بيىلعى تاۋەلسىزدىك مەرەكەسى ەلوردالىق تەاترلار مەن مادەني مەكەمەلەر ءۇشىن جاعىمدى جاڭالىعىمەن ەستە قالدى. سونىڭ نەگىزگىسى – نۇر-سۇلتان قالاسى اكىمدىگىنىڭ شەشىمىمەن ەلوردالىق «Nomad City Hall» مكقك-نىڭ Nomad تەاترىنا قازاق تەاتر ونەرى رەجيسسۋراسىنىڭ رەفورماتورى, كسرو حالىق ءارتىسى, مەملەكەتتىك سىيلىقتىڭ لاۋرەاتى, حالىق قاھارمانى ءازىربايجان مامبەتوۆتىڭ ەسىمى بەرىلدى.
ءازىربايجان ءمادي ۇلى – ۇلتتىق تەاتر ونەرى مەن رەجيسسۋراسىنا ولشەۋسىز ۇلەس قوسقان قايراتكەر تۇلعا. كوزى تىرىسىندە-اق ايرىقشا شىعارماشىلىق كوزقاراس, جاڭاشىل ويلارىمەن تەاتر الەمىندە ەسىمى اڭىزعا اينالعان دارىن يەسىنىڭ, اسىرەسە استانانىڭ ونەرى مەن مادەنيەتىن دامىتۋداعى ەڭبەگى ەرەن. باس قالانىڭ ق.قۋانىشباەۆ اتىنداعى اكادەميالىق قازاق مۋزىكالىق دراما تەاترىنا 1999 جىلى ەلباسى نازارباەۆتىڭ ارنايى شاقىرۋمەن كەلىپ, سول كەزدەگى ادىمىن اپىل-تاپىل باسقان جاس تەاتردىڭ كوركەمدىك تۇرعىدان بيىك دەڭگەيگە كوتەرىلۋىنە زور ەڭبەك ءسىڭىردى. تالاي بۋىن ارتىستەردى تاربيەلەپ, ءوزىنىڭ شىعارماشىلىق ءھام ۇستازدىق سارا جولىن قالىپتاستىردى. بۇگىندە اڭىز رەجيسسەردىڭ سول ءبىر ولشەۋسىز ەڭبەگى باس شاھار اكىمدىگى تاراپىنان باعالانىپ, قايراتكەر تۇلعانىڭ تاعىلىمدى جولى وسىلايشا ۇلىقتالدى.
سالتاناتتى جيىنعا قالا اكىمى التاي كولگىنوۆ, ءازىربايجان مامبەتوۆتىڭ جارى, قازاقستاننىڭ حالىق ءارتىسى, بەلگىلى وپەرا ءانشىسى قورلان قاليلامبەكوۆا, رەجيسسەردىڭ تۋىستارى مەن ەلوردانىڭ ونەر قايراتكەرلەرى, سونىمەن قاتار باس قالاداعى تەاترلاردىڭ ديرەكتورلارى قاتىستى. ەلوردا باسشىسى ءمالىم ەتكەندەي, Nomad تەاترى ەندى ء«ازىربايجان مامبەتوۆ اتىنداعى دراما جانە كومەديا تەاترى» رەسمي اتاۋىنا يە بولدى.
رەسمي اشىلۋدان كەيىن تەاتر ۇجىمى كورەرمەن نازارىنا اباي قۇنانباي ۇلىنىڭ 175 جىلدىعىنا ارنالعان «جاس اباي» دراماسىنىڭ پرەمەراسىن ۇسىندى. قويىلىم رەجيسسەرى – قازاقستاننىڭ ەڭبەك سىڭىرگەن قايراتكەرى نۇرلان جۇمانيازوۆ.
ەسكە سالا كەتسەك, Nomad تەاترى – ەلوردامىزدا بوي كوتەرگەن مادەنيەت وشاقتارىنىڭ ءبىرى. قازىرگى تاڭدا تەاتر تالانتتى ءارى ونەرلى قىز-جىگىتتەردىڭ باسىن بىرىكتىرىپ, باس شاھار تۇرعىندارى مەن قوناقتارىنا مەملەكەتتىك تىلدە ءارتۇرلى جانرداعى سپەكتاكلدەر مەن قويىلىمداردى ۇسىنىپ, ەلىمىزدىڭ مادەني دامۋىنا ۇلەسىن قوسىپ كەلە جاتقان تالانتتار ورداسى.
ەندى مىنە, 2020 جىلدىڭ 18 جەلتوقسانىنان باستاپ رەسمي تۇردە ء«ازىربايجان مامبەتوۆ اتىنداعى دراما جانە كومەديا تەاترى» اتاۋىنا يە بولعان ونەر ورداسىنىڭ العا قويعان ماقساتى مەن شىعارماشىلىق جوسپارى كوپ. باسقانى ايتپاعاندا, تەاترعا ءازىربايجان مامبەتوۆ ەسىمىنىڭ بەرىلۋى جاس ۇجىم ءۇشىن ۇلكەن جاۋاپكەرشىلىك جۇكتەيتىنى ءسوزسىز.