بىلتىرمەن سالىستىرعاندا وسى جىلى قىزىلوردادا قىلمىس تۇرلەرىنىڭ ازايعانى انىق بايقالادى. دەگەنمەن دە پوليتسەيلەر الاياقتىق جاساپ, جۇرتتى الداعانداردىڭ جيىلەپ كەتكەنىن ايتىپ وتىر.
وزىنە سەنگەن جۇرتتىڭ قالتاسىن قاعۋدى ويلايتىندار ءادىس-ايلالارىن دا «جەتىلدىرىپ» العان. ولاردىڭ قاتارىندا قىز-كەلىنشەكتەردىڭ كوپتىگىنە دە كوز ۇيرەنىپ بارادى.
وبلىس ورتالىعىنان جاڭا پاتەر الۋدى جوسپارلاپ جۇرگەن قالا تۇرعىنى وسى جىلدىڭ تامىز ايىندا وسىنداي ءبىر الاياقتىڭ ارباۋىنا ءتۇسىپتى. «جاڭا اۋداننان جايلى پاتەر الۋعا, ونىڭ قۇجاتتارىن راسىمدەۋگە كومەكتەسەمىن» دەگەن ايەلدىڭ سوزىنە ءشۇباسىز سەنگەن تۇرعىن وعان 3 ملن تەڭگەنى شىتىرلاتىپ ساناپ بەرگەن. كوپ ۇزاماي كوڭىلىنە كۇدىك كىرىپ, بەرگەن اقشاسىن قايتا سۇراپتى. الاياق ايەل العانىنىڭ 1 ملن تەڭگەسىن عانا قايتارىپ, قالعانىن كەيىن بەرمەككە ۋادە ەتەدى. كەسىمدى مەرزىم ۇزاپ بارا جاتقان سوڭ الدانعانىن انىق سەزگەن تۇرعىن 27 قاراشادا قىزىلوردا قالالىق پوليتسيا باسقارماسىنا الاياقتىق دەرەگىنە قاتىستى ارىز ءتۇسىرىپتى.
قىزىلوردا قالالىق پوليتسيا باسقارماسى قىزمەتكەرلەرى جۇرگىزگەن جەدەل-ىزدەستىرۋ شارالارىنىڭ ناتيجەسىندە وبلىس ورتالىعىنىڭ 57 جاستاعى تۇرعىنى ۇستالدى. وزىنە قاتىستى ەشقايدا كەتپەۋ جانە ءوزىن دۇرىس ۇستاۋ تۋرالى قولحات تۇرىندە بۇلتارتپاۋ شاراسى قولدانىلعان كۇدىكتى جاساعان ءىس-ارەكەتىن تولىق مويىنداپ وتىر.
قازىر الاياق ايەلدىڭ ۇستىنەن قىلمىستىق كودەكستىڭ 190-بابىنىڭ 1-بولىگى بويىنشا سوتقا دەيىنگى تەرگەپ-تەكسەرۋ جۇرگىزىلۋدە.
قىزىلوردا