سايلاۋ ناۋقانى اياسىنداعى ۇگىت-ناسيحات جۇمىستارىنان بۇقارالىق اقپارات قۇرالدارى ارقىلى ۇنەمى حاباردار بولىپ وتىردىم. بۇرىنعىعا قاراعاندا پارتيالاردىڭ بەلسەندىلىگى, ورتاق ماسەلەلەردى شەشۋ باعىتىنداعى ىزدەنىستەرى ەرەكشە ەكەندىگى بايقالادى. بۇل وتە دۇرىس, ويتكەنى, پارتيالار اراسىندا باسەكەلەستىك كۇشەيگەن سايىن ولار ەلگە جاقىن بولۋعا تىرىسادى, جاڭا يدەيالار ۇسىنىپ, ونى ورىنداۋعا ەرەكشە ءمان بەرەدى. جەرگىلىكتى جۇرتپەن ەتەنە ارالاساتىن ءماسليحات دەپۋتاتتارىنىڭ دا پارتيالىق ءتىزىم بويىنشا سايلانۋى ولاردىڭ ەل الدىنداعى جاۋاپكەرشىلىگىن ەسەلەپ ارتتىرا تۇسەدى.
بۇل ناۋقاننىڭ تاعى ءبىر ەرەكشەلىگى پاندەميا جاعدايىندا ءوتىپ جاتقاندىعى عوي. سوعان وراي سانيتارلىق تالاپتارعا باسا ءمان بەرىلىپ, ۇيدەن داۋىس بەرەتىندەر ءۇشىن دە بارلىق جاعداي جاسالعانىنا كوز جەتكىزدىك.
جالپى كەز كەلگەن مەملەكەتتەگى ساياسي جۇيە ۋاقىت تالابىنا ساي جاڭارىپ, تولىعىپ وتىرۋى ءتيىس. وسى تۇرعىدان العاندا بيىلعى سايلاۋداعى جاڭالىقتاردى جۇرت جاقسى قابىلدادى دەگەن ويدامىن. ەندى ەلدىڭ سەنىمىن اياق استى ەتپەۋ ءۇشىن پارتيالار دا بارىن سالادى, ءوز ورتالارىنان قازىرگى تالاپتاردى تەرەڭ ءتۇسىنىپ, سونى شەشۋ جولىندا ۇتىمدى ۇسىنىس, پايىمدى پىكىر بىلدىرە الاتىن ليدەرلەردى سايلايدى دەپ سەنەمىن.
جالپى بۇل سايلاۋ ەلدىڭ ەرتەڭگە دەگەن سەنىمىنىڭ كورىنىسىندەي بولدى. ال ونى اقتاۋ حالىق قالاۋلىسى اتانۋعا تالاپ قىلعان بارلىق ازاماتقا سىن.
باقبەرگەن دوسمامبەتوۆ,
مەملەكەت جانە قوعام قايراتكەرى,
ەكونوميكا عىلىمدارىنىڭ دوكتورى, پروفەسسور,
ۇلتتىق عىلىم اكدەمياسىنىڭ كوررەسپوندەنت مۇشەسى