شىمكەنت قالاسىندا ءىرى قارا مالدى بورداقىلاپ قانا قويماي, ودان ساپالى ەت الاتىن, ناقتىراق ايتقاندا نارىقتا قىمبات باعالاناتىن ءمارمار ەت ءونىمىن وندىرەتىن شارۋاقوجالىق بار. بۇل قازىرگى تاڭدا مەيرامحانالاردا جوعارى سۇرانىسقا يە ەت ءتۇرى.
بۇگىندە شارۋاشىلىقتاردىڭ كوشىن باستاپ كەلە جاتقان قوجالىق قاراتاۋ اۋدانى, سايرام تۇرعىن الابىندا ورنالاسقان. «نۋرالي» شارۋاقوجالىعىندا ءىرى قارا مالدىڭ ءمارمار ەتىن بەرە الاتىن تۇقىمدارى بورداقىلانۋدا. اتاپ ايتقاندا, 30%-ى «ابەردين-انگۋس», 30%-ى «اۋليەكول», 30%-ى «قازاقتىڭ اقباس» جانە قالعان 10%-ى جەرگىلىكتى ءىرى قارا مال تۇقىمدارى. ونىمدەر قالامىزدان بولەك ەلىمىزدىڭ وزگە ايماقتارىنا دا جونەلتىلەدى.
قوجالىق يەسى, شارۋا شەرالي ۋسمانوۆتىڭ ايتۋىنشا, كاسىبىن ەڭ الدىمەن 2005 جىلى 7 باس ءىرى قارا مال بورداقىلاۋدان باستاعان. مال شارۋاشىلىعىن دامىتۋدى مىقتاپ قولعا العان ول بۇگىندە قوراجايىندا مىڭ باسقا جۋىق ءىرى قارا مالدى باپتاۋدا.
ايتا كەتەيىك, 2010 جىلى مەملەكەت تاراپىنان كورسەتىلگەن قولداۋ ارقاسىندا شارۋاشىلىق اۋماعىن ۇلعايتىپ, مال بورداقىلاۋ الاڭىنىڭ سىيىمدىلىعىن 400 باسقا, 2014 جىلى 700 باسقا اپاردى.
ال 2018 جىلى مال بورداقىلاۋمەن قوسا ساعاتىنا 2 تونناعا دەيىن قۇراما جەم شىعاراتىن تسەحتى ىسكە قوسقان. بۇل ءوز كەزەگىندە شارۋا ءۇشىن ەت ءونىمىنىڭ كولەمىن ارتتىرۋعا سەپتىگىن تيگىزدى دەۋگە بولادى.
كاسىپتىڭ كوزىن تاپقان قالا تۇرعىنى بۇل مەجەمەن توقتاپ قالماي, 2019 جىلى بورداقىلاۋ الاڭىنىڭ سىيىمدىلىعىن 1000 باسقا دەيىن جەتكىزدى.
جەكە كاسىپكەر وتباسىلىق شارۋاسىن ودان ءارى جانداندىرۋ ماقساتىندا الداعى جىلى قوراجاي اۋماعىنىڭ سىيىمدىلىعىن 1500 باسقا دەيىن جەتكىزۋدى, سونىمەن بىرگە ساپالى ەت ءونىمىنىڭ ۇلەسىن ارتتىرۋدى جوسپارلاپ وتىر.
قوسىمشا سۇراقتار بويىنشا: 8 (7252) 24-74-08.