حالىقارالىق فۋتبول فەدەراتسياسىنىڭ (فيفا) رەسمي سايتىندا فۋتبولدان ۇلتتىق قۇرامالاردىڭ قاراشا ايىنا ارنالعان رەيتينگى جاريالاندى. جاڭارتىلعان رەيتينگتە قازاقستان ءۇش ساتى تومەن سىرعىپ, تاجىكستان قۇراماسىنان كەيىنگى 122-ورىنعا جايعاستى.
جالپى, وتكەن ايداعى رەيتينگپەن سالىستىرار بولساق, كوش باسىنداعى قۇرامالاردا اسا قاتتى وزگەرىس جوق. ءبىرىنشى ورىندى ادەتتەگىدەي 1780 ۇپايمەن بەلگيا قۇراماسى يەلەنىپ تۇر. 2018 جىلعى الەم چەمپيوندارى – فرانتسيا (1755) ەكىنشى, برازيليا قۇراماسى (1743) ۇزدىك ۇشتىكتى تۇيىندەدى.
قازاقستان ۇلتتىق قۇراماسى وسى ايدا ۇلتتار ليگاسىندا ەكى ماتچ وتكىزىپ, ەكەۋىندە دە جەڭىلىپ قالعان بولاتىن. العاش سىرت الاڭدا البانيادان 3:1 ەسەبىمەن جەڭىلسە, ءوز الاڭىمىزدا وتكەن ماتچتا ليتۆادان 2:1 ەسەبىمەن ۇتىلدى. ءسويتىپ ۇلتتار ليگاسىنىڭ س ديۆيزيونىندا ءتورت ۇپاي جيناپ, سوڭعى ورىندا قالىپ قويدى.
ايتا كەتەيىك, وتكەن ايداعى رەيتينگتە جەرلەستەرىمىز ءبىر ساتى تومەندەگەن بولاتىن.