شىمكەنت قالاسىنىڭ اكىمى مۇرات ايتەنوۆتىڭ توراعالىعىمەن وتكەن ماجىلىستە قالاداعى يندۋستريالىق, اگرويندۋستريالىق جانە كولىك-لوگيستيكالىق ايماقتار مەن ارنايى ەكونوميكالىق ايماقتاردىڭ 2020 جىلى اتقارعان قىزمەتتەرى مەن الداعى دامۋ جوسپارى تالقىلاندى. اتاپ ايتقاندا, «جۇلدىز» يندۋستريالىق ايماعىن قۇرۋ, «وڭتۇستىك», «تاسساي» يندۋستريالىق ايماقتارى مەن كولىك-لوگيستيكالىق ايماعىن دامىتۋ, «بوزارىق» اگرويندۋستريالىق ايماعى بويىنشا ماسەلەلەر قارالدى, دەپ حابارلايدى Egemen.kz
2020 جىلى شىمكەنت قالاسىنا 278 ملرد.تەڭگە ينۆەستيتسيا تارتىلىپ, وتكەن جىلمەن سالىستىرعاندا ءوسىم 40%-عا ارتقان. بيىلعى جوسپاردى 315 ملرد تەڭگەگە جەتكىزۋ بەكىتىلىپ وتىر.
– ينۆەستيتسيا تارتۋدىڭ بىردەن-ءبىر جولى – يندۋستريالىق جانە ارنايى ەكونوميكالىق ايماقتاردى دامىتىپ, ينۆەستورلارعا قولايلى جاعداي جاساۋ, ينۆەستيتسيالىق مۇمكىندىكتەردى بارىنشا قالىپتاستىرۋ. جۇلدىز يندۋستريالدى ايماعى شىمكەنت قالاسىنىڭ تاريحىنداعى ەڭ مىقتى جوبالاردىڭ ءبىرى بولماق. ينجەنەرلىك ينفراقۇرىلىم جۇيەلەرىن (ەلەكتر قۋاتتىلىعى جانە ساپالى گازبەن قامتۋ) ساپالى ورىنداۋدى تاپسىرامىن. قاجەتتى ينفراقۇرىلىمدار بويىنشا جوبالاۋ-سمەتالىق قۇجاتتاما مەن ساراپتامالىق قورىتىندى الىنىپ, ءتيىستى بيۋدجەتتىك ءوتىنىم بەرىلۋى ءتيىس. كەلەشەكتەگى دامۋ جوسپارلارى بويىنشا ينفراقۇرىلىم جۇيەلەرى قازىردەن مىقتاپ قولعا الىنۋى كەرەك, دەدى قالا اكىمى.
شاھار باسشىسى 306 گا جەر ۋچاسكەلەرىن تولىعىمەن مەملەكەتتىك مۇقتاجعا قايتارىپ, ينۆەستورلارعا دايىن ءوندىرىس پاركىن (Brownfield, Greenfield) قۇرۋ بويىنشا ۇسىنىستار ەنگىزۋ, 50 جاڭا جوبا تارتۋ جۇمىستارىن جۇرگىزۋگە تاپسىرما بەردى. سونداي-اق, ايماقتىڭ بولاشاق جوسپارلارىن قازىردەن دامىتىپ, بارلىق جوبالارعا دايىن بولۋ كەرەك ەكەنىن ايتتى.
«جۇلدىز» يندۋستريالدى ايماعىنداعى ينجەنەرلىك ينفراقۇرىلىم جۇيەلەرى قۇرىلىسىن ماۋسىم ايىندا باستاۋ جوسپارلانعان. بۇگىندە 260 گا جەر ۋچاسكەسى مەملەكەت مۇقتاجىنا قايتارىلدى.