استانا مەن پاۆلوداردىڭ اراسىندا №802/801 جۇردەك پويىزى جۇيتكيتىن بولدى
بۇعان دەيىن وسى ەكى ارالىققا جۇردەك پويىزدار جۇرگىزۋدىڭ ماسەلەسى بىرنەشە جىلدارعا سوزىلعانى بەلگىلى. بۇل پويىزدى انە جۇرگىزەمىز, مىنە جۇرگىزەمىز دەگەن سول كەزدەردەگى وبلىس اكىمدەرى دە, تەمىر جول باسشىلارى دا اۋىسىپ ۇلگەردى. مۇمكىن, كىم بىلەدى, ءبىر سەبەپتەرى دە بولعان شىعار.
وبلىس اكىمى باقىتجان ساعىنتاەۆ پەن “قازاقستان تەمىر جولى” ۇلتتىق كومپانياسىنىڭ پرەزيدەنتى اسقار ماميندەر وسىنداي ءتۇيىندى ماسەلەنى شەشۋگە كەلگەندە ۋادە ۇدەسىنەن شىقتى. وبلىس اكىمدىگى مەن ۇلتتىق كومپانيا اراسىنداعى ەكى جاقتى مەموراندۋم دا ءوز شارتتارىن ورىندادى دەگەن ءسوز. ءسويتىپ, تۇڭعىش جۇردەك پويىز جولعا شىقتى. ىشكى قۇرىلىمىن ايتپاعاننىڭ وزىندە, سىرتقى كورىنىسى كوز تارتارلىقتاي سۋ جاڭا پويىز ۆاگوندارى جولاۋشىلار ءۇشىن تاڭقالارلىقتاي اسەر قالدىرۋدا. تەلەديداردان كورەتىن جاڭا زاماننىڭ جۇردەك پويىزدارىنا ەندى وزدەرى جايعاسىپ استاناعا باراتىندارىنا جولاۋشىلار دا قۋانىشتى. جۇردەك پويىزدىڭ ۆاگوندارى رەسەي ەلىنەن ساتىپ الىنىپتى. پويىزدار ازىرشە اپتاسىنا ەكى رەت جۇرەدى. استانادان جۇما, جەكسەنبى كۇندەرى جولعا شىعادى. بۇرىنعىداي تاڭ اتقانشا ءجۇرىپ بارماي, جاڭا پويىز ەندى ەكى ارالىقتى 6 ساعات 29 ءمينوت ۋاقىتتا ءجۇرىپ وتەدى.
شاپشاڭدىق ساعاتىنا 130 شاقىرىم بولادى. بيلەت قۇنى دا قىمبات ەمەس – 1500 تەڭگەنىڭ ار-جاق بەر-جاعىندا الا الاسىز. الداعى كۇندەرى استاناعا قاراي الىپ-ۇشىپ باراتىن جۇردەك پويىزدىڭ ءجۇرۋ كەستەسى انىقتالىپ, جولاۋشىلار تالابى زەرتتەلىپ, ناقتىلانادى. سارىارقانىڭ كەڭ دالاسىن باسىپ وتەتىن جۇردەك پويىزدىڭ ۇردىسىنەن قالماۋعا اسىققان, استاناعا جىلدام جەتۋگە جولعا شىققان كەرەكۋلىك جولاۋشىلار دا كوپ.
ءساتتى ساپار بولسىن!
فاريدا بىقاي.
پاۆلودار.