوكەر, ماگۋاير جانە ستوۋنز) ويناپ ءجۇر. ال اعىلشىن جانكۇيەرلەرىنىڭ مۇنداي ويىن تاسىلىنە كوڭىلدەرى تولماۋدا. بىراق تاكتيكا ءوز جەمىسىن بەرۋدە. قازىر ساۋتگەيتكە جارقىن جەڭىستىڭ تۇككە دە قاجەتى جوق, وعان ەڭ كەرەگى – ەۋروپا چەمپيوناتىنىڭ قوس قۇلاقتى كۋبوگى. كوپ جانكۇيەر ويىن الدىندا انگليا – گەرمانيا ماتچىنان ءبىر كۇن بۇرىن بولعان حورۆاتيا – يسپانيا (3:5), فرانتسيا – شۆەيتساريا (3:3) ويىنى سياقتى گولدان جاڭبىر جاۋعىزعان باسەكەنى كۇتكەن بولاتىن. بىراق ەكى ۇجىم دا قاتەلىك جىبەرۋدەن قورقىپ, ويىندى وتە ساقتىقپەن باستادى. ەكەۋىنە دە بۇل ويىندا جەڭىلۋگە بولمايتىن ەدى. ءبىرىنشى سەبەبى – ەۋرودان شىعىپ كەتەسىڭ, ەكىنشىسى – تاريحي ويىندا قارسىلاسىڭا جول بەرەسىڭ. شىنى كەرەك, ءبىرىنشى تايمدا راحيم ستەرلينگ پەن تيمو ۆەرنەردىڭ ءبىر مارتە گول سوعاتىنداي قاۋىپتى شابۋىل ۇيىمداستىرعانىنان باسقا تۇك تە كورگەنىمىز جوق. ويىن ءبىراز زەرىكتىرىپ جىبەردى. ەكىنشى تايمنىڭ باسى جانكۇيەرلەردىڭ ودان ءارى ءىشىن پىستىردى. ويىننىڭ 75-مينۋتىندا عانا ليۋك شوۋدان تاماشا پاس العان راحيم ستەرلينگ نويەر قورعاعان قاقپانى ءدال كوزدەپ, ويىننىڭ ءسانىن كىرگىزدى. ارادا از ۋاقىت وتكەندە ميۋللەر قاقپاشىمەن بىرگە-ءبىر شىعىپ, گول سوعا المادى. ەسەپ – 1:1 بولۋدىڭ ورنىنا 86-مينۋتتا تابلودا 0:2 ناتيجەسى تىركەلدى. حارري كەين ءوز مۇمكىندىگىن ءتيىمدى پايدالانىپ, ويىننىڭ نۇكتەسىن قويدى. سونداي-اق بۇل ساۋتگەيت ءۇشىن رەۆانش ماتچى بولدى. 1996 جىلى ەۋروپا چەمپيوناتىنىڭ جارتىلاي فينالىندا انگليا مەن گەرمانيا كەزدەسىپ, پەنالتي سەرياسىندا گارەت گول سوعا الماي, نەمىستەرگە جول بەرگەن بولاتىن. ۋكراينا – تۇڭعىش رەت شيرەك فينالدا. شوتلانديا استاناسىندا وتكەن ويىندا ۋكراينا فۋتبولشىلارى قوسىمشا تايمنىڭ سوڭعى مينۋتىندا شۆەتسيا قاقپاسىنا جەڭىس گولىن سوعىپ, شيرەك فينالعا جولداما الدى. ال وسىدان بىرەر اپتا بۇرىن ۋكراينا جارىستى توپتىق كەزەڭدە اياقتاۋدىڭ ءسال-اق الدىندا تۇرعان. توپتىق ويىنداردا سۇرەڭسىز ويىن كورسەتىپ, وزدىگىنەن كەلەسى اينالىمعا شىعا الماي قالعان اندرەي شەۆچەنكو شاكىرتتەرى يسپانيانىڭ ءىرى جەڭىسىنىڭ ارقاسىندا قوسىمشا جولدامامەن 1/8 فينالعا شىعىپ ەدى. كەزدەسۋدى شۆەدتەر تاماشا باستاپ, دوپتى