سىبايلاس جەمقورلىققا قارسى ءىس-قيمىل اگەنتتىگىنىڭ جانىنان ازاماتتاردىڭ سەنىمى مەن ادالدىق پەن پاراساتتىلىق قاعيدالارىنا بەيىمدىلىگىن ارتىرۋ ماقساتىندا قۇرىلعان اقپاراتتىق-اعارتۋ شتابىنىڭ جىلدىق جۇمىسىن قورىتىندىلاۋعا ارنالعان كەڭەس ءوتتى.
ءىس-شاراعا اگەنتتىكتىڭ جانە اۋماقتىق دەپارتامەنتتەردىڭ باسشىلارى, جەرگىلىكتى اقپاراتتىق-اعارتۋ شتابتارىنىڭ جەتەكشىلەرى مەن قوعام وكىلدەرى قاتىستى.
رەسپۋبليكالىق شتابتىڭ جەتەكشىسى ىرزا تۇرسىنزادا قۇرامىندا مىرزاتاي جولداسبەكوۆ, ەرمەك تۇرسىنوۆ, عوسمان تولەعۇل سياقتى بەدەلدى قوعام بەلسەندىلەرى بار شتابتاردىڭ قىزمەتى جەمقورلىققا مۇلدەم توزبەۋشىلىكتىڭ ىرگەتاسىن قالاۋعا مۇمكىندىك بەرگەنىن اتاپ ءوتتى. ونىڭ دالەلى رەتىندە وتكەن جىلى جاسالعان جۇمىستاردىڭ العاشقى وڭ ناتيجەلەرىن كەلتىرۋگە بولادى.
اتاپ ايتقاندا, ونلاين فورماتتا شتابتىڭ 400 مۇشەسى وتكىزگەن 5 مىڭعا جۋىق ءىس-شارامەن 1,2 ملن ازامات قامتىلعان. ءاربىر ءىس-شارا ۇلتتىق مادەنيەت پەن بابالار مۇراسى ارقىلى رۋحاني قۇندىلىقتاردى تاربيەلەۋ ماقساتىن كوزدەدى.
سونداي-اق پاراساتتىلىق يدەياسى مەن سىبايلاس جەمقورلىققا قارسى مادەنيەتتى جاستار اراسىندا حالىق شىعارماشىلىعى ارقىلى قالىپتاستىرۋ ماقساتىندا ەلىمىزدىڭ ءار وڭىرىنەن 16 ايتىس اقىنى قاتىسقان Antikor-ايتىس جانە Antikor Terme ونلاين جوبالارى ۇيىمداستىرىلدى.
جيىن بارىسىندا شىمكەنت قالاسى مەن اقمولا, جامبىل, قىزىلوردا, تۇركىستان, پاۆلودار جانە شىعىس قازاقستان وبلىستارى شتاب جەتەكشىلەرىنىڭ باياندامالارى تىڭدالىپ, وڭ تاجىريبەلەرى وزگە وڭىرلەرگە ۇلگى ەتىلدى.
اگەنتتىك توراعاسى اليك شپەكباەۆ اقپاراتتىق-اعارتۋ شتابىنىڭ باستى ماقساتى سىبايلاس جەمقورلىققا قارسى مادەنيەتتى قالىپتاستىرۋ جانە پاراساتتىلىق يدەولوگياسىن ىلگەرىلەتۋ ەكەندىگىنە توقتالدى. ونىڭ پىكىرىنشە, ءاربىر ءوڭىر عانا ەمەس, ءار اۋىلدىق ەلدى مەكەن تۇرعىندارىنىڭ بويىنا سىبايلاس جەمقورلىققا قارسى كوزقاراستى جاپپاي ءسىڭىرۋى ماڭىزدى. سوندىقتان دا اۋداندىق دەڭگەيدە دە اقپاراتتىق-اعارتۋ شتابتارىن ۇيىمداستىرۋ قاجەت. ولاردىڭ جۇمىسىنا حالىق اراسىندا ابىرويعا يە بەلسەندى ازاماتتاردى, ونىڭ ىشىندە جاستاردى جانە ادەپ جونىندەگى ۋاكىلدەردى كەڭىنەن تارتۋ كەرەك.