اۋدان بيۋدجەتىن ارتتىردى

بيىل وڭىردەگى وسىمدىك, مال, استىق شارۋاشىلىعىمەن اينالىساتىن قۇرى­لىم­­داردى قولداۋعا تاعى دا 9 ملرد تەڭگەدەن استام قارجى قاراستىرىلدى. «وب­لىستاعى اۋىل شارۋاشىلىعى قۇرى­لىم­دارىن مال ازىعىنا بەرىلەتىن سۋبسيديامەن تولىق قامتاماسىز ەتۋ ءۇشىن جەرگىلىكتى بيۋدجەتتەن 4,4 ملرد تەڭگە قوسىمشا قارجى ءبولۋىن سۇراپ وتىرمىز. ونىڭ ىشىندە وتكەن جىلدان اۋىسىپ قالعان 1,1 ملرد تەڭگە اۋىل شارۋاشىلىعى قۇرىلىمدارى الدىنداعى بەرەشەكتى جابۋعا جۇمسالادى. ەندى ءىرى قارا, جىلقى, قوي, تۇيە شارۋاشىلىعىن دامىتۋ ءۇشىن قوسىمشا 3,3 ملرد تەڭگە قاجەت», دەيدى وبلىستىق اۋىل شارۋاشىلىعى باسقارماسىنىڭ باسشىسى ق.سارسەمباەۆ.

بۇل 2019 جىلدىڭ سوڭىندا بەكى­تىل­گەن «اقتوبە وبلىسىن دامىتۋدىڭ پەرسپەكتيۆالارى» ستراتەگيالىق جوباسى نەگىزىندە قولعا الىنعان 217 ينۆەس­تيتسيالىق جوبانىڭ العاشقى ناتي­جە­لەرى دەۋگە بولادى. ستراتەگيالىق جوس­پار نەگىزىندە اقتوبە وبلىسىنىڭ 12 اۋدانىندا مال شارۋاشىلىعىن دامىتۋ, شاعىن كاسىپكەرلىك نىساندارىن كوبەيتۋ مىندەتتەرى ناقتىلانعان بولاتىن. ناتيجەسىندە ءبىر جارىم جىل ىشىندە وڭىردەگى ءىرى قارا مەن ۇساق مال سانى ءۇش ەسەگە, سۋارمالى ەگىس القابى بەس ەسەگە ۇلعايتىلدى. تۇرعىنداردى ساپالى ازىق-ت ۇلىكپەن قامتاماسىز ەتۋ ءۇشىن ءار اۋداندا ءىرى تاۋارلى جانە دەربەس فەرمەرلىك شارۋا قوجالىقتارى قۇرىلدى. شارۋاشىلىقتاردىڭ بىرىزدىلەنۋىنە مەملەكەتتىك باعدارلامالار ارقىلى ارزان نەسيەلەندىرۋ ساياساتىنىڭ ءتيىمدى تۇردە جۇرگىزىلۋى دە سەبەپ بولدى. وتكەن جىلى اقتوبە وبلىسىنىڭ اۋىلشارۋاشىلىق قۇرىلىمدارى 202,5 ملرد تەڭگەنىڭ ءونىمىن ءوندىردى. مال باسىن كوبەيتىپ, استىق پەن بيداي ءوسىرىپ, باۋ-باقشامەن اينالىساتىن شارۋاشىلىقتار سانىنىڭ ارتۋى جاعىنان مۇعالجار, حرومتاۋ, مارتوك, قارعالى اۋداندارى الدا تۇر. ماسەلەن, 2020 جىلدىڭ قورىتىندىسى بويىنشا مارتوك اۋداندىق بيۋدجەتىنىڭ كىرىس بولىگى 1 ملرد تەڭگەگە ۇلعايعان. بۇل 13 اۋىلدىق وكرۋگى, 30 مىڭنان استام تۇرعىنى بار اۋدان ءۇشىن وتە جاقسى كورسەتكىش.

اۋدان ەكونوميكاسىنىڭ شىرايىن كەل­تىرگەن مارتوك اۋدانىنداعى سارجان­ساي ەلدى مەكەنىنىڭ جانىندا ورنالاسقان «ايس» تاۋارلى ءسۇت فەرماسى. ءسۇت فەرماسى 2010 جىلى «قازاگروفينانس» اق قول­داۋىمەن ۇدەمەلى يندۋستريالىق دامۋ باعدارلاماسى اياسىندا قۇرىلىپ, العاشقى جىلدارى جىلىنا 7 200 توننا ءسۇت ءوندىرىپ, ساتىلىمعا شىعارىپ ءجۇردى.

