حالقىمىز تەڭىزدەي تەرەڭ ويلى كەمەڭگەر قالامگەرىنەن ايىرىلىپ وتىر. بەلگىلى جازۋشى, دراماتۋرگ, مەملەكەتتىك سىيلىقتىڭ يەگەرى انەس سارايدىڭ ومىردەن وزعانى تۋرالى قارالى حابار ءبارىمىزدىڭ دە جانىمىزعا اۋىر ءتيدى. ول ادەبيەتشىلەر قاۋىمىنا عانا ەمەس, بارشا قازاققا ورتاق تۇلعا ەدى.
انەس تولەندى ۇلى وتە ەڭبەكقور جازۋشى بولدى. بۇل جونىندە ومىرلىك جۇبايى, جازۋشى, دراماتۋرگ, تانىمال قوعام قايراتكەرى التىنشاش قايىرجانقىزى جاعانوۆا تەلەارنا جۋرناليستەرىنە بەرگەن سۇحباتتارىندا ايتقان بولاتىن.
انەس ساراي ونەگەلى عۇمىر كەشىپ, سوڭىنا وراسان زور تاريحي-ادەبي مۇرا قالدىردى. ونىڭ تاريحي تاقىرىپتارعا جازعان كەسەك-كەسەك تۋىندىلارى حالقىمىز ءۇشىن اسا قىمبات. ول – اقيقات پەن اردىڭ جۇگىن ارقالاپ وتكەن قالامگەر. ويتكەنى جازۋشى قانداي شىعارماسىن دا تەك قانا تاريحي دەرەكتەرگە سۇيەنە وتىرىپ جازعان. التىن وردا مەن نوعايلى ءداۋىرىنىڭ شەجىرەسىن, قازاق حالقىنىڭ شىعۋ تاريحىن جان-جاقتى زەرتتەدى. «يساتاي مەن ماحامبەت», «ادايلاردىڭ ارعى تاريحى» جانە «ەدىل-جايىق» اتتى تريلوگياسى قۇندى دۇنيەلەر ەكەنى داۋسىز.
سابىرلى دا سالماقتى مىنەزىمەن قاراپايىم عۇمىر كەشكەن جازۋشىنىڭ ەرەن ەڭبەگى ءالى شىنايى باعاسىن العان جوق. كەمەل ويلى قالامگەردىڭ باعاسىن كەلەر ۇرپاق بەرەدى دەپ ويلايمىن.
ءبىز انەس اعامەن ەلوردادا وتكەن ادەبي-مادەني ءىس-شارالاردا كەزدەسىپ جۇردىك. سونداي-اق «قازاقستان ايەلدەرى» جۋرنالىنىڭ رەداكتسياسىندا جۇزدەسىپ, پىكىر الماسىپ, ەل, جەر, حالىق تۋرالى تەرەڭ ويلارىنا قانىققان ەدىك.
باقۇل بولىڭىز, انەس اعا... قارا ءسوزدىڭ قادىرىن بىلەتىن حالقىڭىز باردا, رۋحاني مۇراڭىز ۇلتتىق قۇندىلىقتار تورىنەن ورىن الاتىنى ءسوزسىز.
ايباتىر سەيتاق,
اقىن, قازاقستان جازۋشىلار جانە جۋرناليستەر وداقتارىنىڭ مۇشەسى