ەلوردادا كارانتيندىك شەكتەۋلەردى قاتايتۋ تۋرالى جاڭا قاۋلىعا قالانىڭ باس مەملەكەتتىك سانيتارلىق دارىگەرى سارحات بەيسەنوۆا قول قويدى. قوعامدىق تاماقتانۋ وبەكتىلەرىنە دەمالىس كۇندەرى جۇمىس ىستەۋىنە تىيىم سالىنادى, دەپ حابارلايدى نۇر-سۇلتان اكىمدىگىنىڭ رەسمي سايتى.
قول قويىلعان قۇجاتقا سايكەس ەلوردانىڭ مەيرامحانالارى, كافەلەرى, بارلارى جانە اسحانالارى جۇمىس كۇندەرى تاڭعى 7-دەن كەشكى 22-گە دەيىن جۇمىس ىستەي الادى. دەمالىس كۇندەرى كەلۋشىلەردى قابىلداۋعا تىيىم سالىنادى.
«قوعامدىق تاماقتانۋ وبەكتىلەرىنىڭ جۇمىسىن (مەيرامحانالار, ءدامحانالار, بارلار, اسحانالار) ورنالاسقان جەرىنە قاراماستان, عيماراتتاردىڭ ىشىندە تولتىرىلۋى 50%-عا دەيىن, بىراق 30 ورىننان اسپايتىن شارتتاردى ساقتاعان جاعدايدا, ءبىر ۇستەلدە 4-6 ادامنان اسپايتىن وتىرۋ مەن كورشى ۇستەلدەردىڭ شەتكى ورىندارى اراسىندا كەمىندە 2 مەتر الەۋمەتتىك قاشىقتىقتى ساقتاي وتىرىپ, كۇشەيتىلگەن سانيتاريالىق-ەپيدەمياعا قارسى, سانيتاريالىق-پروفيلاكتيكالىق ءىس-شارالاردى ساقتاي وتىرىپ, تاماقتى جەتكىزۋ جانە شىعارۋ قىزمەتىن قوسپاعاندا جۇمىس كۇندەرى جۇمىس كەستەسىن ساعات 7:00-دەن 22:00-گە دەيىن جانە دەمالىس كۇندەرى جۇمىسىنا تىيىم سالۋمەن ۇيىمداستىرۋ», دەلىنگەن ەلوردانىڭ سانيتارلىق دارىگەرىنىڭ قاۋلىسىندا.
بۇل رەتتە ۇجىمدىق, سالتاناتتى, وتباسىلىق, ەستەلىك (بانكەتتەر, ۇيلەنۋ تويلارى, مەرەيتويلار, ەسكە الۋ), مەرەكەلىك كورپوراتيۆتەر مەن باسقا دا بۇقارالىق ءىس-شارالاردى ۇيىمداستىرۋعا جانە وتكىزۋگە قاتاڭ تىيىم سالىنادى.
جاڭا قاۋلى 2021 جىلعى 30 ناۋرىزدا كۇشىنە ەنەدى.
ەستەرىڭىزگە سالا كەتەيىك, نۇر-سۇلتان 10 ناۋرىزدان باستاپ ەپيدەميولوگيالىق احۋالدى باعالاۋ ماتريتساسى بويىنشا «قىزىل ايماقتا» ورنالاسقان. كۇن سايىن قالادا كوروناۆيرۋستىق ينفەكتسيانىڭ 300-دەن استام جاڭا جاعدايى انىقتالادى. ەلوردا تۇرعىندارى مەن قوناقتارىنان كۆي اۋرۋىنىڭ وسۋىنە جول بەرمەۋ ءۇشىن سانيتارلىق نورمالار مەن كارانتيندىك رەجيم تالاپتارىن قاتاڭ ساقتاۋ تالاپ ەتىلەدى.