بۇگىن حالىق قاھارمانى قاسىم قايسەنوۆتىڭ تۋعانىنا 103 جىل. وسى كۇنگە وراي جەرلەستەرى باتىردى ەسكە الىپ, ەسكەرتكىشىنە گۇل شوقتارىن قويدى. مۋزەيىنە كىرىپ, پارتيزان جازۋشىنىڭ پايدالانعان دۇنيەلەرىن قىزىقتادى, دەپ حابارلايدى Egemen.kz.
ايتا كەتەرلىگى, وسكەمەندەگى «جاستار» ساياباعىنا 2019 جىلى قاسىم قايسەنوۆتىڭ اتى بەرىلىپ, جەڭىس داڭعىلى بويىندا تۇرعان كەۋدە ءمۇسىنى ساياباقتىڭ ەتنواۋىلىنا اۋىستىرىلعان. ال 2020 جىلى ساۋلەت-ەتنوگرافيالىق جانە تابيعي-لاندشافتتىق مۋزەي-قورىعىندا «حالىق قاھارمانى قاسىم قايسەنوۆ جانە مايدانگەر جازۋشىلار» اتتى كورمە اشىلعان. الايدا پاندەمياعا بايلانىستى مۋزەيدىڭ اشىلۋىنا كوپ ەشكىم كەلە الماعان ەدى. بۇگىن دە ۇيىمداستىرۋشىلار بارىنشا سانيتارلىق تالاپتاردى ساقتاي وتىرىپ وتكىزدى.
مۋزەيدىڭ كىرەبەرىسىندە قاسىم قايسەنوۆتىڭ تۋعان جەرى – ۇلان اۋدانىنىڭ كورىكتى تابيعاتىنىڭ سۋرەتى ورنالاسىپتى. بولمەلەردىڭ ءبىرى پارتيزان-جازۋشىنىڭ اتا-اناسى تۇرعان ءۇيدىڭ ۇلگىسىمەن جابدىقتالىپتى. تورگى بولمەدە باتىردىڭ الماتىداعى ۇيىنەن جەتكىزىلگەن دۇنيەلەرى قويىلعان. تۇسىندا ءىلىۋلى تۇرعان كىلەمى, ابىلايحان مەن ءستاليننىڭ پورترەتتەرى, جۇمىس ۇستەلى وسىندا كوشىرىلىپتى. ۇستەلدىڭ ۇستىندە قولجازباسى دا جاتىر.
سونىمەن قاتار جازۋشى ءازىلحان نۇرشايىقوۆ پەن ەسەت اۋكەباەۆتىڭ دا بۇرىشى بار.