تۇركىستان وبلىسىندا اۆتوبۋس جولاۋشىسىنان 300 دوزا گەروين تاركىلەندى, دەپ حابارلايدى Egemen.kz Polisia.kz سايتىنا سىلتەمە جاساپ.
قۇقىق قورعاۋ ورگاندارىنىڭ مالىمەتىنشە, تۇركىستان قالاسىندا اسا ءىرى كولەمدە گەروين تاسىمالداعان تۇرعىن ۇستالدى. ەسىرتكىنى زاڭسىز تاسىمالداۋ جانە ساقتاۋ تۋرالى اقپارات وبلىستىڭ پوليتسيا دەپارتامەنتى ەسىرتىكىنى زاڭسىز تاسىمالداۋ ءىس-قيمىل باسقارماسىنا كەلىپ تۇسكەن. ارىز بويىنشا بىردەن شۇعىل ءىس-قيمىلدار باستالعان.
ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى «شىمكەنت-سامارا» تاسجولىمەن قوزعالعان جولاۋشى اۆتوبۋستارىن تەكسەرۋگە كىرىسكەن. سونىڭ ناتيجەسىندە «الماتى-تۇركىستان» باعىتىندا كەلە جاتقان اۆتوبۋستاعى جولاۋشى ايەل كۇدىك تۋدىرعان. ءتىنتۋ كەزىندە ايەلدىڭ سومكەسىندە قاعازعا ورالىپ, پوليەتيلەن پاكەتىنە سالىنعان اق-سۇر ءتۇستى ەسىرتكىگە ۇقساس ۇنتاق تابىلدى.
ساراپتاما تاعايىندالىپ, ونىڭ قورىتىندىسى بويىنشا تاركىلەنگەن زاتتىڭ سالماعى 60 گراممعا جۋىق گەروين ەكەنى انىقتالدى. ياعني گەرويننىڭ سالماعى 300 دوزاعا تەڭ.
اتالعان فاكتى قر قك-ءنىڭ 297-بابىمەن (ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ) بويىنشا سوتقا دەيىنگى تەرگەۋ باستالدى.