الماتى وبلىسىنىڭ تالعار قالاسىندا ورنالاسقان «الاتاۋ» شاڭعى-بياتلون كەشەنىندە شاڭعى جارىسى بويىنشا شىعىس ەۋروپا كۋبوگىنىڭ VI كەزەڭى ءوز مارەسىنە جەتتى. تاۋەلسىزدىكتىڭ 30 جىلدىعىنا تۇسپا-تۇس كەلگەن حالىقارالىق شاڭعى جارىسى كلاسسيكالىق ستيلدەگى سپرينت, كلاسسيكالىق ستيلدەگى جەكە جارىس جانە ەركىن ستيلدەگى ماسس-ستارت بويىنشا ۇيىمداستىرىلدى.
ەلىمىزدە وتكەن بايراقتى دوداعا قازاقستان سپورتشىلارىنان بولەك, رەسەي, قىرعىزستان جانە ماروككودان كەلگەن 70-تەن استام سپورتشى قاتىستى.
جىل سايىن ءداستۇرلى تۇردە ۇيىمداستىرىلاتىن شىعىس ەۋروپا كۋبوگى جارىسى حالىقارالىق شاڭعى فەدەراتسياسىنىڭ قولداۋىمەن 7 كەزەڭ بويى وتەدى. اتالعان تۋرنيردە قازاقستان, بەلارۋس, رەسەي جانە ۋكراينا سەكىلدى ەلدەردىڭ سپورتشىلارىنا حالىقارالىق رەيتينگتە ۇپاي يەلەنىپ قانا قويماي, الەم كۋبوگىنا قوسىمشا جولداماعا يە بولادى. ال وزگە ەلدىڭ سپورتشىلارى بۇل جارىستارعا جالپى رەيتينگ ۇپاي جيناۋ ءۇشىن قاتىسادى. شىعىس ەۋروپا كۋبوگىن قازاقستان وسىمەن ەكىنشى رەت قابىلداپ وتىر. بۇعان دەيىن 2019 جىلدىڭ قاراشا ايىندا وسى بەدەلدى جارىس ششۋچينسك قالاسىنداعى ۇلتتىق شاڭعى سپورتى ورتالىعىندا وتكىزىلگەن بولاتىن.
تالعار قالاسى قابىلداعان بيىلعى جارىستىڭ العاشقى كۇنىندە سپورتشىلار كلاسسيكالىق ستيلدەگى سپرينت بويىنشا سىنعا ءتۇستى. ايەلدەر اراسىندا وتكەن جارىستا وتانداسىمىز اننا شەۆچەنكو رەسەيلىك سپورتشى ليليا ۆاسيلەۆاعا ەسە جىبەرىپ, مەرەيلى ەكىنشى ورىنعا يە بولادى. قولا جۇلدەنى تاعى ءبىر رەسەيلىك سپورتشى اناستاسيا موسكالەنكو قانجىعاسىنا بايلادى. ال ەرلەر اراسىنداعى جارىستا العاشقى ءۇش ورىندى رەسەيلىك سپورتشىلار يەلەندى.
ەكىنشى جارىس كۇنىندەگى كلاسسيكالىق ستيلدەگى جەكە سايىسىندا دا رەسەيلىك سپورتشىلار دارا شىقتى. ايەلدەر اراسىندا ليليا ۆاسيلەۆا باس جۇلدەنى ولجالاسا, ەرلەر اراسىندا اندرەي لاركوۆقا تەڭ كەلەر قارسىلاس تابىلمادى. دەسە دە ايەلدەر اراسىنداعى باسەكەدە كۇمىس جانە قولا جۇلدە وتانداستارىمىزعا بۇيىردى. اننا شەۆچەنكو مارە سىزىعىن ەكىنشى, تامارا ەبەل ءۇشىنشى بولىپ كەستى.
وكىنىشكە قاراي, سوڭعى جارىس كۇنىندە ەركىن ستيلدەگى ماسس-ستارت جارىسىندا دا جەرلەستەرىمىز جەڭىس تۇعىرىنا كوتەرىلە المادى. بۇل جولى دا التىن جۇلدە رەسەي سپورتشىلارىنىڭ قانجىعاسىندا كەتتى. تەك ايەلدەر اراسىنداعى دودادا اننا شەۆچەنكو ەكىنشى ورىن يەلەنىپ, قازاقستان قورجىنىنا كەزەكتى كۇمىس جۇلدە سالدى. وسىلايشا ءۇش كۇنگە سوزىلعان حالىقارالىق ءتۋرنيردىڭ قورىتىندىسى بويىنشا جالپىكوماندالىق ەسەپتە رەسەي سپورتشىلارى ۇزدىك اتاندى.