مەلبۋرندا ءوتىپ جاتقان تەننيستەن اۋستراليا اشىق چەمپيوناتى ەندى قىزعاندا, وكىنىشكە قاراي, قازاقستاندىق سپورتشىلار جارىس جولىنان شىعىپ قالدى.
دەسە دە جەرلەستەرىمىز «ۇلكەن دۋلىعا» ساناتىنداعى جىلدىڭ ەڭ العاشقى تۋرنيرىندە ۇزدىكتەر ساناتىنان كورىنبەسە دە, ءبىرشاما ماتەريالدىق جاعدايىن تۇزەپ الدى. ماسەلەن, ەلىمىزدىڭ ءبىرىنشى راكەتكاسى ەلەنا رىباكينا جارىستىڭ ەكىنشى اينالىمىنا جەتكەنى ءۇشىن 130,7 مىڭ اقش دوللارى كولەمىندە سىياقى الدى. الايدا ول بىلتىرعى جەتىستىگىن قايتالاي الماعاندىقتان, الەمدىك رەيتينگتە 1-2-ورىنعا تومەن سىرعۋى مۇمكىن. 2020 جىلى رىباكينا 1/16 فينالعا دەيىن جەتكەن بولاتىن. ال بيىلعى Australian Open باسەكەنىڭ ءۇشىنشى كەزەڭىنە دەيىن جەتىپ, بىلتىرعى جەتىستىگىن قايتالاعان يۋليا پۋتينتسەۆا مەن زارينا دياس 178,9 مىڭ دوللار تابىس تاپتى. ءبىرىنشى كەزەڭنەن ارىگە اسا الماعان ياروسلاۆا شۆەدوۆا 91,8 مىڭ دوللاردى قاناعات تۇتتى.
ەرلەر اراسىندا ەلىمىزدىڭ ۇزدىك تەننيسشىسى الەكساندر بۋبليك جەكەلەي سىندا ەكىنشى, جۇپتىق سىندا ءۇشىنشى كەزەڭگە دەيىن جەتىپ, الەمدىك رەيتينگتەگى 45-ورنىن ساقتاپ قالدى. وسى جەتىستىگىنىڭ ارقاسىندا ول قالتاسىن 144,4 مىڭ دوللارعا قالىڭداتتى. ميحايل كۋكۋشكين ەكىنشى كەزەڭگە دەيىن جەتىپ – 95,3, تەك جۇپتىق سىندا ونەر كورسەتكەن اندرەي گولۋبەۆ بۋبليكپەن بىرگە ءۇشىنشى كەزەڭگە شىققانى ءۇشىن 25,2 مىڭ دوللار ولجالادى.