تاۋەلسىزدىكتىڭ 30 جىلدىعىن مەرەكەلەۋگە دايىندىق جونىندەگى مەملەكەتتىك كوميسسيانىڭ وتىرىسىندا پرەزيدەنت قاسىم-جومارت توقاەۆتاريحي وقيعاعا يدەولوگيالىق تۇرعىدان قاراۋ كەرەكتىگىن, مەرەكە كەزىندە اتقارىلاتىن شارالاردىڭ دەنى جاستارعا ارنالۋى تيىستىگىن ايتتى.وسى ورايدا تۇركىستان ءوڭىرىنىڭ شىعارماشىل جاستارى اراسىندا «تاۋەلسىزدىك قارلىعاشتارى» اتتى بايقاۋدىڭ جاريالانۋى مەملەكەت باسشىسىنىڭ مالىمدەمەسىمەن ۇندەسىپ وتىر.
قازاقستان جۋرناليستەر وداعى مەن قازاقستان جازۋشىلار وداعىنىڭ وبلىستىق فيليالدارىنىڭ ۇيىتقى بولۋىمەن, وبلىستىق قوعامدىق دامۋ باسقارماسىنىڭ قولداۋىمەن قولعا الىنعان بايقاۋدىڭ نەگىزگى ماقساتى – تاۋەلسىزدىكتىڭ تۇعىرىن بيىكتەتىپ, قۇندىلىقتارىن ناسيحاتتاۋ. تاۋەلسىزدىكتىڭ 30 جىلدىعىنا وراي ۇيىمداستىرىلىپ وتىرعان بايقاۋعا بايلانىستى وتكەن ارنايى بريفينگتە قازاقستان جۋرناليستەر وداعى تۇركىستان وبلىستىق فيليالىنىڭ توراعاسى عالىمجان ەلشىباي بايقاۋدىڭ نەگىزگى ماقساتى مەن شارتتارىنا توقتالدى. «بايقاۋعا تاۋەلسىزدىك العان كەزدەن بەرگى جىلداردا دۇنيەگە كەلگەن, 30 جاسقا دەيىنگى شىعارماشىل جاستار قاتىسا الادى. ءۇش جانردا وتەدى. ەنشىسى بولىنبەيتىن تۇركىستان وبلىسى مەن شىمكەنت قالاسىنىڭ قولىنا قالام ۇستاعان تالانتتى جاستار تاۋەلسىزدىككە دەگەن جۇرەكجاردى لەبىزىن پۋبليتسيستيكا, پوەزيا مەن پروزا ارقىلى بىلدىرە الادى», دەدى ع.ەلشىباي. ال قازاقستان جازۋشىلار وداعى تۇركىستان وبلىستىق فيليالىنىڭ توراعاسى الىبەك شەگەباي بايقاۋدىڭ وزگە شىعارماشىلىق جارىستاردان ەرەكشەلىگىنە توقتالدى. «ادەبي تۇرعىدان قاراساق, كەشەگى ۋاقىتتا جازىلعان شىعارمالاردىڭ بارلىعى دەرلىك تاۋەلسىزدىكتى اڭساۋمەن سيپاتتالدى. كەڭەس وداعى تۇسىندا جازىلعان كەز-كەلگەن شىعارمانى الىپ قاراساڭىز, مەيلى پروزا, مەيلى پوەزيا بولسىن, تۇبىندە ازاتتىققا ۇمتىلۋدى اڭعاراسىز. ال ەندى بۇگىن تاۋەلسىز ەل اتانىپ, 30 جىلدىعىن تويلاپ وتىرمىز. قازىرگى جاستار تاۋەلسىزدىكتى قالاي تۇسىنەدى؟ ازاتتىققا دەگەن كوزقاراستارى قانداي؟ مىنە, وسىنى شىعارماشىلىق بايقاۋ ارقىلى حالىققا جەتكىزگىمىز كەلەدى», دەدى ءا.شەگەباي. وبلىستىق قوعامدىق دامۋ باسقارماسىنىڭ باسشىسى دامير ءجۇنىسوۆ بايقاۋ بارىسىندا تاۋەلسىزدىكتىڭ جەمىسى رەتىندەگى تۇركىستاننىڭ جاڭارعان كەلبەتى تاقىرىبىنا ەرەكشە كوڭىل بولىنەتىنىن جەتكىزدى.
ۇمىتكەرلەر شىعارمالارىن 15 ناۋرىزعا دەيىن جىبەرە الادى. بايقاۋ جەڭىمپازدارىن تانىمال اقىن-جازۋشى, جۋرناليستەردەن قۇرالعان قازىلار القاسى انىقتايتىن بولادى. ۇزدىك شىعارمالار ارنايى جيناق رەتىندە جارىق كورەدى.