«كاسپي» قپل-دا قالدى

«استانا» – «قايسار» – 3:1

وتكەن تۋردا كۇتپەگەن جەردە «شاح­تەر­دەن» 3:1 ەسەبىمەن جەڭىلىپ قالعان ەلور­دانىڭ «استانا» كلۋبى «كەنشى­لەرگە» كەتكەن ەسەسىن قىزىلوردانىڭ «قايسارىنان» قايتاردى. ياعني 20-تۋردا ەلىمىزدىڭ التى دۇركىن چەمپيونى ءدال سونداي ەسەپپەن بىلتىرعى قازاقستان كۋبوگىنىڭ يەگەرىن جەڭدى. الماتىداعى «جاس قىران» ستاديونىندا وتكەن ماتچتىڭ ەسەبىن 25-مينۋتتا حورۆاتيالىق لەگيونەر مارين توماسوۆ اشتى. الايدا ارادا بەس مينۋت وتكەندە قىزىلوردالىقتاردان ماكسيم فەدين ەسەپتى تەڭەستىرىپ, «استانا» فۋتبولشىلارىن ۋايىمعا سالىپ قويدى. بۇل – فەديننىڭ «قايسار» كلۋبىنداعى العاشقى گولى. ول بۇل گولىن جۋىردا عانا اۋرۋحانادان ەمدەلىپ شىققان اناسىنا ارنادى. ەستەرىڭىزدە بولسا, وسىدان ءبىر اي بۇرىن ماكسيم فەدين ۇلتتار ليگاسىنىڭ كەزەكتى تۋرى اياسىندا سىرت الاڭدا بەلارۋس قۇراماسىمەن وتەتىن ويىنعا وتباسىلىق جاعدايعا بايلانىستى قاتىسا الماي قالعان ەدى.

كەزدەسۋدىڭ ەكىنشى تايمىندا «استانا» فۋتبولشىلارى بارىن سالدى. ويتكەنى بۇل تۋردا دا ءۇش ۇپاي ولجالاي الماسا, قولدا تۇرعان قولا جۇلدەسىنەن دە ايىرىلىپ قالۋى مۇمكىن ەدى. دەگەنمەن جىل باسىندا «استانا» قۇرامىن تولىقتىرعان شابۋىلشى پيەروس سوتيريۋ 61-مينۋتتا باسپەن گول سوعىپ, كومانداسىن العا شىعارسا, 73-مينۋتتا 11 مەترلىك ايىپ دوبىن ءساتتى ورىنداپ, كومانداسىنا ماڭىزدى ۇش ۇپايىن سىيلادى. بۇل كەزدەسۋدەن كەيىن «استانا» 30 ۇپايمەن ءۇشىنشى ورىنىن ساقتاپ قالدى. ال «قايسار» 24 ۇپايمەن 6-ورىندا قالدى.

«قىزىلجار» – «ورداباسى» – 0:0

19-تۋردا سەنساتسيا جاساپ, «قاي­رات­تان» 3:2 ەسەبىمەن باسىم تۇسكەن «قى­زىل­جار» بۇل جولى «ورداباسى» كلۋبىمەن تەڭ وينادى. جالپى, ەكى كوماندا اراسىنداعى بۇل كەزدەسۋ تۋردىڭ ەمەس, جالپى ماۋسىمنىڭ ەڭ قىزىقسىز ماتچى بولدى دەسەك ارتىق ايتقاندىق ەمەس شىعار. ويتكەنى ەكى كوماندا دا ءبىر-ءبىرىنىڭ قاقپاسىنا مۇلدە ءدال سوققى جاساماعان. ەكى ماتچتا ءبىر ۇپايعا يە بولعان شىمكەنتتىك كلۋب تۋرنير كەستەسىندە «استانادان» ەكى ۇپايعا ارتتا قالىپ كەلەدى. چەم­پيوناتتا «ورداباسىنىڭ» ءبىر ويىنى, ەلوردالىقتاردىڭ ەكى كەزدەسۋى قالعا­نىن ەسكەرسەك, «ورداباسى» قولا جۇلدە­دەن ءۇمىتتى ءۇزدى دەي بەرۋگە بولادى. ال پەتروپاۆلدىق كوماندا 20 ۇپايمەن 9-ورىنعا تۇراقتادى.

