بەينەباقىلاۋ كامەرالارىن كوپتەپ ورناتۋدىڭ ارقاسىندا ەلىمىزدە سوڭعى 5 جىلدا پاتەر توناۋ قىلمىسى 67 پايىزعا كەمىگەن. ماسەلەن, 2016 جىلى 44 مىڭ پاتەر توناۋ دەرەگى تىركەلسە, بۇل سان بىلتىر 14 مىڭعا دەيىن ازايعان, دەپ حابارلايدى Egemen.kz.
ال بيىلعى ءتورت ايدا 4 مىڭنان استام پاتەر تونالعان ەكەن. وسى ۋاقىت ارالىعىندا قىلمىستىڭ بۇل ءتۇرى 30 پايىزعا تومەندەسە, پاتەر توناۋدى اشۋ كورسەتكىشى 13 پايىزعا جاقسارعان. بۇل جونىندە ونلاين رەجىمدە وتكەن بريفينگ بارىسىندا ءىىم كريمينالدىق پوليتسيا دەپارتامەنتى باسشىسىنىڭ ورىنباسارى قانات نۇرماعامبەتوۆ حابارلادى.
جاقىندا قوستاناي قالاسىندا بەس بىردەي پاتەردى ۇپتەپ كەتكەن ەكى ۇرى ۇستالدى. اككىلەر پاتەردىڭ پلاستيك تەرەزەلەرىن اشۋ ارقىلى ىشكە كىرىپ, ءۇي يەلەرىن جالپى سوماسى 1,5 ميلليون تەڭگەگە شىعىنعا باتىرىپ كەتكەن. پوليتسيا قىزمەتكەرلەرى بۇل ەكەۋدىڭ بۇرىن دا سوتتى بولعانىن انىقتاپ وتىر. ولار قولدى قىلعان قىمبات بۇيىمدار مەن اشەكەيلەردى لومباردتار ارقىلى ساتىپ جىبەرىپ, ايعاق زاتتاردان تەز قۇتىلۋدىڭ وڭاي جولىن تاۋىپ العان كورىنەدى.
ءىىم وكىلى پاتەر ۇرىلارىنىڭ جازادان جالتارىپ كەتۋدىڭ سان ايلاسىن «مەڭگەرىپ» العانىن اشىق ايتتى. كوبىنە جابىرلەنۋشىلەر مەن ۇرىلاردىڭ تاتۋلاسۋىنان كەيىن ءىستىڭ تىعىرىققا تىرەلىپ قالاتىنىن جەتكىزگەن ق.نۇرماعامبەتوۆ: «جاۋاپكەرشىلىكتەن جالتارۋ ءۇشىن ۇرىلار كوبىنەسە شىعىننىڭ ورنىن تولتىرىپ, جابىرلەنۋشىنىڭ ءتىلىن تاۋىپ الىپ جاتادى. وسىدان كەيىن ءىستىڭ دەنى سوتقا دەيىن جەتپەي, ورتا جولدا توقتاپ قالاتىن. سول سەبەپتى دە مينيسترلىك قىلمىستىق ءىس جۇرگىزۋ ءىس-شارالارىن جەتىلدىرۋدى قولعا الىپ, بىرقاتار ۇيىمداستىرۋشىلىق جانە زاڭنامالىق باستامانى ىسكە اسىرىپ كەلەدى. تاجىريبەدە ءجيى كەزدەسەتىن «جازادان جالتارۋ» ماسەلەسىن جان-جاقتى زەردەلەي كەلە, 2018 جانە 2019 جىلدارى قىلمىستىق كودەكسكە بىرقاتار وزگەرىس ەنگىزىلدى. وسى وزگەرىستەرگە سايكەس بىرنەشە رەت ۇرلىق جاساۋ جانە ءۇي-جايلارعا زاڭسىز كىرۋ ارقىلى توناۋ اۋىر قىلمىس تۇرىنە جاتقىزىلىپ, كىنالىلەردى جەكە مۇلكىن تاركىلەپ, 7 جىلعا دەيىن باس بوستاندىعىنان ايىرۋ جازاسى قاراستىرىلعان بولاتىن», دەدى.
كريمينالدىق پوليتسيا دەپارتامەنتىنىڭ باسشى قىزمەتكەرى بريفينگ بارىسىندا پاتەر توناۋعا قارسى ءىس-قيمىل جونىندەگى ۆەدومستۆولىق باعدارلامالاردىڭ ەلدەگى كريمينوگەندىك جاعدايعا وڭ ىقپال ەتكەنىن دە اتاپ ءوتتى. وسى باعدارلاما شەڭبەرىندە تۇرعىن ۇيلەردىڭ اۋلالارىندا 54 مىڭنان استام بەينەباقىلاۋ كامەراسى ورناتىلسا, 14 مىڭنان استام كامەرا تۇرعىنداردىڭ باستاماسىمەن جابدىقتالعان. سپيكەر تۇرعىن ۇيلەرگە باقىلاۋ كامەرالارىن ورناتىپ, ورتالىقتاندىرىلعان جۇيەگە قوسۋ جۇمىسىنىڭ ءالى دە جالعاسىپ جاتقانىن مالىمدەدى.
ال جاقىندا ەل كولەمىندە وتكەن ۇشكۇندىك «پاتەر» جەدەل الدىن الۋ وپەراتسياسى كەزىندە 300-گە جۋىق پاتەر ۇرىسى انىقتالىپ, قىلمىستىق جاۋاپكەرشىلىككە تارتىلعان. ونىڭ ىشىندە 22 قىلمىستىق توپ تا بار. سونداي-اق پاتەر توناعاندارى ءۇشىن بۇرىننان ىزدەۋدە جۇرگەن 8 قىلمىسكەر قولعا ءتۇسىپ, 67 كۇدىكتى ۇستالعان. كريمينالدىق جانە اكىمشىلىك پوليتسيا قىزمەتكەرلەرى جۇمىلدىرىلعان اۋقىمدى ءىس-شارا بارىسىندا ۇرلانعان م ۇلىكتى ساتىپ الاتىن, وتكىزەتىن ءبىر جارىم مىڭنان استام ساۋدا ورنى ءجىتى تەكسەرىلىپ, 240-قا جۋىق پاتەر ۇرلىعى اشىلعان.
قوعامدا وزەكتىلىگىن جويماي كەلە جاتقان پاتەر توناۋ قىلمىسى ەلدە جاسالاتىن بارلىق ۇرلىقتىڭ 10 پايىزىن قۇرايدى. وسىعان وراي, ۆەدومستۆو وكىلى ءسوزىنىڭ سوڭىندا ۇيدەن شىققاندا ەسىك-تەرەزە, بالكونداردى مۇقيات جاۋىپ كەتۋ, كىرەبەرىس ەسىككە كۇردەلى مەحانيزمدەرى بار, كەمىندە 2 تيەك قۇرىلعىسىن ورناتۋ سەكىلدى ۇرىلاردان ساقتانۋدىڭ قاراپايىم ەرەجەلەرىن ەسكە سالىپ ءوتتى. «زاماناۋي ەلەكتروندى قورعانىس قۇرالدارى – قوزعالىس داتچيكتەرى, دىبىستىق سيگناليزاتسيانى پايدالانۋ, ۇيدە باعالى زاتتار مەن اقشا, زەرگەرلىك بۇيىمداردى ارنايى سەيفتەردە ساقتاۋ دا – قىلمىسكەرلەردەن قورعانۋدىڭ ەڭ ءتيىمدى ادىستەرىنىڭ ءبىرى», دەدى ول.