بۇقارالىق اقپارات قۇرالدارىنىڭ قىزمەتكەرلەرى كۇنى قارساڭىندا سەناتتا جۋرناليستەر اراسىنداعى «امانات» بايقاۋىنىڭ لاۋرەاتتارىن سالتاناتتى ماراپاتتاۋ ءراسىمى ءوتتى, دەپ حابارلادى جوعارى پالاتانىڭ ءباسپاسوز قىزمەتى.
جەڭىمپازداردى جەڭىستەرىمەن جانە كاسىبي مەرەكەلەرىمەن قۇتتىقتاعان سەنات توراعاسى ماۋلەن اشىمباەۆ پاندەميا كەزىندە جۋرناليستەر مەن باسقا دا باق قىزمەتكەرىنىڭ ءرولى اسا ماڭىزدى بولعانىن اتاپ ءوتتى. ولاردىڭ قاجىرلى ەڭبەگىنىڭ ارقاسىندا قازاقستاندىقتار ەلدەگى احۋالدى, ىندەتپەن كۇرەس بارىسىندا قولعا الىنعان شارالاردى, مەملەكەتتىڭ دامۋى جولىندا قابىلدانىپ جاتقان اسا ماڭىزدى زاڭداردى دەر كەزىندە ءبىلىپ وتىردى.
«پاندەمياعا جانە قابىلدانعان شەكتەۋلەرگە بايلانىستى بيىل ەكىنشى جىل قاتارىنان جۋرناليستەر قيىن جاعدايدا جۇمىس ىستەۋدە. سوعان قاراماستان, سىزدەر كاسىبي بىلىكتىلىكتىڭ بيىگىنەن كورىنىپ, ازاماتتارىمىزدى ماڭىزدى اقپاراتتارمەن دەر كەزىندە تانىستىرىپ, وزەكتى ماسەلەلەرگە ارنالعان رەپورتاجدار مەن ساراپتامالىق ماتەريالدارىڭىزدى ۋاقتىلى جاريالاپ كەلەسىزدەر. وسىنداي بەلسەندىلىكتەرىڭىز ءۇشىن سىزدەرگە العىسىمىزدى بىلدىرەمىز», دەدى سەنات توراعاسى.
م.اشىمباەۆ مەملەكەت باسشىسى قازاق راديوسىنىڭ 100 جىلدىعىنا وراي 1 قازاندى رەسمي تۇردە «راديو قىزمەتكەرلەرىنىڭ كۇنى» رەتىندە جاريالاۋدى ۇسىنعانىن ايتتى.
بيىل بايقاۋعا 100-گە جۋىق جۇمىس كەلىپ ءتۇستى. قاتىسۋشىلار اراسىندا تەلەارنا, راديو, گازەت, اقپاراتتىق پورتالدار جانە باسقا دا باق تىلشىلەرى بار.
«بايقاۋعا ۇسىنىلعان بارلىق ماتەريال – جوعارى كاسىبي دەڭگەيدەگى جۇمىستار. ارنايى كوميسسيا ولاردىڭ اراسىنان ەڭ ۇزدىكتەرىن ىرىكتەپ الدى. بارلىق جەڭىمپازدى بۇگىنگى جەڭىستەرىمەن قۇتتىقتايمىن», دەدى م.اشىمباەۆ.
سونداي-اق سەنات توراعاسى بيىل بايقاۋعا بەلگىلى قازاقستاندىق جۋرناليستەر نۇرتىلەۋ يمانعالي ۇلى مەن ميحايل دوروفەەۆ اتىنداعى ەكى جۇلدە قوسىلعانىنا نازار اۋداردى.
«نۇرتىلەۋ يمانعالي ۇلى مەن ميحايل دوروفەەۆ – وتاندىق جۋرناليستيكانىڭ دامۋىنا ۇلكەن ۇلەس قوسقان قالامگەرلەر ەدى. ولار تالانتتى جۋرناليست قانا ەمەس ەلىمىزدىڭ ناعىز پاتريوتتارى بولدى. نۇرتىلەۋ اعا مەن ميحايل دوروفەەۆتىڭ جارقىن بەينەلەرى ارقاشان ءبىزدىڭ جادىمىزدا ساقتالادى. ولاردىڭ ەڭبەككە دەگەن ادالدىعى, كاسىبي شەبەرلىگى مەن مول تاجىريبەسى جاس جۋرناليستەر ءۇشىن ءاردايىم ۇلگى-ونەگە بولىپ قالا بەرەتىنى ءسوزسىز. سەنات تاعايىنداعان ارنايى جۇلدەلەر وسى باعىتقا دا ءوز ىقپالىن تيگىزەدى دەپ سەنەمىز», دەدى م.اشىمباەۆ.
«امانات» بايقاۋىنىڭ بيىلعى جەڭىمپازدارى مىنالار:
ۇزدىك تەلەۆيزيالىق ماتەريال – ينديرا جىلقايداروۆا («حابار» تەلەارناسى) جانە سۆەتلانا پەنكوۆا («پەرۆىي كانال «ەۆرازيا»);
ۇزدىك راديوماتەريال – دۋلات ابيبۋللاەۆ («Qazaq radiosy»);
باق باسىلىمدارىنداعى ۇزدىك جاريالانىم – «اتىراۋ» گازەتىنىڭ ۇجىمى جانە وكسانا سكيبان («ليتەر» گازەتى);
ينتەرنەت-باسىلىمداعى ۇزدىك جاريالانىم – مارلان جيەمباي («قازاقپارات» حاا) جانە ەۆگەني فەدوتوۆ (Kazpravda.kz);
الەۋمەتتىك جەلىلەردەگى ۇزدىك جاريالانىم – نارتاي ارالباي ۇلى;
«تاۋەلسىزدىككە 30 جىل» – قازاقستاننىڭ تاۋەلسىزدىگىنىڭ 30 جىلدىعى تۋرالى ۇزدىك ماتەريال – جولدىباي بازاروۆ («ەgemen Qazaqstan» گازەتى) جانە «حابار 24» تەلەارناسىنىڭ ۇجىمى;
نۇرتىلەۋ يمانعالي ۇلىن ەستە قالدىرۋعا ارنالعان «قازاق جۋرناليستيكاسىنىڭ دامۋىنا قوسقان ۇلەسى ءۇشىن» سىيلىعى – جاينا سلامبەك («Qazaqstan» ۇلتتىق تەلەارناسى);
ميحايل دوروفەەۆتى ەستە قالدىرۋعا ارنالعان «ۇزدىك اناليتيكالىق ماتەريال ءۇشىن» سىيلىعى – يۋري ماسانوۆ (Kursiv.kz);
پارلامەنتتىك جۋرناليستيكانىڭ دامىتۋعا قوسقان ۇلەسى ءۇشىن ارنايى جۇلدە – ەلدار نۋرۋللين («ەكسپرەسس-ك» جاڭالىقتار پورتالى).