ش.ايمانوۆ اتىنداعى «قازاقفيلم» كينوستۋدياسى تۇسىرگەن ەلباسىنىڭ بالالىق, جاستىق شاعىنان سىر شەرتەتىن «بالالىق شاعىمنىڭ اسپانى» كوركەم ءفيلمىن بۇكىل قازاقستاندىقتار بولىپ, ونىڭ ىشىندە قاراعاندى وبلىسىنىڭ قالىڭ جۇرتشىلىعى ەرەكشە سەزىممەن تاماشالاعان بولاتىن.
ش.ايمانوۆ اتىنداعى «قازاقفيلم» كينوستۋدياسى تۇسىرگەن ەلباسىنىڭ بالالىق, جاستىق شاعىنان سىر شەرتەتىن «بالالىق شاعىمنىڭ اسپانى» كوركەم ءفيلمىن بۇكىل قازاقستاندىقتار بولىپ, ونىڭ ىشىندە قاراعاندى وبلىسىنىڭ قالىڭ جۇرتشىلىعى ەرەكشە سەزىممەن تاماشالاعان بولاتىن.
ەندى, مىنە, كينوستۋديامىزدىڭ ءوز كورەرمەندەرىنە جول تارتقان «ەلباسى جولى» دەپ اتالاتىن جاڭا تۋىندىسىن كورگەن ساتتەن-اق ودان العان اسەرىم ايرىقشا بولعاندىعىن ايتار ەدىم.
نۇرسۇلتان ءابىش ۇلىن تەمىرتاۋداعى وندىرىستەگى, لاۋازىمدىق قىزمەتتەگى كەزىنەن بىلەم دەسەم دە ناقتى دەرەكتەرمەن دايەكتەلىپ تۇسىرىلگەن «وتتى وزەن» جانە «تەمىر تاۋ» تاراۋلارىنان ورەلى قاسيەتتەرىنە ودان سايىن قانىعا ءتۇستىم. مىنە, تۋىندىنىڭ تانىمدىق ءارى تاربيەلىك ءبىر قۇندىلىعى دا وسىندا دەپ ويلايمىن. سول شاقتا جۇمىس بابىندا بىرنەشە مارتە كەزدەسۋلەردە بايقاعانىمداي اينالاسىنداعى ادامدارعا دەگەن ىزگىلىك پەن ىزەتتىلىك, سونىڭ ىشىندە ەڭبەكتىڭ ىستىق-سۋىعىن بىرگە كورۋشى مەتاللۋرگ ارىپتەستەرىنە ىقىلاس پەن قۇرمەت فيلمدە شىنايى كورىنىس تابۋى كوڭىل تولقىتتى.
بايتاق ەلىمىزدىڭ تۇكپىر-تۇكپىرىنەن قازاقستان ماگنيتكاسىنىڭ قۇرىلىسىن سالىسۋعا كەلگەن كومسومول-جاستاردىڭ, سان ۇلت وكىلدەرىنىڭ ورتاسىندا قازاق جاستارىنىڭ دا مولىنان بولعاندىعىن, ولاردىڭ دا قۇلشىنا بەلسەندىلىكپەن ەڭبەك ەتكەنىن بىزدەر جاقسى بىلەمىز.
فيلمدەگى ەرەكشە تارتىمدى ساتتەردىڭ ءبىرى – ءبىر توپ قازاق جاستارىنىڭ ۋكرايناعا بارىپ, سول جاقتاعى ۇستازدارىنان مەتاللۋرگيا ماماندىعىنىڭ قىر-سىرىن مەڭگەرۋى. سونىمەن قوسا, سونداعى ۇستازدارىن بۇگىنگى كۇنگە دەيىن ۇمىتپاي ءاردايىم سىيلاپ ءجۇرۋى, قامقورلىق جاساۋى, وسى جاستاردىڭ ەرەكشە ازاماتتىق قاسيەتتەرىنىڭ ءبىرى. مىنە, سول ۋاقىت ناعىز دوستىقتىڭ شىڭدالعان كەزەڭى بولعاندىعىن نۇرسۇلتان ءابىش ۇلى ۇنەمى ىستىق سەزىممەن ايتىپ كەلەدى.
نۇرسۇلتان نازارباەۆتىڭ ۇلكەن ءومىردىڭ قايناعان ورتاسىنا كەلىپ, كەزدەسكەن قانشاما قيىندىقتارعا مويىماي قايسارلىقپەن قارسى تۇرىپ, جەڭە بىلگەندىگىنىڭ ءوزى ونىڭ قانىندا بار قايتپاس قايسارلىعىن, ءور مىنەزدىلىگىن, تەكتىلىگىن تانىتسا كەرەك. اتالعان فيلمدە وسى جايلار وتە ءساتتى كورىنىس تاپقان. سونىمەن بىرگە, تۋعان حالقىنا, وتان-اناعا دەگەن شەكسىز ءسۇيىسپەنشىلىگىنىڭ, قاجىرلىلىعىنىڭ ارقاسىندا تاماشا جەتىستىكتەرگە جەتكەن كەزەڭدەرى دە وتە ءساتتى كورسەتىلگەن. ماسەلەن, قيىندىققا شىداماي اۋىلعا قايتقىسى كەلگەن جاستار نامىسىن قايراپ, ۇگىتتەپ, وسى قۇرىلىستىڭ يەسى ەرتەڭگى كۇنى وزدەرى ەكەندىگىن تۇسىندىرەتىن شاقتارى دا وتە اسەرلى. بۇل بۇگىنگى ۇرپاققا ايتارلىقتاي ونەگە, مول تاعىلىم.
سول كەزدەگى قايراتتى جاستاردىڭ اراسىندا ءوزىنىڭ كومسومولدىق جالىندى جىگەرىمەن, ۇلتتىق رۋحاني باي تاربيەسىنىڭ ارقاسىندا باسقا ۇلت وكىلدەرىنىڭ ورتاسىندا ۇيرەنۋگە, بىلۋگە قۇشتارلىعىمەن, ەڭبەكتىڭ اساۋ وتكەلدەرىندە جاسىماي, ءومىر باسپالداقتارىنىڭ بيىك ساتىسىنا ورلەپ كەلە جاتقان, جىگەرلى جاستىق شاعى ادەمى كورسەتىلگەن. شىندىعىندا دا, سول كەزدەگى جاستاردىڭ ەرلىككە تولى «قۇرىشتاي بەرىك» كەزەڭىن ءاردايىم ماقتانىشپەن مويىنداۋعا تۋرا كەلەدى.
فيلم ەلىمىزدىڭ ەرتەڭى – جاس ۇرپاق كوكەيىنە ساۋلە قۇيار ونەگەلىك ماڭىزدىلىعىمەن قۇندى. حالقىمىز باقىتىنا جاراتىلعان, سەنىمىن اقتاۋدا سىڭىرۋدەگى ەڭبەگى ەرەكشە ەلباسىنىڭ ءوسۋ, شىڭدالۋ جولىنداعى ءومىر بەلەستەرى تاعى ءبىر قانىققانىمىزداي بارشا جۇرتىمىزعا زور ماقتانىش.
رىمبالا وماربەكوۆا,
قازاقستان رەسپۋبليكاسىنىڭ
ەڭبەك سىڭىرگەن قىزمەتكەرى.
قاراعاندى.