قازىر «ايس» جشس ءسۇت ونىمدەرىن وبلىس ورتالىعىنا عانا ەمەس, ەلىمىزدىڭ باسقا وڭىرلەرىنە, سونىڭ ىشىندە رەسەيدىڭ ورىنبور وبلىسىنا دا شىعارا باستادى. ورىنبور وبلىسىنىڭ اقبۇلاق, قۋاندىق اۋدانىنىڭ تۇرعىندارى «ايس» جشس ونىمدەرىن كەڭىنەن تۇتىنادى. اقتوبە قالاسىنىڭ سۋپەرماركەتتەرىن ايران, قايماق, سارى ماي, سۇزبە, ىرىمشىك سياقتى تابيعي تازا ونىممەن قامتاماسىز ەتكەن وسى كاسىپورىن جەرگىلىكتى نارىقتاعى رەسەي, بەلارۋس ءسۇت ونىمدەرىنە باسەكە­لەس­كە اينالدى.

بيىلعى قاڭتار ايىندا وسى سەرىك­تەس­تىك باسشىلىعى مارتوك اۋدانى تاڭىربەرگەن اۋىلدىق وكرۋگىنىڭ ورتالىعى سارجانساي ەلدى مەكەنىنىڭ جانىنداعى 16 گەكتار اۋماققا ءىرى قارا, سونىڭ ىشىندە ساۋىن سيىرلار ۇستايتىن كەشەن قۇرىلىسىن باستادى. زاماناۋي ۇلگىدەگى بارلىق قوندىرعىلارمەن جابدىقتالاتىن جاڭا ءسۇت فەرماسىنىڭ قۇرىلىسى 68 ملن تەڭگەگە باعالانىپ, جوبا «بيزنەستىڭ جول كارتاسى-2025» مەملەكەتتىك باعدارلاماسى اياسىندا قارجىلاندىرىلدى. ەندى 4-5 اي ىشىندە ءسۇتتى سيىرلار ءۇشىن ارنايى ساۋىن ورنىمەن جابدىقتالعان كەشەن قۇرىلىسىن اياقتاۋ جوسپارلاندى. ساۋىن سيىرلاردى قۇنارلى جەمشوپپەن قامتاماسىز ەتۋ ءۇشىن مارتوك اۋدانىندا سۋارمالى شارۋاشىلىق كولەمى ۇلعايتىلىپ, ءسۇتتى سيىرلاردىڭ ازىعى – جوڭىشقا مەن جۇگەرى ءوسىرىلىپ كەلەدى.

«ايس» جشس ديرەكتورى دانيار وتارباەۆتىڭ ايتۋىنشا, جازدا كەشەن قۇرىلىسى اياقتالعان سوڭ اسىلتۇقىمدى ءسۇتتى سيىرلار اكەلىنەدى. جوسپار بويىنشا ەرەكشە كۇتىمدەگى ءبىر سيىر جىلىنا 9 800 ليتر ءسۇت بەرەدى. وسى شارۋاشىلىقتا ەڭبەك ونىمدىلىگى ارتسا, سارجانساي اۋى­لىندا جاڭادان 250 جۇمىس ورنى قۇ­رى­لا­دى دەپ كۇتىلۋدە.

اقتوبە وبلىسىنىڭ 600-دەن استام شاعىن جانە ورتا كاسىپكەرلىك نىساندارى «بيزنەستىڭ جول كارتاسى-2025» مەملەكەتتىك باعدارلاماسى ارقىلى نەسيە­لەندىرىلدى. ءوز كاسىبىن باستاعان كاسىپ­كەرلەردى قولداۋ اياسى دا جىلما-جىل ارتىپ كەلەدى. ماسەلەن, وڭىردەگى شوب نىساندارىنا 2019 جىلى 2,4 ملرد تەڭگە بولىنسە, 2020 جىلى ونىڭ سانى 3,1 ملرد تەڭگەگە ۇلعايعان. اۋىل شارۋاشىلىعى قۇرىلىمدارىن جان-جاقتى قولداۋ مەملەكەتتىك باعدار­لا­ما­لاردىڭ كومەگىمەن ءتيىمدى ىسكە اسىپ كە­لەدى. ەرىنبەگەن ادامعا اۋىلدا دا جۇ­مىس كوپ.

اقتوبە وبلىسى