مەملەكەت باسشىسىنا ەلىمىزدەگى زاڭدىلىق پەن قۇقىق قورعاۋ سالاسىنىڭ احۋالى, پروكۋراتۋرا ورگاندارىنىڭ ءبىرىنشى جارتىجىلدىقتا اتقارعان جۇمىستارىنىڭ قورىتىندىلارى تۋرالى باياندالدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنتكە قىلمىستىق پروتسەستىڭ ءۇش بۋىندى مودەلىنە كوشۋدىڭ ءبىرىنشى كەزەڭىن ىسكە اسىرۋ ناتيجەلەرى تۋرالى اقپارات بەرىلدى.
عيزات نۇرداۋلەتوۆتىڭ ايتۋىنشا, سوتقا دەيىنگى تەرگەۋ ورگاندارى پروكۋرورلارمەن نەگىزگى شەشىمدەرىن كەلىسۋدىڭ ارقاسىندا ازاماتتاردىڭ كونستيتۋتسيالىق قۇقىقتارىن بۇزۋ 33 پايىزعا ازايعان.
مەملەكەت باسشىسىنا كاسىپكەرلەردى مەملەكەتتىك ورگانداردىڭ زاڭسىز ارەكەتتەرىنەن قورعاۋ, پروكۋرورلىق قاداعالاۋدى بيزنەستىڭ پروبلەمالارىن ءتيىمدى شەشۋگە قايتا باعدارلاۋ بويىنشا بەرىلگەن تاپسىرمالاردى ورىنداۋ جونىندە قابىلدانىپ جاتقان شارالار تۋرالى ايتىلدى. باس پروكۋروردىڭ سوزىنشە, جىل باسىنان بەرى 22 مىڭ كاسىپكەردىڭ قۇقىعى قورعالعان, 357 زاڭسىز تەكسەرۋ مەن مەملەكەتتىك ورگانداردىڭ 56 اكتىسى جويىلعان.
قاسىم-جومارت توقاەۆ قوعامنىڭ بارلىق سالاسىندا زاڭ ۇستەمدىگىن قامتاماسىز ەتۋدىڭ ماڭىزدىلىعىن اتاپ ءوتىپ, عيزات نۇرداۋلەتوۆكە بىرقاتار تاپسىرما بەردى.