بۇگىندە جامبىل وڭىرىندە «جومارت تۇلەك» جوباسى باستالىپ, ءوز جەمىسىن بەرە باستادى. سونداي-اق اتالعان جوبا وبلىستىڭ ءاربىر اۋدانىندا دا جالعاسىن تابۋدا. مۇنداعى ماقسات – ءار سالادا جەتىستىككە جەتكەن تۇلەكتەردى جاس ۇرپاققا تانىستىرۋ, ۇلگى ەتۋ بولىپ وتىر.
اتالعان فورۋم تالاس اۋدانىنىڭ ورتالىعى قاراتاۋ قالاسىندا دا ۇيىمداستىرىلدى. ايتۋلى شاراعا تالاس توپىراعىنان شىققان ەلگە بەلگىلى بىرقاتار ازاماتتار قاتىستى. اۋدان اكىمى قاناتبەك مادىبەك ەل تانىعان تۇلعالاردىڭ اۋداننىڭ دامۋىنا قوسقان ۇلەسىنىڭ ەرەكشە ەكەنىن اتاپ ءوتتى. ال, بەلگىلى قالامگەر, وبلىستىق مەملەكەتتىك ءارحيۆىنىڭ ديرەكتورى كوسەمالى ءساتتىباي ۇلى تۋعان جەرىن كوركەيتۋگە قولداۋ كورسەتىپ جۇرگەن ازاماتتارعا ريزاشىلىعىن ءبىلدىرىپ, اۋدان باسشىسىنا قاراتاۋ قالاسىنىڭ قاق ورتاسىندا تالاي جىلدان بەرى قاراۋسىز تۇرعان عيماراتتاردىڭ ماسەلەسىن شەشىپ, حالىق كادەسىنە جاراتۋدى قولعا الساڭىز دەگەن تىلەگىن دە جەتكىزدى.
وسى ورايدا كاسىپكەر, تالاس اۋدانىنىڭ قۇرمەتتى ازاماتى دوسان رىمتاەۆ كوتەرىلگەن باستامانى قولدايتىنىن ايتىپ, جيىن بارىسىندا ءوزى باسقاراتىن سەرىكتەستىك مەنشىگىندەگى عيماراتتىڭ ءبىرى – بۇگىندە قاراۋسىز تۇرعان بۇرىنعى «قاراتاۋ» قوناقۇيىنىڭ عيماراتىن حالىقتىڭ يگىلىگىنە تەگىن تارتۋ ەتتى. ءتىپتى ونى جوندەۋ جۇمىستارىنا دا كومەكتەسەتىنىن ايتتى. كاسىپكەردىڭ ايتۋىنشا, ول اتالعان نىساندى جاقىندا عانا 60 ملن تەڭگەگە ساتپاي قويىپتى. ودان دا ەلدىڭ يگىلىگى ءۇشىن ونى تەگىن بەرۋدى ۇيعارعان ەكەن. «قولى اشىقتىڭ – جولى اشىق» دەيدى حالىق. د.رىمتاەۆتىڭ بۇل توسىن سىيىنا اۋدان تۇرعىندارى دا ريزاشىلىعىن بىلدىرۋدە. شىنىندا دا قاراتاۋ قالاسىنىڭ ورتالىعىنداعى بۇل عيمارات ءبىر كەزدە ءزاۋلىم قوناقۇي بولعان. كەيىن توقسانىنشى جىلدارداعى قيىن كەزەڭدە جەكەمەنشىككە ءوتىپ, قاراۋسىز قالعان. ال تاۋەلسىزدىك جىلدارى تالاس اۋدانىن باسقارعان تالاي باسشى بۇل عيماراتتى مەملەكەت مەنشىگىنە الا الماي كەتكەن بولاتىن. بىراق جۇرتشىلىقپەن جۇزدەسۋگە كەلگەن كاسىپكەر جومارتتىق تانىتىپ, ونى ەل يگىلىگى ءۇشىن تەگىن بەردى. الداعى ۋاقىتتا بۇرىنعى «قاراتاۋ» قوناقۇيىنىڭ عيماراتى كۇردەلى جوندەۋدەن وتكىزىلىپ, قالپىنا كەلتىرىلەتىن بولادى.