بالقاش كولى ارال تاعدىرىن قايتالامايدى – ەكولوگيا مينيسترلىگى

ۆيتسە-ءمينيستردىڭ ايتۋىنشا, ونداعى مالىمەتتەر شىندىققا جاناسپايدى.

«سوڭعى ون جىلدا كول دەڭگەيى بالتىق جۇيەسى بويىنشا 341 م بەلگىسىنەن تومەن تۇسپەگەنىن اتاپ وتكەن ءجون. عالىمدار كوپ جىلعى باقىلاۋلار مەن زەرتتەۋلەرگە سۇيەنە وتىرىپ, بالقاش كولىنىڭ تولىققاندى سۋ وبەكتىسى رەتىندە ءومىر ءسۇرۋىنىڭ وڭتايلى دەڭگەيى بج بويىنشا 341 م بەلگىسى دەپ پايىمدايدى» دەدى سەرىك قوجانيازوۆ.

ونىڭ ايتۋىنشا, جىل سايىن بالقاشقا 12 تەكشە مەتر سۋ قۇيىلسا, كولدىڭ تۇراقتى دەڭگەيدە ساقتالۋىنا كەپىلدىك بەرىلەدى. سونىمەن بىرگە, دوبىن شەكارا بەكەتىندەگى گيدرولوگيالىق دەرەكتەردى تالداۋ ىلە وزەنىنىڭ ورتاشا ۇزاق مەرزىمدى اعىنى 2001 جىلدان 2020 جىلعا دەيىن 13,8 تەكشە مەتردى قۇرايتىنىن كورسەتتى.

«وسىلايشا, بۇگىنگى تاڭدا ارال تاعدىرىنىڭ قايتالانۋى بالقاش كولىنە قاۋىپ ءتونىپ تۇرعان جوق», دەپ اتاپ ءوتتى ۆيتسە-مينيستر.

ەكولوگيا مينيسترلىگى باسشىسىنىڭ ورىنباسارى قىتاي حالىق رەسپۋبليكاسىمەن سۋ ءبولۋ جونىندەگى كەلىسسوزدەر پروتسەسىندە قازاقستاندىق تاراپتىڭ ۇستانىمى ىلە وزەنىنىڭ اعىنىن كەمىندە 12 تەكشە مەتر كولەمىندە ۇستاپ تۇرۋ ەكەنىن مالىمدەدى.

ء«بىزدىڭ ەلىمىزدىڭ ۇستانىمى سۋ ءبولۋ كەزىندە ەكوجۇيەنىڭ مۇددەلەرىن ەسكەرۋ. وسىعان بايلانىستى, قازاقستان تاراپى بالقاش كولىن ىلە وزەنىنىڭ نەگىزگى سۋ تۇتىنۋشىلارىنىڭ ءبىرى رەتىندە كورسەتەدى. ءبىز بالقاش كولى وزەن اعىسىنىڭ كولەمىنە بايلانىستى ەكەنىن ايتۋدان جالىقپايمىز», دەدى سەرىك قوجانيازوۆ.

سونىمەن قاتار, ۆيتسە-مينيستر قىتاي تاراپى دا ءوزىنىڭ شەكاراسىنا جاقىن اۋماقتا ەكولوگيالىق اپاتتىڭ ورىن الۋىن قالامايدى دەگەن بولجام ايتتى.

«بۇعان 2019 جىلدىڭ قازان ايىندا بەيجىڭدە وتكەن بىرلەسكەن كوميسسيانىڭ 17-ءشى وتىرىسىندا قىتاي تاراپى ترانسشەكارالىق وزەندەردى سۋ ءبولۋ تۋرالى كەلىسىم جوباسىن تالقىلاۋ كەزىندە تاراپتاردىڭ ەكوجۇيەلەرىن دامىتۋ مەن ساقتاۋ مۇددەلەرىن ەسكەرۋگە كەلىسكەندىگى دالەل. بۇل بالقاش كولىنىڭ ەكولوگيالىق جاعدايى ءۇشىن وتە ماڭىزدى», دەپ حابارلادى سەرىك قوجانيازوۆ.