وتكەن اپتادا ەلىمىزدە كوروناۆيرۋس ينفەكتسياسىن جۇقتىرعاندار سانىنىڭ ەڭ ۇلكەن ستاتيستيكاسى تىركەلدى. ءساۋىر باسىندا پاندەميا باستالعالى بولماعان ەڭ ۇلكەن كورسەتكىش 2000-نان استام ناۋقاس دەرتكە شالدىققانى ءمالىم بولدى. ال الەمدە جاپپاي ۆاكتسينالاۋ باستالسا دا, ءۇشىنشى تولقىن كورسەتكىشتەرى جاقسى ەمەس. ءساۋىردىڭ باسىندا ەۋروپادا پاسحا تويلانادى. بىلتىر روجدەستۆونى تويلاي الماعاندار, بيىل دا قاسيەتتى مەرەكەلەردىڭ ءبىرىن ۇيدە قارسى الدى.
جىل باسىندا مەكتەپتەر شەكتەۋلى ادام سانىمەن جۇمىس ىستەيتىنى حابارلانعان ەدى. الايدا فرانتسيا ۇكىمەتى ساۋىردە مەكتەپتەردى قايتا جابۋعا شەشىم قابىلدادى. سەنبىدە ۇكىمەت باسشىسى بارلىق مەكتەپ پەن ساۋدا ورىندارى, سونىمەن قاتار دۇكەندەر جۇمىسىن توقتاتاتىنىن مالىمدەدى. ۇيدەن سەبەپسىز ون شاقىرىمعا الىستاۋعا بولمايدى. وسىلايشا, فرانتسۋزدار قاسيەتتى پاسحانى ۇيلەرىندە اتاپ ءوتتى.
ەل پرەزيدەنتى ەممانۋەل ماكرون ينفەكتسيالىق اۋرۋحانالار سانى ءالى دە ارتاتىنىن حابارلادى. سوڭعى ستاتيستيكاعا زەر سالساق, فرانتسيانىڭ 46 677 ازاماتى ۆيرۋس جۇقتىرىپ, 304 ادام قايتىس بولعان. پرەزيدەنت قاتاڭ كارانتين جاريالاۋعا ماجبۇرلىك تۋىنداماس دەگەن سەنىمىن دە جاسىرمادى.
گەرمانيا پرەزيدەنتى شتەينمايەر حالىقتى ۆاكتسينا ەكتىرۋگە شاقىردى. سەنبى كۇنى حالىققا ارناعان جولداۋىندا ءۇشىنشى تولقىندا شەكتەۋلەر قاتاڭداتىلۋى مۇمكىن ەكەنىن ەسكەرتتى. ەڭ ماڭىزدىسى – ول ەلدەگى سەنىم دەڭگەيىنە قاتىستى ءوز ويىن ءبىلدىردى. ء«يا, سىناما كەزىندە قاتەلىكتەر كەتۋى مۇمكىن. دەگەنمەن, پاندەميادان قۇتىلۋ ءاپ-ساتتە ەمەس. سوندىقتان دا ساياسي ديسكۋسسيانىڭ سەبەبى بار. الايدا قۇر تالقىلاۋلار ەش ناتيجە بەرمەيدى. ول قاي دەڭگەيدە – جەرگىلىكتى نە مەملەكەتتىك, پارتيالىق نە كواليتسيالىق دەڭگەيدە بولسىن, نەگىزگى, شەشۋشى فاكتور ەمەستىگىن ەسكەرۋ كەرەك. ءبىز حالىققا باعىت بەرىپ, پراگماتيكالىق شەشىم ۇسىنۋىمىز كەرەك», دەدى مەملەكەت باسشىسى.
كانتسلەر مەركەل ءساۋىردىڭ باسىندا مەرەكەگە وراي كارانتين جاريالانادى دەگەنىمەن, رەسمي حابار بولمادى.
