قازاقستان رەسپۋبليكاسى پارلامەنتى سەناتىندا تاۋەلسىزدىك كۇنىنە ارنالعان سالتاناتتى جينالىس ءوتتى, دەپ حابارلادى وسى پالاتانىڭ ءباسپاسوز قىزمەتى.
قازاقستان رەسپۋبليكاسى پارلامەنتى سەناتىندا تاۋەلسىزدىك كۇنىنە ارنالعان سالتاناتتى جينالىس ءوتتى, دەپ حابارلادى وسى پالاتانىڭ ءباسپاسوز قىزمەتى.
وتىرىستى اشقان سەنات توراعاسى قاسىم-جومارت توقاەۆ قازاقستاننىڭ تاۋەلسىزدىككە قول جەتكىزۋى حالقىمىزدىڭ ۇلى جەڭىسى, تەڭدەسى جوق تاريحي وقيعا ەكەنىن اتاپ ءوتتى. «بۇگىندە قازاقستان قول جەتكىزىپ وتىرعان تەڭدەسسىز جەتىستىكتەر – پرەزيدەنت نۇرسۇلتان ءابىش ۇلى نازارباەۆتىڭ سىندارلى ساياساتى مەن قاجىرلى ەڭبەگىنىڭ كورنەكتى ناتيجەسى. ەلىمىز تاتۋلىق پەن تۇراقتىلىقتىڭ, ءوزارا سىيلاستىق پەن بەيبىت ءومىردىڭ مەكەنىنە اينالىپ, دامۋدىڭ داڭعىل جولىندا كەلەدى. قازاقستاننىڭ حالىقارالىق قوعامداستىق الدىنداعى مارتەبەسى كۇننەن-كۇنگە وسۋدە», دەدى ق.توقاەۆ. سەنات توراعاسى باسەكەگە قابىلەتتى 30 ەلدىڭ قاتارىنا كىرۋدى كوزدەيتىن مەملەكەت باسشىسىنىڭ «قازاقستان-2050» ستراتەگياسى جاڭا رەفورمالار مەن ەكونوميكالىق سەرپىلىس جاساۋعا زور مۇمكىندىك تۋعىزاتىنىن اتاپ ءوتتى.
تاۋەلسىزدىك كۇنى قارساڭىندا قازاقستان رەسپۋبليكاسى پرەزيدەنتىنىڭ جارلىعىمەن مەملەكەتتىك جانە قوعامدىق قىزمەتتە سىڭىرگەن ەڭبەگى, ەلدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن ءبىر توپ سەناتور مەملەكەتتىك ناگرادالارمەن ماراپاتتالعان بولاتىن.
سەناتورلار تالعاتبەك ابايدىلدين, يران ءامىروۆ, اقان بيجانوۆ, سۆەتلانا جالماعامبەتوۆا, ەرمەك جۇماباەۆ جانە ەرلان نىعماتۋلين «پاراسات» وردەنىنىڭ يەگەرلەرى اتاندى.
پارلامەنت سەناتى اپپاراتىنىڭ ءبولىم مەڭگەرۋشىسى ەرلان ساپاروۆ «ەرەن ەڭبەگى ءۇشىن» مەدالىمەن ماراپاتتالدى. سەنات اپپاراتىنىڭ باس كونسۋلتانتتارى قادىرجان ارىستانوۆ, راحيما بەكتىباەۆا, داۋرەن ءجۇسىپوۆ قازاقستان رەسپۋبليكاسىنىڭ قۇرمەت گراموتاسىمەن ماراپاتتالدى. ودان باسقا, جوعارعى پالاتا بيۋروسىنىڭ قاۋلىسىمەن اپپاراتتىڭ بىرقاتار قىزمەتكەرلەرىنە قازاقستان رەسپۋبليكاسى پارلامەنتى سەناتىنىڭ قۇرمەت گراموتاسى بەرىلدى.