ەلورداداعى دارىندى ەر بالالارعا ارنالعان قازاق-تۇرىك ليتسەي-ينتەرناتىندا «ساپالى ءبىلىمنىڭ نەگىزى – تاربيە مەن وقىتۋدىڭ تۇتاستىعى» دەگەن تاقىرىپتا عىلىمي-ادىستەمەلىك سەمينار ءوتتى.
ەلورداداعى دارىندى ەر بالالارعا ارنالعان قازاق-تۇرىك ليتسەي-ينتەرناتىندا «ساپالى ءبىلىمنىڭ نەگىزى – تاربيە مەن وقىتۋدىڭ تۇتاستىعى» دەگەن تاقىرىپتا عىلىمي-ادىستەمەلىك سەمينار ءوتتى.
استانا قالالىق ءبىلىم باسقارماسى مەن قازاق-تۇرىك ليتسەي-ينتەرناتى بىرىگىپ ۇيىمداستىرعان شاراعا ەلوردا مەكتەپتەرى ديرەكتورلارىنىڭ وقۋ ءىسى جونىندەگى ورىنباسارلارى قاتىستى. سەميناردىڭ اشىلۋى بارىسىندا «وقۋشىلاردى شىعارماشىلىققا تاربيەلەۋدەگى ۇلتتىق قۇندىلىقتاردىڭ ماڭىزى» دەگەن تاقىرىپتا ل.ن.گۋميلەۆ اتىنداعى ەۇۋ پراكتيكالىق قازاق ءتىل ءبىلىمى كافەدراسىنىڭ دوتسەنتى اينۇر نايمانباي, «وقۋشىلاردىڭ فۋنكتسيونالدى ساۋاتتىلىعىن دامىتۋدىڭ ناتيجەلىلىگى» دەگەن تاقىرىپتا قازاق-تۇرىك ليتسەي-ينتەرنات ديرەكتورىنىڭ بەيىندىك وقىتۋ جونىندەگى ورىنباسارى گۇلناز مۇسابەكوۆا جانە «اقپاراتتاردى كوپدەڭگەيلى قورعاۋمەن قامتاماسىز ەتۋ» دەگەن تاقىرىپتا «KATEV» حقق ادىسكەرى, ينفورماتيكا ءپانىنىڭ مۇعالىمى يسمايل گەسەن بايانداما جاسادى.
بىلتىر ورتا ءبىلىم بەرۋ جۇيەسىن تۇبەگەيلى وزگەرتۋ ماقساتىندا ەلباسىنىڭ تاپسىرماسىمەن 2012-2016 جىلدارعا ارنالعان ۇلتتىق جوسپار جاسالعانى بەلگىلى. وندا وقۋشىلاردىڭ ءبىلىمىن شىنايى ومىرمەن ۇشتاستىرۋ كوزدەلگەن. ولاردىڭ فۋنكتسيونالدىق ساۋاتتىلىعىن دامىتۋ مەن وقۋ ۇدەرىسىنىڭ مازمۇندىق, وقۋ-ادىستەمەلىك, ماتەريالدىق-تەحنيكالىق ماسەلەلەرىنە باسىمدىق بەرىلگەن ەدى. سوعان بايلانىستى وقۋدىڭ مازمۇنىن جاڭارتۋدى, مەتوديكاسىن وزگەرتۋدى قولعا العان ءبىلىم وردالارىنىڭ ءبىرى – دارىندى ەر بالالارعا ارنالعان قازاق-تۇرىك ليتسەي-ينتەرناتى. «ءبىز قازىر دامۋدىڭ ەكىنشى ساتىسىندامىز. ينتەراكتيۆتى وقىتۋ بويىنشا ءۇش ءتۇرلى باعدارلامامىز بار. ونىڭ ءبىرى – مۇعالىم مەن وقۋشىنىڭ اراسىنداعى قاشىقتىقتى جوياتىن, ياعني, وقۋشى قاي جەردە تۇرسا دا مۇعالىمىنەن ساباق الا الاتىن باعدارلاما بولسا, ەكىنشى باعدارلاما شاعىن جوبالاۋ دەپ اتالادى. مۇندا وقۋشى العان ءبىلىمىن ومىردەگى وقيعالارمەن سايكەستەندىرىپ وزدەرى جوبالاپ وتىرادى. مىسالى, وقۋشى كۇندەلىكتى ساباق بارىسىندا مۇعالىمنىڭ ايتقانىنىڭ 10-15 پايىزىن عانا ەستە ساقتايدى. ەگەر سونى شاعىن جوبالاۋ ارقىلى وقيتىن بولسا 80-90 پايىزعا دەيىن ءبىلىم يگەرەدى. ءۇشىنشى باعدارلاما جەكە تۇلعانى باعدارلاۋ دەپ اتالادى. بۇل, اسىرەسە, حيميا, فيزيكا پاندەرىندە كوبىرەك قولدانىلادى. سونىمەن بىرگە, سىني تۇرعىدان ويلانۋ, قوسىمشا ءبىلىم بەرۋدى دامىتۋ بويىنشا دا جۇمىستار جۇرگىزىپ جاتىرمىز», – دەدى ليتسەي-ينتەرنات ديرەكتورىنىڭ بەيىندىك وقىتۋ جونىندەگى ورىنباسارى گۇلناز مۇسابەكوۆا ءوز بايانداماسىندا.
سەميناردىڭ رەسمي اشىلۋى اياقتالعان سوڭ ۇستازدار قازاق-تۇرىك ليتسەي-ينتەرناتىنىڭ ءپان مۇعالىمدەرى وتكىزگەن پراكتيكالىق, سەمينار ساباقتارى مەن ءتۇرلى ترەنينگتەرگە قاتىستى.
ەستەرىڭىزگە سالا كەتەيىك, دارىندى ەر بالالارعا ارنالعان قازاق-تۇرىك ليتسەي-ينتەرناتىنىڭ قۇرىلعانىنا بيىل جيىرما جىل. ليتسەي-ينتەرناتقا بالالار جەتىنشى سىنىپتان باستاپ ءبىلىم ورداسىنىڭ تالابىنا ساي تەستىلەۋدەن كەيىن قابىلدانادى.
ايگۇل سەيىلوۆا,
«ەگەمەن قازاقستان».