يتاليانىڭ ترەنتينو قالاسىندا ءوتىپ جاتقان قىسقى ۋنيۆەرسيادادا حوككەيدەن قازاقستان قۇراماسى اقش كومانداسىن 5:1 ەتىپ ۇتىپ, فينالعا شىقتى. بۇل تۋرالى Vesti.kz ءتىلشىسى حابارلادى.
ەسەپتى 8-مينۋتتا قازاقستاندىق الەكساندر شين اشتى. ول الەكساندر ليپين مەن لەونيد مەتالنيكوۆتىڭ پاسىن جاقسى پايدالاندى. ەكىنشى كەزەڭنىڭ دەبيۋتىندە مەتالنيكوۆ پەن شين بەرگەن شايبانى ەۆگەني رىمارەۆ سالدى. ءۇشىنشى جيىرما مينۋتتىڭ باسىندا رىمارەۆ دۋبل جاسادى – 3:0. بۇدان كەيىن 42 سەكۋندتىڭ ىشىندە ەكى شايبا ءتۇستى. الدىمەن شون مەرفي ءبىر شايبانىڭ قارىمتاسىن قايتاردى. سوسىن ليپين ەسەپتى 4:1-گە جەتكىزدى. ال اقش قاقپاسىنا سالىنعان بەسىنشى گولدىڭ اۆتورى نيكيتا كوۆالەۆ بولدى. ول نەگىزگى ۋاقىت بىتۋگە 7 مينۋت قالعاندا 5:1 دەگەن ەسەپتى بەكىتىپ بەردى.
ەسكە سالا كەتەيىك, جارتىلاي فينالدىق كەلەسى جۇپتا كانادا مەن رەسەي ستۋدەنتتەرى بەتتەسىپ, «ۇيەڭكى جاپىراقتى ەلدىڭ» جىگىتتەرى 2:1 ەسەبىمەن باسىم ءتۇستى. ەندى بۇگىن, 21 جەلتوقسان كۇنى فينالدا قازاقستان جانە كانادا كوماندالارى ۇشىراسادى.
بۇل كوماندالار 2011 جىلعى ۋنيۆەرسيادانىڭ جارتىلاي فينالىندا ءبىر-بىرىمەن كۇش سىناسقان ەكەن. سوندا كانادالىقتان 3:1 ەتىپ جەڭىپ كەتىپتى. بۇل جولى قالاي بولاتىنىن مۇز ۇستىندەگى كەلەسى شايقاس شەشەدى.
دامير قوجامقۇل.
دەرەككوز:Vesti.kz.