وليمپيا الاۋى رەسەيدىڭ اۆتوكولىك وندىرۋمەن تانىمالى تولياتتي قالاسىنان ساماراعا جىبەرىلدى. بۇل تۋرالى يتار-تاسس حابارلادى.
تولياتتي سامارا وبلىسىنداعى وليمپيا الاۋىن قابىلداعان ەكىنشى قالا بولىپ وتىر. مۇنداعى 26 شاقىرىمعا سوزىلعان قاشىقتىقتا وليمپيا الاۋىن 130 ادام الىپ ءجۇردى. قالىڭ جاۋعان قارعا قاراماستان مىڭداعان قالا تۇرعىنى كوشەگە شىعىپ ەستافەتانى تاماشالادى. ءبىرىنشى بولىپ وليمپيا الاۋىن الىپ ءجۇرۋ مارتەبەسى شاڭعى جارىسى بويىنشا بۇرىنعى الەم جانە ەۋروپا چەمپيونى اناتولي يۆانوۆقا بۇيىردى. ول الاۋدى بوستاندىق الاڭىنان قالا اكىمشىلىگى عيماراتىنا دەيىن الىپ كەلدى.
تولياتتيدەگى وليمپيا الاۋىنىڭ ەستافەتاسى ەكى كەزەڭگە ءبولىندى. وعان قاتىسۋشىلاردىڭ ءبىرى دانيل يۆانوۆ الاۋدى موتوتسيكلىنە قىستىرىپ, اناتولي ستەپانوۆ اتىنداعى سپورتتىق-تەحنيكالىق كەشەنى ىشىندە مۇزدىڭ ۇستىمەن الىپ ءجۇردى.
تولياتتيدەگى وليمپيا توستاعانىن «لادا-ارەنا» مۇز الاڭىندا قالا باسشىسى سەرگەي اندرەەۆ پەن سپورتتىق گيمناستيكادان ءتورت دۇركىن وليمپيادا چەمپيونى الەكسەي نەموۆ جاقتى. شامامەن التى ساعاتقا سوزىلعان سپورتتىق شارانىڭ تولياتتيدەگى كەزەڭى وسىلايشا اياقتالدى. وبلىستىڭ مىڭداعان تۇرعىنى تاريحي وقيعانىڭ كۋاگەرى بولدى.
ايدار ورىسباەۆ.
دەرەككوز:Itar-tass.com
فوتو: Blogspot.com