وتكەن سەنبىنىڭ تاڭى قازاقستاندىق سپورت جانكۇيەرلەرى ءۇشىن قۋانىشتى جاڭالىقپەن باستالدى. كاسىپقوي بوكس شارشى الاڭىندا ونەر كورسەتىپ جۇرگەن ايگىلى وتانداسىمىز دانيار ەلەۋسىنوۆ اقش تورىندە ءوزىنىڭ كەزەكتى جەكپە-جەگىن وتكىزىپ, ەكى تۇجىرىم بويىنشا الەمنىڭ ەكس-چەمپيونى ناميبيالىق دجۋليۋس يندونگودان باسىم ءتۇستى. دانيار ازۋلى قارسىلاسىن جاي جەڭىپ قانا قويماي, ەكى راۋندتا ەكى رەت ەسەڭگىرەتىپ, تەحنيكالىق نوكاۋتپەن تىزە بۇكتىردى.
بۇل ەكى بوكسشىنىڭ جەكپە-جەگى ءاۋ باستا وسى جىلدىڭ ناۋرىز-ءساۋىر ايلارىنىڭ بىرىندە ءوتۋى ءتيىس بولعان. الايدا الەم جۇرتىنا قاۋىپ توندىرگەن كوروناۆيرۋس پاندەمياسىنىڭ سالدارىنان ايقاس بىرنەشە رەت كەيىنگە شەگەرىلە بەردى. دەسە دە ۋادە ەتسە ورىنداماي قويمايتىن پروموۋتەر ەددي حيرن دانيارعا ءبارىبىر وسى بوكس كەشىن ۇيىمداستىرىپ, جىگىتتىك سەرتىنەن اينىمادى. ال ەلەۋسىنوۆ ءوز كەزەگىندە قازاقستاندىق جانكۇيەرلەردىڭ دە, وزىنە سەنىم ارتقان پروموۋتەردىڭ دە سەنىم ۇدەسىنەن شىعا ءبىلدى.
ناميبيانىڭ ۆيندحۋك قالاسىندا دۇنيەگە كەلگەن 37 جاستاعى دجۋليۋس يندونگو كاسىپقوي بوكستا 2009 جىلدان بەرى باق سىناپ كەلەدى. ەڭ العاش جەڭىل سالماقتا ونەر كورسەتكەن ول ءىرى جەكپە-جەگىن جارتىلاي ورتا سالماقتا وتكىزدى. كاسىبي شارشى الاڭداعى 20 جەكپە-جەگىن ءوز وتانىندا وتكىزگەن ول تەك 2016 جىلدان باستاپ شەتەلدە جۇدىرىقتاسا باستادى. سول جىلى شارشى الاڭدا بىردە-ءبىر رەت جەڭىلمەگەن رەسەيلىك بوكسشى ەدۋارد ترويانوۆسكيمەن كەزدەسىپ, IBF جانە IBO تۇجىرىمدارى بويىنشا الەم چەمپيونى دەگەن اتاقتارعا قول جەتكىزدى. ءسويتىپ كاسىپقوي بوكس الەمىندە سەنساتسيا جاسادى. اراعا ءبىر جىل سالىپ يندونگو WBA بەلدىگىنىڭ يەگەرى بريتانيالىق تانىمال بوكسشى ريكي ءبيورنستى دە جەڭىپ, جارتىلاي ورتا سالماقتاعى ءۇش بىردەي بەلدىكتىڭ يەسى اتاندى. بۇل ونىڭ وتانىنان تىسقارى ەلدە وتكىزگەن نەبارى ەكىنشى جەكپە-جەگى ەدى. ەكى جىلدىڭ ىشىندە الەمنىڭ بوكس جۇلدىزىنا اينالعان ول مۇنىمەن توقتاپ قالعىسى كەلمەي, 2017 جىلدىڭ تامىز ايىندا الەمنىڭ ءابسوليۋتتى چەمپيونى اتانۋ ءۇشىن امەريكالىق ايگىلى بوكسشى تەرەنس كروۋفوردتى جەكپە-جەككە شاقىردى. وزىنە تىم سەنىمدى بولعان ناميبيالىق بوكسشى ءۇشىنشى راۋندتا كروۋفوردتىڭ سوققىسىنا تاپ بولىپ, وڭباي جەڭىلدى. وسىلايشا يندونگو ءبىر ساتتە بەلدىگىنەن دە, ابىرويىنان دا ايىرىلىپ قالدى. ال 2018 جىلدىڭ ناۋرىزىندا تاعى ءبىر امەريكالىق بوكسشى رەدجيس پروگرەيسپەن WBC بەلدىگىنە تالاسىپ, بۇل جولى دا تەحنيكالىق نوكاۋتپەن جەڭىلىپ تىندى.