ءبىراز ۋاقىت ءوز باقىلاۋىندا ۇستادى. بىراق ەسەپتى ءبىرىنشى بولىپ ۋكراينا قۇراماسى اشتى. ويىننىڭ 27-مينۋتىندا «مانچەستەر سيتي» مەن ۋكراينا قۇراماسىنىڭ قورعاۋشىسى الەكساندر زينچەنكو ەۋروداعى ءوزىنىڭ العاشقى گولىن سوعىپ, جانكۇيەرلەرىنە قۋانىش سىيلادى. ارادا كوپ ۋاقىت وتپەي شۆەتسيالىق شابۋىلشى ەميل فورسبەرگ گەورگي بۋششان قورعاعان قاقپادان ساڭىلاۋ تاۋىپ, تارازى باسىن تەڭەستىردى. ءسويتىپ, تەڭ ەسەپ ويىننىڭ 90-مينۋتىنا دەيىن وزگەرىسسىز قالدى. قوسىمشا تايمدا دا كوماندالار ءبىر-ءبىرىنىڭ قاقپاسىنا گول سوعا الماي, جانكۇيەرلەر دە, باپكەرلەر دە پەنالتي سەرياسىنا دايىندالىپ جاتقان بولاتىن. الايدا 121-مينۋتتا الەكساندر زينچەنكونىڭ اۋەلەتە اسىرعان پاسىن توقتاتپاستان قاقپاعا باعىتتاعان ارتيوم دوۆبيكتىڭ سوققىسى قاقپا تورىندا تۋلادى. ۋكراينا – شيرەك فينالدا. ءبىرىنشى وۆەرتايم اياقتالار تۇستا شۆەتسيا فۋتبولشىسى ماركۋس دانيەلسون ويىن ءتارتىبىن ورەسكەل بۇزىپ, الاڭنان قۋىلدى. نەگىزى وسى ءبىر ءسات شۆەتسيا قۇراماسىن ساتسىزدىككە ۇشىراتتى دەۋگە بولاتىن شىعار. وسىلايشا ۋكراينا قۇراماسى ءوز تاريحىندا تۇڭعىش رەت شيرەك فينالعا شىعىپ وتىر. ەندى ولار 3 شىلدە كۇنى ريمدە انگليا قۇراماسىمەن كەزدەسەدى. ەۋروپا چەمپيوناتىنىڭ 1/8 فينالى نەسىمەن ەستە قالدى؟ ءبىر سويلەممەن... الەم چەمپيونى مەن ەۋروپانىڭ ۆيتسە-چەمپيونى – فرانتسيا, سوڭعى ەۋروپا چەمپيونى – پورتۋگاليا جارىستى وسى كەزەڭدە اياقتادى. كيليان مباپپە شەشۋشى ساتتە قاتەلەسىپ, شۆەيتساريا قاقپاسىنا پەنالتي سوعۋدان ءمۇلت كەتتى. «اجال» توبىنا تۇسكەن بىردە-ءبىر ۇجىم (گەرمانيا, فرانتسيا, پورتۋگاليا) شيرەك فينالعا شىعا المادى. ەۋرودا اۆتوگول بويىنشا رەكوردتى ناتيجە تىركەلدى – 9 اۆتوگول. پلەي-وففتاعى ەڭ ءبىرىنشى ءىرى ەسەپ دانيا – ۋەلس ويىنىندا تىركەلدى – 4:0.ءبىرىنشى قوسىمشا تايم يتاليا – اۋستريا كەزدەسۋىندە وينالدى. ەڭ ءساتتى كۇن – 14 گول سوعىلعان يسپانيا – حورۆاتيا (5:3), فرانتسيا – شۆەيتساريا (3:3, پەنالتي – 4:5) ويىندارى بولعان كۇن بولدى.
1/4 فينالدا كەزدەسەتىن قۇرامالار
2 شىلدە22:00. شۆەيتساريا – يسپانيا (سانكت-پەتەربۋرگ)01:00. بەلگيا – يتاليا (ميۋنحەن)
3 شىلدە22:00. چەحيا – دانيا (باكۋ) 01:00. ۋكراينا – انگليا (ريم)