قۇرلىقتىق حوككەي ليگاسىندا (قحل) باق سىنايتىن «بارىستىڭ» جاڭا ماۋسىمعا دايىندىعى اسا ءماز بولماي تۇر. ماۋسىمارالىق ۇزىلىستە قازاقستاندىق ۇجىمنىڭ قۇرامى كۇشەيۋدىڭ ورنىنا كۇن سايىن السىرەپ بارادى. ماسەلەن, بۇگىنگە دەيىن كوماندادان 15 حوككەيشى كەتتى. ال ولاردىڭ ورنىنا نەبارى بەس ويىنشى عانا كەلدى. ولاردىڭ ەكەۋى قاقپاشى بولسا, ەكەۋى – قورعاۋشى, تاعى بىرەۋى – شابۋىلشى.
قحل-ءدىڭ كەزەكتى ماۋسىمىنىڭ باستالۋىنا ەكى اي قالسا دا, ەلوردالىق ۇجىم ءالى دە باس باپكەر يۋري ميحايليسپەن ءبىر ىمىراعا كەلە الماي جاتىر. بىلتىر ءبىر جىلدىق كەلىسىمشارتقا وتىرعان ەكى تاراپ ءالى كۇنگە دەيىن كەلىسىمنىڭ سوزىلعانىن نەمەسە توقتاعانىن حابارلاعان جوق. باس باپكەر ناقتىلانباعان سوڭ, «بارىس» قۇرامادان كەتكەن ويىنشىلاردىڭ ورنىنا لايىقتى ويىنشىلار الا الماي وتىرعان سىڭايلى. جوعارىدا ايتقانىمىزداي, «بارىستى» بۇگىنگە دەيىن ورگە سۇيرەپ كەلگەن 15 حوككەيشى ەلوردالىق ۇجىمنان كەتتى. ازىرگە استانالىق كلۋبپەن سوڭعى بولىپ قورعاۋشى لەونيد مەتالنيكوۆ قوشتاستى. ول الداعى ماۋسىمنان باستاپ ۆلاديۆوستوكتىڭ «ادميرال» كلۋبىنىڭ نامىسىن قورعايدى. وسكەمەن حوككەي مەكتەبىنىڭ تۇلەگى مەتالنيكوۆ «بارىس» ساپىندا 2015 جىلدان بەرى ونەر كورسەتىپ كەلەدى. التى جىلدا ول قحل-دا 95 ماتچ وتكىزىپ, 16 (1+15) ۇپاي جيناعان. سونداي-اق لەونيد ءار جىلدارى «كازتسينك-تورپەدو» (وسكەمەن), «يۋجنىي ۋرال» (ورسك) جانە «سارىارقا» (قاراعاندى) كلۋبتارىندا ويناپ, 2018/19 ماۋسىمدا جوعارى حوككەي ليگاسىنىڭ (جحل) چەمپيونى اتاندى. پەتروۆ كۋبوگىن يەلەنگەن تۇستا جىلدىڭ ۇزدىك قورعاۋشىسى دەگەن اتاققا يە بولدى. «ادميرال» بىلتىرعى ماۋسىمدا پاندەمياعا بايلانىستى قحل ويىندارىنا قاتىسقان جوق. سونىمەن قاتار مۇنىڭ الدىندا «بارىس» ساپىنان قازاقستان ۇلتتىق قۇراماسىنىڭ قورعاۋشىسى ۆالەري ورەحوۆ تا كەتىپ, فينليانديالىق كلۋبقا اۋىسقان. ءتىپتى 22 ماۋسىمدا فينليانديالىق حپك كلۋبى ورەحوۆتىڭ رەسمي تۇردە كوماندا ساپىنا اۋىسقانىن جاريالاپ, ويىنشىنى ءدۇيىم جۇرتقا تانىستىردى. 21 جاستاعى حوككەيشىنىڭ ءبىر جىلدىق كەلىسىمشارتقا قول قويعانى تۋرالى دا حابار تاراتتى. وسى اقپاراتتان كەيىن «بارىس» ورەحوۆتىڭ مانسابىن فينليانديا چەمپيوناتىندا جالعاستىراتىنىن راستادى. الايدا ەلوردالىق كلۋب بىرەر كۇن وتكەن سوڭ ءوز ويىنشىسىنىڭ باسقا كلۋبقا اۋىسۋى تۋرالى اقپاراتتى جوققا شىعارىپ, قورعاۋشى الداعى ماۋسىمدا «بارىستا» وينايتىنىن مالىمدەدى. قحل-دىڭ بىلتىرعى ماۋسىمىندا ورەحوۆ 32 ماتچ وتكىزىپ, 10 (2 + 8) ۇپاي جينادى جانە ءبىر پلەي-وفف ويىنىندا ناتيجەلى پاس بەرگەن. جالپى جازعى ۇزىلىستە «بارىستان» كەتكەن سوڭعى ويىنشى مەتالنيكوۆ بولادى دەگەن ۇمىتتەمىز. قازىرگى تاڭدا ەلوردالىق كلۋبتا بەس-اق قورعاۋشى قالدى. ولار – داررەن ديتس, سامات دانيار, ەگور شالاپوۆ, وللە السينگ جانە ەريەك مارتينسسون. بۇكىل ماۋسىم بويى وسى بەس قورعاۋشى وينامايتىنى بەلگىلى. ەندى «بارىس» كەم دەگەندە تاعى دا بەس قورعاۋشىمەن قۇرامىن كۇشەيتۋى كەرەك. شەبەر شابۋىلشىلار دا كەرەك-اق.