جىل باسىندا دانيار ەلەۋسىنوۆ كاسىپقوي بوكستا كورگەنى مەن تۇيگەنى مول بوكسشىمەن جۇدىرىقتاسادى دەگەندى ەستىگەندە «قالاي بولار ەكەن؟» دەگەندەر از بولعان جوق. ويتكەنى وتانداسىمىزدىڭ بۇعان دەيىنگى بوكسى ءبىزدىڭ دە, جانكۇيەرلەردىڭ دە كوڭىلىنەن اسا شىعا قويعان جوق ەدى. بوكس ماماندارى دا دانيارعا مىقتىلارمەن شىعۋ ءۇشىن ءالى دە ارالىق جەكپە-جەك وتكىزۋ كەرەك دەگەن پىكىرلەرىن ايتقان بولاتىن. «اتتىڭ سىرى يەسىنە ءمالىم» دەگەندەي, دانياردىڭ ءدال قازىرگى بابى بىزگە قاراعاندا جانىندا جۇرگەن جاتتىقتىرۋشىسى ءارى اكەسى مارات ەلەۋسىنوۆكە عانا ءمالىم عوي. بالاسىن بۇل جەكپە-جەككە دايىن دەپ ەسەپتەگەن اكە بۇل كەزدەسۋدىڭ وتۋىنە قارسى بولماعان.
دانياردىڭ جەكپە-جەگىن كورگەندە ونىڭ جۇدىرىقتاسۋ مانەرى ازداپ وزگەرگەنىنە كۋا بولدىق. بۇرىنعىداي قولىن تومەن ءتۇسىرىپ ءجۇرۋ دەگەن اتىمەن جوق. ۇنەمى ەكى قولىن جوعارى كوتەرىپ, بەتىن سوققىدان قورعاپ ءجۇردى. سونداي-اق ول ادەتتە ارتقا شەگىنە ءجۇرىپ, ەكىنشى نومىرمەن جۇدىرىقتاساتىن. ال بۇل جولى تەك العا ۇمتىلىپ, رينگتىڭ قوجايىنى ەكەنىن قارسىلاسىنا ۇقتىرعانداي بولدى. ءبىرىنشى راۋندتىڭ ورتا تۇسىندا سول قولىنىڭ سوققىسىمەن قارسىلاسىن نوكداۋنعا جىبەردى. ەكىنشى راۋندتا دا ءدال وسى جاعداي قايتالاندى. ءۇش مينۋتتىڭ العاشقى ءبىر مينۋتى تۇگەسىلگەندە ەلەۋسىنوۆتىڭ سول قولىمەن جۇمساعان ەكى سوققىسى قارسىلاسىنا ءدال ءتيىپ, ناميبيالىق بوكسشى تاعى دا ەسىن جوعالتىپ الدى. تورەشى ەسەپ اشىپ, ساناعىن اياقتاعان سوڭ يندونگونىڭ السىرەگەنىن كورىپ, جەكپە-جەكتى مەرزىمىنەن بۇرىن توقتاتتى.
وسىلايشا جەرلەسىمىز كارەراسىنداعى ەڭ العاشقى ماڭىزدى كەزدەسۋىن سەنىمدى جەڭىسپەن اياقتاپ, ورتا سالماقتاعى IBF Intercontinental بەلبەۋىن بەلىنە تاقتى. سونداي-اق ول بارشا جۇرتقا رەيتينگتە جوعارى ورىندا تۇرعان كەز كەلگەن بوكسشىمەن جۇدىرىقتاسۋعا قاۋقارى بار ەكەنىن دالەلدەدى. ال دجۋليۋس يندونگو كاسىپقوي بوكستاعى ءۇشىنشى جەڭىلىسىنىڭ كەرمەك ءدامىن تاتتى.