كوپتەن كورىسپەگەن جۇرت ءبىر-بىرىمەن جولىققاندا جىلى ۇشىراي سالەم بەرىپ, «مال-جان امان با؟» دەپ حال سۇراسىپ جاتادى. وسى ءبىراۋىز سوزبەن وتباسى مەن مالدىڭ اماندىعىن تەگىس سۇراپ بىلۋىنەن اتا-بابامىزدىڭ تىلگە شەبەرلىگى بايقالادى. ادامنىڭ جاسى ۇلعايعان سايىن ءار جەرىڭ اۋىرا باستايتىنى بەلگىلى. ون ەكى مۇشەڭنىڭ ساۋ بولعانى باعا جەتپەس بايلىعىڭ.
ون جىلدىڭ الدىندا سول كوزىمنىڭ ەتى ءوسىپ, جىل سايىن ۇلكەيە ءتۇستى. 2019 جىلى كوزىمنىڭ جارتىسىن جاۋىپ, اقىرى وتا جاساتۋعا تۋرا كەلدى. باسىندا, ارينە, بويىمدى قورقىنىش بيلەدى. ناۋرىز ايىندا تالدىقورعان قالاسىنا بارىپ, سول كوزىمنىڭ وسكەن ەتىن الدىردىم. كولەگەيلەنىپ جۇرگەن كوزىم بىردەن اشىلىپ, جاقسى كورەتىن بولدى.
ءبىر جىل وتكەننەن كەيىن, ياعني 2020 جىلدىڭ مامىر ايىنىڭ سوڭىنا تامان ەكى كوزىم بىردەي ب ۇلىڭعىر تارتىپ, قاشىقتان كورۋ قابىلەتىم ناشارلانا باستادى. اينالام تۇماندانىپ تۇرعان سياقتى كۇيگە ءتۇستىم. ۇساق جازۋدى كوزىلدىرىكپەن بۇرىن جاقسى كورۋشى ەدىم, كەيىننەن ارەڭ كورەتىن بولدىم. اۋىلدىڭ ەمحاناسىنا بارىپ قارالعانىمدا, اۋدانعا, نە قالاعا بارىپ قارالۋعا كەڭەس بەردى. امال جوق, دەمالىسقا شىققانشا شىداۋ كەرەك بولدى.
دەمالىسقا دا شىقتىم. ءوزىم الماتى وبلىسى جاقتا جۇمىس ىستەيتىندىكتەن تالدىقورعاندا قارالسام با ەكەن, الدە سەمەيگە بارسام با ەكەن دەپ ويلاندىم. اقىرى كوزىنە وتا جاساتقان ادامدار دارىگەرلەرى ءبىلىمدى دەپ ايتىپ جۇرەتىن سەمەيدى تاڭدادىم. ارينە, «حالىق ايتسا, قالت ايتپايدى», ونىڭ ۇستىنە قالانى دا جاقسى بىلەمىن. ويتكەنى جاستىق شاعىمنىڭ, ستۋدەنتتىك ءومىردىڭ قىزىقتى جىلدارىن وتكىزگەن قالامىز.
سونىمەن تامىز ايىنىڭ باسىندا سەمەي قالاسى وبوروننايا №86 كوشەسىندە ورنالاسقان «وفتالموحيرۋرگياعا» كەلىپ قارالىپ, بىرنەشە اپپاراتپەن تەكسەرۋدەن وتكىزگەننەن كەيىن دارىگەرلەردىڭ كەڭەسىمەن ەكى كوزىمە دە وتا جاساتۋعا كەلىستىم. پورتالمەن ەمدەلۋ ءۇشىن كۇتۋ كەرەك, ۋاقىت جوعالتامىن. ال اقشاسىن تولەپ جاساتسام, ەكىنشى كوزدىڭ وتاسى تەگىن ەكەن. اناليزدەردى قالادا وتسەم, اجەپتاۋىر شىعىندالادى ەكەنمىن. سودان تۇرعىلىقتى جەرىمدە تەكسەرىلگەنىم دۇرىس بولدى. شىعىس قازاقستان وبلىسى ءۇرجار اۋدانى قابانباي اۋىلىندا جانە ماقانشىدا اناليزدەرىمدى تاپسىرىپ, قۇجاتتارىمدى جينادىم. الايدا وسى اۋىلداردا جۇمىس ىستەيتىن كەيبىر مەدبيكەلەرگە وكپە-رەنىشىم دە بار. اتى-جوندەرىن اتاماعاندى ءجون كوردىم. سەبەبى بارلىق ءاناليزدى وتكىزگەننەن كەيىن تەراپەۆتىڭ قورىتىندىسىن الۋىم