«تاراز» – «كاسپي» – 0:1

قاتارىنان ەكى تۋردا جەڭىسكە جەتكەن اقتاۋلىقتار كەلەسى جىلى دا ەل چەمپيوناتىنا قاتىسۋعا مۇمكىندىك الدى. بيىل عانا جوعارى ليگاعا شىققان «كاسپي» ءۇشىن بۇل تاماشا جەتىستىك. الماتىداعى تيمۋر سەگىزباەۆ اتىنداعى ستاديوندا وتكەن ويىننىڭ جالعىز ءارى جەڭىس گولىن  45-مينۋتتا ار­مان ءنۇسىپ سوقتى. تۋرنير كەستە­سىندە سوڭ­عى ورىندا تۇر­عان «وقجەت­پەس­تەن» التى ۇپايعا وزىپ, 10-ورىن­عا تابان تىرەدى. ال «تاراز» 20 ۇپاي­مەن 8-ورىندا قالا بەردى.

«وقجەتپەس» – «توبىل» – 0:2

كوكشەتاۋدىڭ «وقجەتپەس» كلۋبىن ەش قيىندىقسىز جەڭگەن «تو­بىل» كۇمىس جۇلدەگە ءبىر تابان جا­قىن­داي ءتۇستى. ەگەر قوستاناي­لىق­تار كەلەسى تۋردا «تاراز» كلۋبى­نان باسىم تۇسەتىن بولسا, مەرزى­مى­نەن بۇرىن ەل چەمپيونا­تى­نىڭ كۇمىس جۇلدەگەرى اتانادى. «وق­جەت­پەسپەن» وتكەن كەزدەسۋدىڭ ەسەبىن 38-مينۋتتا جەرەمي مانزوررو اشتى. ال ەكىنشى تايمنىڭ 60-مي­نۋ­­­تىندا كوكشەتاۋ فۋتبول مەكتە­بى­­­نىڭ تۇلەگى سۇلتان ابىلعازى «تو­­­­بىل­دىڭ» ەكىنشى گولىن سوعىپ, ماتچ­­­تىڭ نۇكتەسىن قويدى. قازاق­ستان جاستار قۇراماسىنىڭ ويىن­شى­­­­سى وسىمەن ەكىنشى ماتچ قاتارى­نان مەر­گەندىگىمەن كوزگە ءتۇسىپ وتىر.

قاتارىنان ءتورتىنشى ويىندا جەڭىل­گەن كوكشەتاۋلىقتار قاجەتتى ۇپاي­ىن جيناي الماعاندىقتان كەلەسى جى­لى ءبىرىنشى ليگادا ونەر كور­سەتەتىن بول­دى. 19 ويىندا 11 ۇپاي جيناعان «وق­جەت­پەسى» كەستەنىڭ 11-ورىنىندا تۇر.

«شاحتەر» – «جەتىسۋ» – 1:2

19-تۋردا «استانا» كومانداسىنان ءۇش ۇپاي تارتىپ العان سوڭ «كەنشىلەر» كومانداسى قولا جۇلدە ءۇشىن وتەتىن بايگەگە قوسىلعان-دى. الايدا «شاح­تەر»  وتكەن تۋر­دا «جەتىسۋدان» جەڭىلىپ, چەم­­پيوناتتى ءۇشىنشى ورىنمەن اياق­تايتىن تاماشا مۇمكىندىگىنەن ايىرىلىپ قالدى. كەزدەسۋدىڭ ەسەبىن 23-مينۋتتا «جەتىسۋ» شابۋىلشىسى مارتين توشەۆ اشسا, ەكىنشى تايمنىڭ 74-مينۋتىندا پەدرو ەۋجەنيو ەسەپتى ەسەلەدى. بىراق اراعا ءتورت مينۋت سالىپ ايدوس تاتتىباەۆ ەسەپ ايىرماسىن قىس­قارت­­قانىمەن, كومانداسىن جەڭىلىس­تەن قۇت­قارىپ قالا المادى. «جەتى­سۋ» وسى جە­ڭىسىنىڭ ارقاسىندا 25 ۇپاي­مەن 6-ورىنعا كوتەرىلدى. ال گورو­ۆەنكو شاكىرتتەرى 26 ۇپايمەن 5-ورىندا قالا بەرمەك.

20-تۋردان كەيىن كوكشەتاۋدىڭ «وق­جەتپەسى» ءبىرىن­شى ليگادا ونەر كور­سەتەتىنى بەل­گىلى بولسا, بيىلعى ءبىرىنشى لي­­گادا توپ جارعان «اقتوبە» مەن «اتى­راۋ» كوماندالارى كە­لەسى جى­لى جوعارى ليگادا وي­ناۋعا مۇمكىندىك الدى. ەل چەم­پيو­نا­تى­نىڭ كەلەسى تۋر ويىندارى 27 قاراشادا وتەدى.