ءۇشىنشى تولقىندى كارانتينمەن باستاعان تاعى ءبىر ەۋروپا ەلى – يتاليا. مەملەكەت تۇتاستاي «قىزىل ايماقتا». دەنساۋلىق ساقتاۋ ۇيىمدارى كۇنىنە 20 مىڭنان استام ادامنان ۆيرۋس تابىلاتىنىن مالىمدەدى.
ريم پاپاسى فرانتسيسك بيىلعى پاسحا مەرەكەسىمەن قۇتتىقتاۋىن بوس شىركەۋدەن جولدادى. جىل سايىن ءجۇز مىڭداعان حالىق جينالاتىن اۋليە پەتر شىركەۋى وسى جىلى تەك 200 ادام عانا قابىلداۋعا رۇقسات الدى. شىركەۋدەگى مەرەكەلىك قىزمەت ونلاين ترانسلياتسيا ارقىلى كورسەتىلدى. ريم پاپاسى جولداۋىندا كارانتين تالاپتارىن ساقتاپ, مەملەكەت باسشىلارىن ىندەتكە قارسى ۆاكتسينا ساياساتىن جولعا قويىپ, رەتتەۋىن سۇرادى. بيىلعى قۇتتىقتاۋدا ساياسي ماسەلە دە شەت قالمادى. ريم پاپاسى مىناداي ەلەڭ-الاڭ كەزدە اسكەري قارۋ-جاراق پەن شيەلەنىستەرگە اقشا جۇمساۋدىڭ قيسىنسىز ەكەنىن اتاپ ءوتتى. ودان كەيىن جەكسەنبىدە جىل سايىنعى ءداستۇرلى جولداۋىندا الەمدەگى داعدارىستىڭ ءورشىپ جاتقانىن ايتا كەلە, دەنساۋلىققا بەي-جاي قاراماۋ كەرەگىن ەسكە سالدى.
ەۋروپاداعى جاعدايدى دسۇ سىنعا الدى. حالىقارالىق ۇيىم ەۋروپا ۆاكتسينا ماسەلەسىنە نەمقۇرايدى قاراپ, جاعدايدى ۋشىقتىرىپ الدى دەگەن كىنا تاعادى. دسۇ-نىڭ ەۋروپا بويىنشا ديرەكتورى حانس كليۋگ «بۇل پاندەميادان قۇتقارار جالعىز جول – ۆاكتسينا. دەگەنمەن, ۆاكتسينالاۋ قارقىنى تىم تومەن. ۇكىمەتتەر بۇعان جاۋاپكەرشىلىكپەن قاراپ, ازاماتتارعا ونىڭ ماڭىزىن ءتۇسىندىرۋى كەرەك. ءبىزدىڭ قولىمىزداعى ستاتيستيكاعا قاراساق, اۋماقتاعى 900 ملن ادامنىڭ تەك 10 پايىزى عانا ۆاكتسينانىڭ العاشقى دوزاسىن سالدىرعان», دەدى.
ال اقش كەشە 4 ملن-نان استام ازاماتىنىڭ ۆاكتسينا سالدىرعانىن حابارلادى. وسىلايشا, ۆاكتسينا سالدىرۋ دەرەگى بويىنشا رەكورد جاڭارتىلعان. بۇل تۋرالى اقۇيدىڭ Covid-19 اقپاراتىنا جاۋاپتى دوكتور سايرۋس شافار الەۋمەتتىك جەلىدە جازدى. اقش ۇكىمەتى بۇعان دەيىن كۇنىنە 3 ملن ادامعا ۆاكتسينا سالىپ كەلگەن. «ەگەر ادامدار ماسكا تاعىپ, بىرنەشە ادام بولىپ جينالۋدى دوعارسا, سونىمەن قاتار ۆاكتسينا سالۋدى مىندەتتى شارا دەپ قابىلداسا, اقش بۇل پاندەميادان تەزىرەك قۇتىلادى», دەدى پرەزيدەنت بايدەننىڭ پاندەميا بويىنشا كەڭەسشىسى دوكتور ەنتوني فاۋچي.