كەشە استانادا رەسەي عىلىم اكادەمياسى ەكونوميكالىق ستراتەگيالار ينستيتۋتىنىڭ حالىقارالىق ساراپشىلار توبىنىڭ «ك نوۆىم ۆىسوتام» – جاڭا بيىكتەرگە» اتتى ۇجىمدىق مونوگرافياسىنىڭ تۇساۋكەسەرى ءوتتى. تۇساۋكەسەرگە قاتىسقان حالىقارالىق ساراپشىلار توبىنىڭ وكىلدەرى – الەكساندر اگەەۆ (رەسەي) پەن روبين مەتيۋز ( ۇلىبريتانيا) مونوگرافيانى جارىققا شىعارۋعا نەگىز بولعان قاعيداتتار جونىندە ايتىپ بەردى.
كەشە استانادا رەسەي عىلىم اكادەمياسى ەكونوميكالىق ستراتەگيالار ينستيتۋتىنىڭ حالىقارالىق ساراپشىلار توبىنىڭ «ك نوۆىم ۆىسوتام» – جاڭا بيىكتەرگە» اتتى ۇجىمدىق مونوگرافياسىنىڭ تۇساۋكەسەرى ءوتتى. تۇساۋكەسەرگە قاتىسقان حالىقارالىق ساراپشىلار توبىنىڭ وكىلدەرى – الەكساندر اگەەۆ (رەسەي) پەن روبين مەتيۋز ( ۇلىبريتانيا) مونوگرافيانى جارىققا شىعارۋعا نەگىز بولعان قاعيداتتار جونىندە ايتىپ بەردى.
قۇرامىندا ۇلىبريتانيا, گەرمانيا, اقش, شۆەيتساريا جانە باسقا دا ەلدەردىڭ وكىلدەرى بار حالىقارالىق ساراپشىلار توبى جىل سايىن رەسەي عىلىم اكادەمياسى ەكونوميكالىق ستراتەگيالار ينستيتۋتىنىڭ اياسىندا الەمنىڭ 100 مەملەكەتىنىڭ اراسىندا ينتەگرالدى قۋات جونىندە رەيتينگ جاسايدى. بۇل رەيتينگ ورىس, اعىلشىن جانە قىتاي تىلدەرىندە جارىق كورەدى.
جيىندا ءسوز العان پروفەسسور الەكساندر اگەەۆتىڭ ايتۋىنشا, نەگىزىنەن الەمدىك رەيتينگتەردىڭ باسىم كوپشىلىگى بەلگىلى ءبىر ەكونوميكالىق كورسەتكىشتەر قاعيدالارىنا ارقا سۇيەيدى ەكەن. ال ينتەگرالدى قۋات جونىندەگى جاھاندىق رەيتينگ الدىڭعى قاتارلى ماتەماتيكالىق مودەلدەرگە سۇيەنە وتىرىپ, ەكونوميكالىق كورسەتكىشتەردەن باسقا ىشكى ساياسي تۇراقتىلىق, سىرتقى ساياسات, ۇلتتىق قاۋىپسىزدىك, مەملەكەت باسشىلارىنىڭ ابىروي-بەدەلى مەن ىقپالى, ولاردىڭ حالىقارالىق قاتىناستار سالاسىنداعى باستامالارى سياقتى كوپتەگەن فاكتوردى ەسكەرۋ نەگىزىندە جاسالاتىن كورىنەدى. ا.اگەەۆتىڭ اتاپ وتۋىنشە, 2013 جىلعا ارنالعان زەرتتەۋلەر بويىنشا قازاقستان ينتەگرالدى قۋات جونىندەگى جاھاندىق رەيتينگتە 34-ءشى ورىنعا تۇراقتاپتى. «قازاقستان ەكونوميكالىق دامۋ سالاسىندا ايتارلىقتاي تابىستارعا قول جەتكىزىپ, تۇراقتى, ەگەمەندى مەملەكەت رەتىندە اياعىنان نىق تۇردى. ستراتەگيالىق جوسپارلاۋ – مەملەكەتتىڭ بىرتىندەپ, ساتىلى تۇردە جانە تابىستى دامۋىنىڭ ەڭ ماڭىزدى العىشارتتارىنىڭ ءبىرى. بۇگىندە قازاقستاندا الەمنىڭ ەڭ دامىعان 30 مەملەكەتىنىڭ قاتارىنا قوسىلۋ ماقسات ەتىلگەن «قازاقستان-2050» ۇزاق مەرزىمدى ستراتەگياسى قابىلدانىپ, جۇزەگە اسىرىلۋدا. ءبىزدىڭ زەرتتەۋلەرىمىز بويىنشا, قازاقستان 2015 جىلعا قاراي ينتەگرالدى قۋات جونىندەگى جاھاندىق رەيتينگتە بىردەن 10 ساتىعا كوتەرىلىپ, 24 ورىندى يەلەنەدى», دەدى ءوز سوزىندە ا.اگەەۆ.
ال پروفەسسور ر.مەتيۋزدىڭ پىكىرىنشە, قازاقستان بۇگىندە جوعارى ەكونوميكالىق تابىستارعا قول جەتكىزىپ, مەديتسينا, عىلىم مەن ءبىلىم بەرۋ سالالارىندا حالىقارالىق دەڭگەيگە جەتكەن. «الەۋمەتتىك ساياسات ناتيجەلى جۇرگىزىلۋدە, سونىمەن قاتار, حالىقارالىق ءبىتىمگەرشىلىك جوبالارىنىڭ تۇتاس لەگى جۇزەگە اسىرىلۋدا. سوڭعى جىلدارى قازاقستان ءتۇرلى الەمدىك رەيتينگتەردىڭ باستى كورسەتكىشتەرى بويىنشا قارقىنمەن العا جىلجۋدا. وسى جەتىستىكتەردىڭ بارلىعى قازاقستاننىڭ زور الەۋەتىن كورسەتەدى. بۇرىن «قازاقستان-2030» ستراتەگياسى قابىلدانىپ, ول مەرزىمىنەن بۇرىن جۇزەگە اسىرىلدى. زەرتتەۋلەردىڭ قورىتىندىسىنا جۇگىنسەك, الەمنىڭ ەڭ بەلدى 30 مەملەكەتىنىڭ قاتارىنا قوسىلىپ, «قازاقستان-2050» ستراتەگياسىن دا مەرزىمىنەن بۇرىن ورىنداۋعا قازاقستاننىڭ تولىق مۇمكىندىگى بار. ءبىزدىڭ بولجامدارىمىز بەن باعالاۋلارىمىز بويىنشا, قازىرگى قارقىنىنان ايىرىلماسا, بۇل مەجەگە 2025 جىلى دا جەتۋى مۇمكىن», دەدى ر.مەتيۋز.
ءلايلا ەدىلقىزى,
«ەگەمەن قازاقستان».
-------------------------------
سۋرەتتەردى تۇسىرگەن ەرلان وماروۆ.