جاعداي جاسالسا, دارىگەر جۇمىسى جاقسارادى

جالپى, وڭىردەگى دەنساۋلىق ساقتاۋ قىزمەتىنىڭ ساپاسىن ارتىرۋ ماقساتىندا قولعا الىنعان ىسكە «جۇمىسپەن قامتۋدىڭ جول كارتاسى» باعدارلاماسى شەڭبەرىندە  3,4 ملرد تەڭگە بولىنگەن بولاتىن. بۇل قارجىعا وبلىستىڭ 10 اۋىلىندا دارىگەرلىك امبۋلاتوريا سالىنۋدا. ال شالعاي اۋىلدارداعى مەديتسينا مەكەمەلەرىنىڭ عيماراتىنا كۇردەلى جوندەۋ جاسالىپ, جاڭادان سالىنۋى باسى اۋىرىپ, بالتىرى سىزداعان جۇرتتىڭ ساپالى ەم الۋىنا سەبەپشى بولاتىنى انىق. ال اۋدان ورتالىعىنداعى اۋرۋحانالار مەن پەرزەنتحانالاردىڭ زامان تالابىنا ساي جابدىقتالىپ, قولدانىسقا بەرىلۋى تۇرعىنداردىڭ شىنايى العىسىنا لايىق ءىس بولىپ تۇر. ماسەلەن, جاقىندا جامبىل اۋدانىندا 100 ورىندىق جاڭا پەرزەنتحانا اشىلدى. عيماراتىڭ قۇرىلىسىنا بيۋدجەتتەن 4,9 ملرد تەڭگە جۇمسالعان. جالپى اۋدان ورتالىعى ۇزىناعاش اۋىلىندا جىلىنا 5 مىڭعا جۋىق نارەستە دۇنيە ەسىگىن اشادى ەكەن. بۇعان دەيىن 50 ورىندىق ەسكى عيماراتتا جۇمىس ىستەگەن دارىگەرلەر ءدان ريزا. ويتكەنى, جاڭا پەرزەنتحاندا انا مەن بالاعا قاجەتتى نارسەنىڭ ءبارى بار. ەندى بۇل نىساندا جۇكتى جəنە بوسانعان əيەلدەرگە, جاڭا تۋعان سəبيلەرگە جوعارى بىلىكتى مەديتسينالىق كومەك كورسەتىلىپ, پاتولوگيالىق جاعدايلاردى دياگنوستيكالاۋ, اكۋشەرلىك-گينەكولوگيالىق كەڭەستەر بەرۋ قىزمەتتەرى كورسەتىلەدى. عيماراتتىڭ ءىشى جۇقپالى ىندەت كەزىندە وزەكتى سانالاتىن انتيباكتەريالدى فيلترلەرمەن دە جابدىقتالعان, قاجەتتى كليماتتىق باقىلاۋ جانە جەلدەتكىش قۇرالدارعا قوسىلعان.

- بىلتىر ءبىزدىڭ اۋداندا 4600 بالا ومىرگە كەلدى. بيىل سابيلەر سانى 5 مىڭعا جەتەدى دەگەن بولجام بار. جاڭا پەرزەنتحانانىڭ اشىلۋى دارىگەرلەردىڭ جۇمىسىن جاقسارتىپ, انا مەن بالا ءومىرىنىڭ قاۋىپسىزدىگىن قامتاماسىز ەتۋگە تولىق مۇمكىندىك بەرەدى دەگەن ويدامىن. سەبەبى, قازىر پەرزەنتحانادا 12 كۋۆەز اپپاراتى, 24 فوتوتەراپيا اپپاراتى, 8 وكپەنى جاساندى جەلدەتۋ اپپاراتى بار, باسقا دا بارلىق قاجەتتى قۇرال-جابدىقتار تۇگەلدەندى.  بۇرىن مۇندا 48 قىزمەتكەر بولسا, قازىر ماماندار سانى 119 قىزمەتكەرگە جەتتى, دەيدى جامبىل اۋداندىق اۋرۋحاناسىنىڭ باس دارىگەرى دامير سۇراۋجانوۆ.

سونداي-اق, دەنساۋلىق كۇزەتىندەگى ساپالى جۇمىسقا قول جەتكىزۋ قۇرمەتىنە ەڭبەكشىقازاق اۋدانىنىڭ ەكى بىردەي اۋىلىنىڭ تۇرعىندارى دا يە بولدى. وسى اۋدانداعى كوكتوبە اۋىلى مەن قورام اۋىلىندا دارىگەرلىك امبۋلتوريا عيماراتى اشىلدى.

- كوكتوبە اۋىلدىق وكرۋگىندە ەسىگىن اشقان دارىگەرلىك امبۋلاتوريا 50 ورىنعا ارنالعان. «جۇمىسپەن قامتۋ جول كارتاسى» باعدارلاماسى شەڭبەرىندە سالىندى. ونىڭ قۇرىلىسىنا 279 ملن. تەڭگە بولىنگەن. ءبىر قاباتتى عيماراتتا قاجەتتى بولمەلەردىڭ ءبارى بار: تىركەۋ ورنى, پروتسەدۋرالىق كابينەت, ەكپە بولمەسى, دارىگەرلەردىڭ كابينەتتەرى, كلينيكالىق جانە بيوحيميالىق زەرتحانالار جانە ءتيىستى نورماعا سايكەس قاراستىرىلعان. دارىگەرلەردىڭ جۇمىس ىستەۋىنە دە, قارالۋشىلارعا دا قولايلى جاعداي جاسالعان. زاماناۋي مەديتسينالىق مەكەمە كوكتوبە اۋىلىنىڭ 5 مىڭعا جۋىق تۇرعىنىنا قىزمەت كورسەتەتىن بولادى, دەيدى ەڭبەكشىقازاق اۋدانىنىڭ اكىمى قۋانىشبەك قاشقىمباەۆ.

ايتپاقشى, 2 ملن ادامعا جۋىق تۇرعىنى بار وڭىردە العاشقى مەديتسينا كومەگىن كورسەتەتىن شاعىن ەمحانا مەن امبۋلاتوريالارعا دەگەن سۇرانىس وتە جوعارى كۇيىندە قالىپ وتىر. قازىر الماتى وبلىسىندا 235 دارىگەرلىك امبۋلاتوريا, 104 فەلدشەرلىك-اكۋشەرلىك پۋنكتى جانە 220 مەديتسينا بەكەتى بار ەكەن. ياعني, تۇرعىنداردىڭ 80 پايىزعا جۋىعى اۋىلدى مەكەندەيتىن ايماق ءۇشىن بۇل كورسەتكىش ءالى از بولىپ تۇر.