جاقىندا قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى, ەكسپو-2017 كورمەسىنىڭ كوميسسارى ءراپىل جوشىباەۆ باستاعان قازاقستاندىق دەلەگاتسيا جۇمىس ساپارىمەن مالايزيادا بولىپ قايتتى, دەپ حابارلادى قر ءسىم-ءىنىڭ ءباسپاسوز قىزمەتى.
جاقىندا قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى, ەكسپو-2017 كورمەسىنىڭ كوميسسارى ءراپىل جوشىباەۆ باستاعان قازاقستاندىق دەلەگاتسيا جۇمىس ساپارىمەن مالايزيادا بولىپ قايتتى, دەپ حابارلادى قر ءسىم-ءىنىڭ ءباسپاسوز قىزمەتى.
ساپار شەڭبەرىندە مالايزيا ىشكى ىستەر ءمينيسترىنىڭ ورىنباسارى داتو ۆان جافارمەن, پرەمەر-ءمينيستردىڭ كەڭەسشىسى شاحريزات ابدۋل جاليلمەن, قۇرىلىس يندۋسترياسىن دامىتۋ جونىندەگى كەڭەستىڭ ديرەكتورى داتو جۋددين ابدۋل كاريممەن, سىرتقى ساۋدانى دامىتۋ جونىندەگى مەملەكەتتىك كورپوراتسيانىڭ ديرەكتورى داتو ۆونگ لاي ساممەن, سونداي-اق, سىرتقى ىستەر, يندۋستريا جانە حالىقارالىق ساۋدا مينيسترلىكتەرىنىڭ وكىلدەرىمەن جانە مەملەكەتتىك-جەكەمەنشىك ارىپتەستىك كاسىپورىندارى باسشىلارىمەن كەزدەسۋلەر ءوتتى.
كەزدەسۋ بارىسىندا ەكىجاقتى ساياسي جانە ساۋدا-ەكونوميكالىق ىنتىماقتاستىقتىڭ, سونداي-اق, قاۋىپسىزدىكتى قامتاماسىز ەتۋ, ءتۋريزمدى دامىتۋ سالالارىنداعى ءوزارا ءىس-قيمىلدىڭ پەرسپەكتيۆالارى, ەكسپو-2017 اياسىندا بىرلەسكەن جوبالاردى جۇزەگە اسىرۋ ءۇشىن جەتەكشى تەحنولوگيالاردى پايدالانۋ ماسەلەلەرى تالقىلاندى.
قازاقستاندىق دەلەگاتسيا ساپارىنداعى ماڭىزدى باعدارلامانىڭ ءبىرى ۇلتتىق قاۋىپسىزدىك سالاسىندا شەكارالىق جانە كوشى-قون ۇدەرىستەرىنە باقىلاۋ جۇرگىزەتىن جۇيە شىعاراتىن جەتەكشى مالايزيا كومپانياسى باسشىلىعىمەن كەلىسسوزدەر بولدى. اتاپ ايتقاندا, اتالعان جۇيە مەملەكەتتىك شەكارا ارقىلى وتكەن كەزدە تولقۇجاتتىق باقىلاۋدى تەكسەرۋ ۋاقىتىن ايتارلىقتاي قىسقارتۋعا, شەتەلدىك ازاماتتاردىڭ كەلۋىنە مونيتورينگ جۇرگىزۋدى كۇشەيتۋگە جانە ەلەكتروندى ۆيزالار ەنگىزۋ جولىمەن ۆيزالىق پروتسەدۋرالاردى وڭتايلاندىرۋعا, ت.ب. مۇمكىندىك بەرەدى.
كەزدەسۋ قورىتىندىلارى بويىنشا, قازاقستان تاراپى مالايزيانىڭ بۇل سالاداعى تاجىريبەسىن ۇيرەنۋگە قىزىعۋشىلىق تانىتىپ, اتالعان جۇيەنى قازاقستان رەسپۋبليكاسىنىڭ قاۋىپسىزدىگى پايداسىنا قولدانۋ مۇمكىندىگىن قاراستىراتىنىن ءبىلدىردى.