قازاقستان مەن مىسىر – ەكونوميكالىق ىنتىماقتاستىقتى دامىتپاق

سىرتقى ىستەر ءمينيسترىنىڭ ورىنباسارى الماس ايداروۆ باستاعان قازاقستاندىق دەلەگاتسيانى قازاقستاننىڭ 13 وڭىرىنەن 60-تان استام قازاقستاندىق كومپانيا, سونداي-اق مەملەكەتتىك جانە كۆازيمەملەكەتتىك ورگانداردىڭ وكىلدەرى تانىستىردى. مىسىر تاراپىنان فورۋمعا بيزنەس-قوعامداستىقتىڭ 200-دەن استام وكىلى, سونداي-اق مىسىر سىرتقى ىستەر ءمينيسترىنىڭ ورىنباسارى تاريك ءال-ۋاسيمي, وڭتۇستىك سيناي پروۆينتسياسىنىڭ گۋبەرناتورى گەنەرال حالەد فۋدا, مىسىر ساۋدا پالاتالارى فەدەراتسياسىنىڭ باسشىسى يبراحيم ءال-ارابي قاتىستى.

قر-نىڭ مىسىر اراب رەسپۋبليكاسىنداعى توتەنشە جانە وكىلەتتى ەلشىسى قايرات لاما ءشاريفتىڭ ايتۋىنشا, ەكى تاراپ ەكى ەل اراسىنداعى ساۋدا-ەكونوميكالىق جانە ينۆەستيتسيالىق بايلانىستاردىڭ دەڭگەيىن ودان ءارى ارتتىرۋ ءۇشىن ءوزارا ءىس-قيمىلدىڭ بارلىق باعىتتارى بويىنشا ىنتىماقتاستىقتى ارتتىرۋعا نيەتتى.

«قازاقستان ەگيپەتتى افريكانىڭ «قاقپاسى» رەتىندە قاراستىرا وتىرىپ, قازاقستان-مىسىر ىسكەرلىك كەڭەسى مەن ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ كومەگىمەن ەكسپورتتى ىلگەرىلەتۋگە دايىن.. ەاەو-عا مۇشە ەلدەر مەن مىسىر اراسىنداعى ەركىن ساۋدا تۋرالى كەلىسىمگە قول قويۋ قازاقستاندىق ءونىم ەكسپورتىن ۇلعايتۋعا قوسىمشا سەرپىن بەرەدى, بۇل حالقى 100 ملن ادامنان اساتىن مىسىر نارىعىنا جول اشادى», دەپ اتاپ ءوتتى قايرات لاما شاريف.

سپيكەرلەردىڭ ايتۋىنشا, ءونىمنىڭ قىمباتتاۋى جانە ەكى ەل اراسىنداعى ساۋدا قارقىنىنىڭ باياۋلاۋى مەملەكەتتەردىڭ گەوگرافيالىق الىستىعىنا بايلانىستى. الايدا, قر ساۋدا جانە ينتەگراتسيا ۆيتسە-ءمينيسترى قايرات تورەباەۆ اتاپ وتكەندەي, وسىعان قاراماستان, قازاقستان تاۋار اينالىمىن 4 ەسەگە جۋىق ۇلعايتۋعا مۇمكىندىگىن كورىپ وتىر.

«بۇل تۇرعىدا وتاندىق كومپانيالار 300 ملن دوللارعا جۋىق سوماعا ساپالى تاۋارلار ۇسىنا الادى. ازىق-ت ۇلىك قاۋىپسىزدىگىن قامتاماسىز ەتۋ ماقساتىندا مىسىرلىق كومپانيالار وزدەرىنىڭ ەكسپورتقا باعدارلانعان وندىرىستەرىن قازاقستاندا ورنالاستىرا الادى. بۇل باعىت ءۇشىن مۇنداي جوبالاردى جەڭىلدىكپەن كرەديتتەۋ, ەكسپورتتىق كەلىسىمشارتتاردى ساقتاندىرۋ, تاۋارلاردى تاسىمالداۋعا جانە سەرۆيستىك قولداۋعا ارنالعان شىعىنداردى وتەۋ كوزدەلگەن. بۇدان باسقا, جاقىن ارادا قازاقستان وتاندىق ءونىمدى شەتەلدىك ساتىپ الۋشىلار ءۇشىن پايىزدىق مولشەرلەمەنى CIRR دەڭگەيىندە سۋبسيديالايتىن بولادى. باسقاشا ايتقاندا, بۇل كورسەتكىش اي سايىن نەگىزدە ەىدۇ حاتشىلىعى بەلگىلەيتىن پايىزدىق مولشەرلەمە بويىنشا سانالادى», دەپ حابارلادى قايرات تورەباەۆ.

وسى باعىتتاعى جۇمىستى جانداندىرۋ مىسىر سىرتقى ىستەر ءمينيسترىنىڭ قازاقستانعا الداعى العاشقى رەسمي ساپارىمەن جانە ەكى ەل اراسىندا كەزەكتى ساياسي جانە كونسۋلدىق كونسۋلتاتسيالار وتكىزۋمەن بايلانىستى. بۇل تۋرالى ءوز سوزىندە مىسىر سىرتقى ىستەر ءمينيسترىنىڭ ورىنباسارى تاريك ءال-ۋاسيمي ايتتى.

ءىس-شارا بارىسىندا «قازاقستاندا جاسالعان» امبەباپ كورمەسى ۇيىمداستىرىلدى, وندا قازاقستاندىق وندىرۋشىلەردىڭ, ونىڭ ىشىندە افريكا قۇرلىعىنا ەكسپورتتايتىن كومپانيالاردىڭ ونىمدەرى ۇسىنىلدى. سونىمەن قاتار, وتاندىق جانە مىسىرلىق كومپانيالار اراسىندا ەكىجاقتى ۆ2ۆ كەلىسسوزدەر جۇرگىزىلدى

ءىس-شارا قورىتىندىسى بويىنشا بىرقاتار ەكونوميكالىق قۇجاتتارعا قول قويىلدى. وسىلايشا, قازاقستاندىق كومپانيالار مىسىر نارىعىنا 3 ملن-عا دەيىن ۇلعايتۋ پەرسپەكتيۆاسىمەن 1 ملن دانا كولەمىندە بوتەلكەدەگى سۋدى جەتكىزۋ, قازاقستاندىق كاسىپورىن نگەگىزىندە فارماتسەۆتيكالىق ءدارى-دارمەكتەردى شىعارۋ, سونداي-اق قازاقستان اۋماعىندا مىس كەن ورنىن ساتىپ الۋ تۋرالى ۋاعدالاستى.

اتالعان فورۋم مىسىرلىق بيزنەسمەندەردىڭ شيكىزاتتىق ەمەس سەكتوردىڭ قازاقستاندىق تاۋارلارىنا قىزىعۋشىلىعىن قالىپتاستىرۋعا ىقپال ەتتىپ, وتاندىق تاۋار وندىرۋشىلەر مەن الەۋەتتى مىسىرلىق ساتىپ الۋشىلار مەن ينۆەستورلار اراسىندا تىكەلەي بايلانىستاردى جولعا قويۋدى, ءونىمنىڭ ساپالىق جانە باعالىق كورسەتكىشتەرى بويىنشا اقپارات الماسۋدى قامتاماسىز ەتتى. ەكى ەل اراسىندا تۇراقتى ساۋدا ميسسيالارى مەن كەزدەسۋلەردى وتكىزۋ تۋرالى شەشىم قابىلداندى.