كەرەك. اڭگىمە وسى جەردە باستالدى. كوروناۆيرۋس اۋرۋىنان تازا دەگەن قۇجاتتى ماقانشى اۋىلدىق اۋرۋحاناسى بەرگەن. قابانباي اۋىلىنداعى تەراپەۆت-دارىگەر قۇجاتتارىمدى تۇگەل قاراپ وتىرىپ: «كوروناۆيرۋسقا بىزدەن نەگە تەكسەرىلىپ المادىڭىز. الاكولدىڭ بويىندا تەكسەرىلۋگە بولادى, 5 مىڭ تەڭگە تولەيسىز» دەدى. ونىسىنا ء«بارىبىر ەمەس پە, ماقانشىعا دا سول اقشانى تولەدىم» دەپ جاۋاپ بەردىم. از ويلانعاننان كەيىن رەنتگەننەن ءوتىڭىز دەپ تۇر. «اكەم, رەنتگەننەن وتكەنىمە 3 اي بولدى, 1 جىلعا دەيىن جارامدى ەمەس پە؟» دەسەم, باسقا وبلىستان وتكەنىمدى ايتتى. كەۋدەمدى تەكسەرىپ جاتىپ وكپەمدە سىرىل بارىن العا تارتتى. «جاس كەزىمنەن برونحيتىم بار, وكپەم تازا» دەپ, سوزگە كەلىسىپ تە قالدىق. كەيبىر مەدبيكەلەر ۇلكەنگە قاتتى ءسوز ايتىپ, مادەنيەتىنىڭ تومەن ەكەنىن بايقاتىپ-اق قالادى.
«قايداسىڭ, سەمەيىم» دەپ قۇجاتتارىمدى قۇشاقتاپ, 17 تامىز كۇنى قالالىق تەراپەۆتىڭ قورىتىندىسىن الدىم. 18 تامىزدا وڭ كوزىمە, 19 تامىزدا سول كوزىمە وتا جاساتتىم, ءساتتى بولدى. «وفتالموحيرۋرگيا» مەكەمەسىندەگى اق حالاتتى جاندارعا قاتتى ريزا بولعانىمدى جاسىرا المايمىن جانە باسقا دا وتاعا كەلگەندەردىڭ دە, بۇرىن وتا جاساتىپ, تەكسەرىلۋگە كەلىپ جۇرگەن ادامداردىڭ دا رازى بولىپ جۇرگەنىن كوردىم. ۇلكەندەرگە ىزەت كورسەتىپ, بىلمەگەن نارسەلەرىڭدى شىن نيەتىمەن تۇسىندىرەدى. مەدبيكەلەردىڭ ايتقان كەڭەسى بويىنشا ۋاقىتىندا تەكسەرىلۋدەن ءوتىپ وتىردىم. ايەلىم شەرەنحان ءسابيتوۆا دا سول كوزىنىڭ ەتى ءوسىپ, 5 قاراشادا سەمەيدىڭ «وفتالموحيرۋرگياسىنا» وتا جاساتتى. وتا جاساتۋىنا سەبەپشى بولعان – ءوزىم. اۋلەتىمىزبەن سەمەيدىڭ كوز دارىگەرلەرىنە ريزاشىلىعىمىزدى بىلدىرەمىز.
گالينا زامانوۆا باسقارىپ وتىرعان مەكەمەدەگى قىزمەتكەرلەرگە مىڭ دا ءبىر العىسىمدى ايتپاقپىن. اسىرەسە, ۇلتى ورىس بولا تۇرا قازاق ءتىلىن وتە جاقسى مەڭگەرگەن, اتا-اپالاپ جانىڭا شيپا بەرەتىن حيرۋرگيا ءبولىمىنىڭ مەڭگەرۋشىسى سۆەتلانا سەرەديناعا جانە اعا مەدبيكە الماز وستەمىروۆاعا العىسىمىز شەكسىز. سونداي-اق گاۋحار تۇرسىنعاليەۆا, ساۋلە احمەتوۆا, ءاليا قۇسايىنوۆا, دينارا ۋستاەۆا, توعجان ۋريستيموۆا سياقتى ماماندارعا شىن كوڭىلىمىزبەن ريزاشىلىعىمىزدى بىلدىرەمىز. ەل گازەتى ارقىلى العىسىمدى جەتكىزە وتىرىپ, جۇمىستارىنا تابىس, دەندەرىنە ساۋلىق, وتباسىلارىنا اماندىق, جايدارلى مىنەزدەرىمەن حالىقتىڭ العىسىنا بولەنە بەرىڭىزدەر دەگىم كەلەدى.
سالمەن ءسابيتوۆ,
قابانباي اۋىلىنىڭ تۇرعىنى
شىعىس قازاقستان وبلىسى,
ءۇرجار اۋدانى