پرەزيدەنت اكىمشىلىگى جەتەكشىسىنىڭ ورىنباسارى مالىك مۋرزالين حابار-24 ارناسىنا بەرگەن سۇحباتىندا قانداي ادامداردىڭ اكىم سايلاۋىنا مەملەكەتتىك قىزمەتتەگى ءوتىلىنسىز تۇسە الاتىنىن ءمالىم ەتتى, دەپ حابارلايدى Egemen.kz.
«تەك مەملەكەتتىك قىزمەتشىلەر عانا ەمەس, مەكتەپ ديرەكتورلارى, ونىڭ ورىنباسارلارى, ءتىپتى مۇعالىمدەر مەن فەلدشەرلەر ءوز سالاسىندا 6 جىلدان ارتىق ىستەسە, سايلاۋعا تۇسە الادى. فەرمەرلىك شارۋاشىلىق باسشىلارى تۋرالى دا وسىنى ايتۋعا بولادى. وكىنىشكە قاراي, ساراپشىلار قاۋىمداستىعى وسى ماسەلەنى ءسال دۇرىس تۇسىنبەي جاتىر. بىلىكتىلىك تالابىنىڭ 9 نۇسقاسى بار. كانديدات سول توعىز نۇسقانىڭ بىرىنە سايكەس كەلۋى كەرەك. ءيا, مەملەكەتتىك قىزمەت تۋرالى تالاپ بار. بىراق تاعى ءبىر تالاپ بويىنشا, مەملەكەتتىك قىزمەتتە ەڭبەك ءوتىلى بولماسا دا, اكىم بولا الاتىنى جازىلعان. عىلىمي دارەجەسى بار ادامدار مەملەكەتتىك قىزمەتتە ءوتىلى بولماسا دا, اكىم بولا الادى. پرەزيدەنتتىك جاستار كادر رەزەرۆىندە تۇرعان بالالارعا دا مۇمكىندىك قاراستىردىق», دەيدى پرەزيدەنت اكىمشىلىگى جەتەكشىسىنىڭ ورىنباسارى.
ەسكە سالساق, پرەزيدەنت قاسىم-جومارت توقاەۆ سايلاۋ تۋرالى كونستيتۋتسيالىق زاڭعا وزگەرتۋلەر مەن تولىقتىرۋلار ەنگىزۋدى كوزدەيتىن قۇجاتقا قول قويعان بولاتىن.