جامبىلدىقتار سايلاۋعا بەلسەندى قاتىسۋدا

سونداي-اق, جامبىل وبلىستىق سايلاۋ كوميسسياسىندا 5 پارتيانىڭ فيليالدارىنان 206 مانداتقا 523 كانديدات تىركەلگەن. ونىڭ ىشىندە «Nur Otan» پارتياسىنان 390 كانديدات, «اۋىل» پارتياسىنان 44 كانديدات, «اق جول» پارتياسىنان 44 كانديدات, «ادال» پارتياسىنان 31 كانديدات جانە «قازاقستاننىڭ حالىق پارتياسىنان» 14 كانديدات بار. وبلىستىق سايلاۋ كوميسسياسىنىڭ مالىمەتىنشە, ەلدەگى ەپيدەميالىق جاعدايعا بايلانىستى بارلىق سايلاۋ ۋچاسكەلەرىندە سانيتارلىق تالاپتار قاتاڭ ساقتالۋدا. سونداي-اق ۋچاسكەلىك جانە اۋماقتىق كوميسسيالاردىڭ جۇمىسىنا 3,8 مىڭنان استام ادام قاتىسۋدا. سايلاۋ ۋچاسكەلەرىندەگى داۋىس بەرۋ پروتسەسىن 6500-دەن استام باقىلاۋشى باقىلاۋدا. ونىڭ قۇرامىندا ساياسي پارتيالار مەن قوعامدىق بىرلەستىكتەردىڭ وكىلدەرى بار.

وڭىردەگى سايلاۋ ۋچاسكەلەرى جۇمىسىن تاڭعى ساعات 7:00-دە باستادى. باقىلاۋشىلاردىڭ ايتۋىنشا, العاشقى ساعاتتاردان-اق ازاماتتار سايلاۋعا قاتىسۋدا جوعارى بەلسەندىلىك تانىتقان. سونىمەن قاتار, جامبىلدىقتار تۇرعىنداردى سايلاۋعا بەلسەندى قاتىسۋعا جانە شەت قالماۋعا شاقىرۋدا. سايلاۋعا قاتىسۋشىلار بۇگىن ەرەكشە كۇن ەكەنىن, مەملەكەتتىڭ ساياسي باعىتى ءار سايلاۋشىنىڭ داۋىسىنا بايلانىستى ەكەنىن جەتكىزۋدە. م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ ءبىرىنشى پرورەكتورى ەرجان امىربەك ۇلى بۇل سايلاۋ ەلدىڭ ساياسي جۇيەسىنىڭ جاڭارۋىن, سونداي-اق, قازاقستاندى دەموكراتيالاندىرۋ مەن جاڭارتۋعا دەگەن ۇمتىلىسىن كورسەتەتىنىن اتاپ ءوتتى.

سونىمەن قاتار بايزاق اۋدانى, بۋرىل اۋىلىنىڭ تۇرعىنى ءۇمىت باشاتوۆ: «بۇل كەز-كەلگەن ازامات ءۇشىن بولاشاقتىڭ نەگىزىن قالاۋعا ۇلەس قوساتىن اسا ماڭىزدى وقيعا. مەن قازاقستاننىڭ ودان ءارى دامۋعا جەتەلەيتىن رەفورمالار جولىمەن جۇرەتىنىنە سەنىمدىمىن», دەيدى.

ال تالاس اۋدانى, قاسقابۇلاق اۋىلىنىڭ تۇرعىنى سۋلحادين مۇستافاەۆ ەلىمىزدىڭ كەز-كەلگەن ازاماتى داۋىس بەرۋگە قۇقىلى ەكەنىن, داۋىس بەرۋ ارقىلى تۇرعىندار وركەندەۋ, ۇلتارالىق كەلىسىم جانە تۇراقتىلىقتى نىعايتۋ جولىن تاڭدايتىنىن جەتكىزدى.