قازاقستاننىڭ ۇلتتىق وليمپيادالىق كوميتەتى اقش ەلشىلىگىمەن بىرلەسە ۇلتتىق قۇراما كوماندا مۇشەلەرىنە اعىلشىن ءتىلىن ۇيرەتۋ تۋرالى بىرەگەي باستامانى ىسكە قوستى.
ءCات سايىن قارىشتاپ دامىپ جاتقان قازىرگى زاماندا, ونىڭ ىشىندە, سپورتتا اعىلشىن ءتىلىنىڭ ورنى بولەك. اعىلشىن ءتىلى – وليمپيادالىق قوزعالىستىڭ رەسمي تىلدەرىنىڭ ءبىرى سانالادى, كوپتەگەن ەل جارىس وتكىزەر كەزدە ءتۋرنيردىڭ رەسمي ءتىلى رەتىندە اعىلشىن ءتىلىن پايدالانادى. سوندىقتان دا قازاقستان كومانداسى سپورتشىلارىنىڭ اعىلشىن ءتىلى بويىنشا بازالىق بىلىمگە يە بولعانى وتە ماڭىزدى. ويتكەنى تۋرنيرگە, تورەشىلەر القاسىنىڭ باعاسىنا پىكىر ءبىلدىرۋ ءۇشىن كەز كەلگەن ەلدە اعىلشىن تىلىندە جاۋاپ قاتۋ قاجەت. سونداي-اق سپورتتىق ورتادا ءوزارا بايلانىس ۇستاۋ ءۇشىن دە ماڭىزدى. مۇندا كوپ نارسە سپورتتىڭ تۇرىنە بايلانىستى. ءاربىر سپورت تۇرىندە وزىنە عانا ءتان جانە بەيرەسمي تەرميندەر كوپ, ولاردىڭ بارلىعىن بىردەي سوزدىكتەن تابا بەرمەيسىز. ارينە, باپكەرلىك قىزمەتتە دە ءتىلدى بىلگەننىڭ ارتىقتىعى جوق. ودان بولەك, سپورتشىنىڭ تۇلعا رەتىندە وسۋىنە اعىلشىن ءتىلىنىڭ سەپتىگى كوپ تيەدى. اعىلشىن ءتىلىن ءبىلۋ ارقىلى ءبىلىم سالاسىندا قوسىمشا مۇمكىندىكتەر پايدا بولىپ, الماسىپ وقۋ جونىندەگى حالىقارالىق باعدارلامالارعا جول اشىلادى. اعىلشىن ءتىلىن جەتىك مەڭگەرگەن اتلەتتەر سپورتتىق مانسابىن اياقتاعان سوڭ دا جەردە قالمايدى.
سپورتشىلارعا اعىلشىن ءتىلىن ارنايى شاقىرىلعان لەكتور دجەسس بيوردەن ۇيرەتەدى. بيوردەن تاجىريبەلى وقىتۋشىلاردىڭ ءبىرى, ول 15 جىلدان اسا ۋاقىتتان بەرى ستۋدەنتتەرگە كاسىبي تۇردە ءبىلىم بەرىپ كەلەدى. ودان بولەك, سپورتشىلارعا ارنايى وقۋ باعدارلاماسى قۇراستىرىلدى. باعدارلاما سپورتقا جانە سپورتتىق مادەنيەتكە باعىتتالعان. بۇل باعدارلاما بويىنشا ءبىلىم الۋ ارقىلى ءبىزدىڭ سپورتشىلار شەتەلدىك جۋرناليستەرگە سۇحبات بەرىپ, ءتىلدى قولدانۋدىڭ بازالىق قاعيدالارىن تۇسىنەدى.
ء«بىز ءۇشىن اعىلشىن ءتىلىن ۇيرەنۋگە ۇلكەن مۇمكىندىك بەرىلىپ وتىر. ۇوك بىزگە وقۋ-جاتتىعۋ جيىندارى مەن جارىستاردى عانا ۇيىمداستىرىپ قويماي, ءارى قاراي دامۋىمىزعا دا وڭ اسەر ەتىپ جاتقانى قۋانتادى. اعىلشىن ءتىلىن ۇيرەنۋدى كوپتەن بەرى ويلاپ ءجۇر ەدىم. مىنە, ەندى ءساتى ءتۇستى. ءتىل ۇيرەنۋ بىزگە قوسىمشا مۇمكىندىكتەر بەرەدى. ونىڭ ۇستىنە, ءارتۇرلى ەل سپورتشىلارىمەن شۇيىركەلەسىپ, ءوز تاجىريبەڭمەن بولىسكەن كەرەمەت دەپ ويلايمىن. اعىلشىن ءتىلىن سپورتشىلارعا ارنايى جاسالعان باعدارلاما بويىنشا وقىپ جاتقانىمىز دا ۇلكەن كومەك. توپتاعىلاردىڭ ءبارى مەن سياقتى سپورتشى بولعاندىقتان, ءبىر ءبىرىمىزدى جاقسى تۇسىنەمىز. كۋرس اياقتالعان سوڭ اعىلشىن ءتىلىن جاقسى تۇسىنەمىن دەگەن نيەتتەمىن», دەيدى بوكستان توكيو وليمپياداسى جولداماسىنىڭ يەگەرى ابىلايحان ءجۇسىپوۆ.
باعدارلاماعا 24 سپورتشى قاتىسۋدا. كۋرس قاتىسۋشىلارى قازاقستان ۇلتتىق قۇراما كوماندالارىنان كەلگەن 280 اتلەت اراسىنان تاڭداپ الىندى. سونداي-اق اعىلشىن ءتىلىن ۇيرەنۋ ءۇشىن ەلىمىزدىڭ ءبىرىنشى ءنومىرلى سپورتشىلارى مەن قازاقستان اتىن الەمدىك ارەنادا تانىتىپ جۇرگەن ۇزدىكتەر ىرىكتەلدى.