قۇرلىقتىق حوككەي ليگاسىنىڭ (قحل) كەزەكتى تۋر ويىنىن حاباروۆسكىدە «امۋر» كلۋبىمەن وتكىزگەن «بارىس» ەكىنشى كەزدەسۋىندە ءىرى ەسەپپەن جەڭىلىپ قالدى.
ەكى كوماندا اراسىنداعى العاشقى باسەكەدە جەرلەستەرىمىز نەگىزگى ۋاقىتتا مۇز ايدىن يەلەرىمەن 4:4 ەسەبىمەن تەڭ ءتۇسىپ, بۋلليت سەرياسىندا قارسىلاستارىنىڭ الدىن وراپ كەتكەن بولاتىن. ارادا ەكى كۇن وتكەننەن كەيىنگى قارىمتا كەزدەسۋگە «امۋر» ويىنشىلارىنىڭ جەڭىلىستەن ساباق الىپ, تىڭعىلىقتى دايىندىقپەن كەلگەنى بىردەن بايقالدى. ياعني كەزدەسۋدىڭ العاشقى ەكى كەزەڭىندە «بارىس» قاقپاسىنا جاۋاپسىز ءتورت شايبا سوقتى. ءبىرىنشى 20 مينۋتتا كيريلل راسسكازوۆ (10-مينۋت) پەن گينەك زوگورنا (18-مينۋت) كوزگە تۇسسە, ەكىنشى كەزەڭدە گينەك زوگورنا (22-مينۋت) دۋبل اۆتورى اتاندى. ال 33-مينۋتتا الەكساندر گورشكوۆ كومانداسىنىڭ ءتورتىنشى شايباسىن سوقتى.
«امۋر» ويىنشىلارى ءتورت شايبامەن شەكتەلىپ قانا قويماي, ءۇشىنشى كەزەڭدە تاعى ءبىر گول سالدى. «بارىستىڭ» بوس قالعان قاقپاسىن ۆلاديمير بۋتۋزوۆ ءدال كوزدەپ, كەزدەسۋدىڭ نۇكتەسىن قويدى. ەكى كەزەڭ بويى گول سوعا الماعان قوناقتار تەك ءۇشىنشى كەزەڭدە ءبىر گولمەن قارىمتا قايتاردى. شايبا اۆتورى – داررەن ديتس. وسىلايشا, جەرلەستەرىمىز قارىمتا ماتچتا «امۋردان» 5:1 ەسەبىمەن وڭباي جەڭىلدى.