قازاقستاندا 15 ايماقتىق جوعارى وقۋ ورنى دامىتىلادى. ولار ناقتى كريتەريلەر بويىنشا ىرىكتەپ الىنادى. اتالعان جوعارى وقۋ ورىندارى دارىندى جاستاردى جينايتىن وڭىرلىك ورتالىقتارعا اينالماق. بۇل تۋرالى ۇكىمەت وتىرىسىندا ءبىلىم جانە عىلىم ءمينيسترى اسحات ايماعامبەتوۆ مالىمدەدى.
«ناقتى كريتەريلەر بويىنشا 15 وڭىرلىك جوعارى وقۋ ورنىن ىرىكتەپ الامىز. وسى ۋنيۆەرسيتەتتەر ارقىلى وڭىرلەردەگى ءبىلىم ساپاسىن ارتتىرۋ ءۇشىن نىسانالى قارجى ءبولىپ, ولاردى جاڭا زەرتحانالارمەن قامتاماسىز ەتەمىز. ول وقۋ ورىندارىندا جاڭا ءبىلىم باعدارلامالارى دا اشىلادى. سونىمەن قاتار ساپاسىز جوعارى وقۋ ورىندارىن جابۋ بويىنشا جۇمىستار دا جالعاسىن تابادى», دەپ اتاپ ءوتتى مينيستر.
مەملەكەت باسشىسىنىڭ تاپسىرماسى بويىنشا جوعارى ءبىلىم بەرۋ جۇيەسىندە اكادەميالىق ادالدىقتى بۇزعانى جانە سىبايلاس جەمقورلىق ءىس-ارەكەتتەرى ءۇشىن جوعارى وقۋ ورىندارىنىڭ جاۋاپكەرشىلىگى كۇشەيتىلدى. جوعارى وقۋ ورىندارىنىڭ اكادەميالىق دەربەستىگىن كەڭەيتۋ بويىنشا اۋقىمدى جۇمىس جۇرگىزىلدى. ەندى اكادەميالىق جانە باسقارۋشىلىق ەركىندىك قازاقستاندىق كوللەدجدەرگە دە بەرىلەدى.
«كوللەدجدەرگە اكادەميالىق دەربەستىك بەرىلەدى. اتالعان شارا ءبىلىم بەرۋ باعدارلامالارىنىڭ مازمۇنىن وزگەرتۋگە, ءبىلىم ساپاسىن ارتتىرۋعا, وقۋ مەرزىمىن قىسقارتۋعا مۇمكىندىك بەرەدى. سول ارقىلى تۇلەكتەر تەزىرەك جۇمىسقا ورنالاسا الادى», دەدى ا.ايماعامبەتوۆ.
كوللەدجدەرگە اكادەميالىق ەركىندىك بەرۋ – كادرلاردى دايارلاۋدا يكەمدىلىكتى قامتاماسىز ەتىپ, وقۋ ورىندارىنىڭ جۇمىس بەرۋشىلەرمەن بىرلەسە وتىرىپ, ءبىلىم بەرۋ باعدارلامالارىنىڭ مازمۇنىن, وقىتۋ مەرزىمدەرى مەن تراەكتورياسىن ايقىنداۋعا مۇمكىندىك بەرەدى.