كۇي ونەرى – قازاق حالقىنىڭ ەڭ قۇندى, باعالى مۇراسىنىڭ ءبىرى. قانى مەن جانىندا كۇي ويناعان ۇلتىمىز تۋما تالانتتارعا كەندە ەمەس. سونداي دارىن يەلەرىنىڭ ءبىرى – قازاق ونەرىندە ءوزىنىڭ وشپەس ءىزىن قالدىرعان كۇيشى, كومپوزيتور دينا نۇرپەيىسوۆا. بيىل داڭقتى تۇلعانىڭ تۋعانىنا 160 جىل تولىپ وتىر. سوعان بايلانىستى «قازاقكونتسەرتتە» سۇڭعىلا ونەر يەسىنىڭ مەرەيتويىنا ارنالعان ۇلكەن كونتسەرت ءوتتى.
اتالعان ءىس-شارانىڭ ءبىز دە كۋاگەرى بولدىق. «ۇستاز بەن شاكىرت» دەپ اتالاتىن جاڭا كونتسەرتتى «قازاقكونتسەرت» ارتىستەرى كۇي اتاسى قۇرمانعازى ساعىرباي ۇلى مەن ونىڭ اتاقتى شاكىرتى دينا نۇرپەيىسوۆانىڭ شىعارماشىلىعىنا ارنادى. بۇل كەش «قازاقكونتسەرتتىڭ» 60-شى مەرەيتويلىق ماۋسىمىنا ارنالعان «جۇلدىزبەن ءبىر ساحنادا» اتتى جاڭا جوبا اياسىندا جۇزەگە اسىرىلدى.
كونتسەرتتە بەلگىلى كومپوزيتور باۋىرجان اقتاەۆتىڭ كوركەمدىك جەتەكشىلىگىمەن «استانا سازى» ءانسامبلىنىڭ سوليستەرى ۇلى كۇيشىلەردىڭ ەسىمدەرىن اسقاقتاتىپ, ارتىنا قالدىرعان باي مۇرالارىن جاڭعىرتتى. بۇل كەشتى ونەرسۇيەر قاۋىم ارتىستەرمەن ءبىر ساحنادا وتىرىپ تاماشالاپ, كونتسەرتتىڭ تىكەلەي قاتىسۋشىسى رەتىندە جاڭا اسەر الدى. كونتسەرتتىڭ جاڭا فورماتىمەن ەرەكشە ۇيلەسىم تاپقان ۇلتتىق مۋزىكا جانە ارتىستەرىنىڭ كاسىبي شەبەرلىگى كورەرمەننىڭ جوعارى باعاسىنا يە بولدى.
كورەرمەندەرمەن بىرگە مەرەكەلىك كونتسەرتتى تاماشالاعان دينا نۇرپەيىسوۆانىڭ تۋعان نەمەرەسى تولەگەن قۋانىشەۆ «قازاقكونتسەرت» ارتىستەرىنە ءوز العىسىن ءبىلدىردى.
باۋىرجان اقتاەۆتىڭ ايتۋىنشا, كۇيشى دينا نۇرپەيىسوۆانىڭ 160 جىلدىعى مەن «قازاقكونتسەرتتىڭ» 60 جىلدىق مەرەيتويى اياسىندا ۇيىمداستىرىلعان بۇل كەش كورەرمەن قاۋىمعا ناعىز رۋحاني دەمالىس سىيلادى.
– بۇل مەرەيتوي ءبىزدىڭ وتكەنىمىز بەن بۇگىنىمىزدىڭ اراسىنداعى جاندى كوپىر ىسپەتتەس. سەبەبى اتالعان كەشتىڭ ماقساتى – ءبىزدىڭ قازاق داستۇرىندەگى قۇندىلىقتاردىڭ تاريحىمەن قوسا, كۇيدىڭ ءمان-ماعىناسىن حالىققا پاش ەتۋ. الداعى ۋاقىتتا دا ۇلى كۇيشىلەردىڭ ەسىمدەرىن اسقاقتاتىپ, ارتىنا قالعان مۇرالارىن قايتا جاڭعىرتاتىن ساپالى كونتسەرتتەر ءوز جالعاسىن تابادى دەگەن ويدامىز, – دەدى ب.اقتاەۆ.
كونتسەرتتە قۇرمانعازىنىڭ «قىزىل قايىڭ», «بالقايماق», «تەرىسقاقپاي», «ماشينا», «تورەمۇرات» سىندى مازمۇندى, اسەرلى, تەرەڭ ماعىنالى فيلوسوفيالىق كۇيى ورىندالدى. سونداي-اق كونتسەرتتىك باعدارلاماعا قازاق دالاسىن اسقاق تا جىگەرلى كۇيلەرىمەن تەربەگەن كۇيشى دينانىڭ «بايجۇما», «8 مارت», «جىگەر», «بۇلبۇل», «ناۋىسقى» تۋىندىلارى ەندى. كونتسەرتكە قاتىسقان سوليستەردىڭ قاتارىندا: نۇركەن ياقياەۆ, ارداق ەلەۋسىز, ايگۇل ەلشىباەۆا, زاڭعار مۋباراكوۆ, اياۋلىم قاماجان, ءادىل ءجۇنىسوۆ, قايرات كەرەەۆ بولدى.