الماتى قالاسىنداعى مەكتەپتە اتىس ۇيىمداستىرعان ايىپتى قامالدى. بۇل تۋرالى Tengrinews.kz ءتىلشىسى حابارلادى.
مەكتەپ ديرەكتورىنىڭ كابينەتىندە بۇرىنعى ەرلى-زايىپتىلار ءبىر-بىرىمەن جانجالداسىپ, سوڭى تاپانشادان وق اتۋعا اكەلىپ سوقتى. وسى كەلەڭسىزدىكتەن ەكى ادام زارداپ شەككەن.
الماتى قالالىق سوتى ءباسپاسوز قىزمەتىنىڭ دەرەگىنە جۇگىنسەك, بابازوۆ ەسىمدى ازامات مەكتەپتە اتىس جاساعانى ءۇشىن سوت قاۋلىسىمەن تۇتقىندالعان. «اۋەزوۆ اۋداندىق سوتى بابازوۆتى ۋاقىتشا قاماۋ اباقتىسىنا وتىرعىزۋ تۋرالى قىلمىستىق ءىس قارادى. جالپى, مەكتەپتە بولعان اتىس كەزىندە مەنىڭ نەمەرە باۋىرىم قۇربانوۆتىڭ باسىنا وق ءتيىپ, باسسۇيەگىنە زاقىم كەلدى. سونداي-اق مەنىڭ ادۆوكاتىم سماعۇلوۆتى بابازوۆ سوققىعا جىقتى», - دەيدى كىنالىنىڭ بۇرىنعى جۇبايى ماينۇرا تاگيروۆا.
مەكتەپتە وق اتقان ايىپتىنىڭ 12 جاسار قىزدىڭ اكەسى ەكەنى ءمالىم بولدى. ول بۇرىنعى ايەلىمەن ءبىلىم ورداسىنىڭ باسشىسى كوزىنشە ۇرىسقان. م. تاگيروۆا قىزى مەن كۇيەۋىنىڭ اراسىنداعى تۇسىنبەۋشىلىككە بايلانىستى جازىلعان ارىزعا وراي مەكتەپكە شاقىرىلعاندارىن ايتادى. بىراق, سول جەردە ولار ءبىر-بىرىمەن تۇسىنىسە الماعان. ىزالانعان ەركەك قالتاسىنان تراۆماتيكالىق تاپانشا شىعارىپ, وڭ مەن سولعا اتىپتى...
باقىتبەك كەنەش ۇلى.
دەرەككوز: Tengrinews.kz
فوتو: Munara.kz