ورتا سالماقتاعى IBF جانە IBO تۇجىرىمى بويىنشا الەم چەمپيونى قازاقستاندىق گەننادي گولوۆكين (40-1-1, 35 كو) كەلەسى جەكپە-جەگىن 18 جەلتوقساندا پولشالىق كاميل شەرەمەتامەن (21-0, 5 كو) وتكىزەتىنى بەلگىلى بولدى.
بۇل تۋرالى وتانداسىمىزدىڭ جەكپە-جەگىن تىكەلەي ەفيردە ۇسىناتىن DAZN ستريمينگتىك ارناسى رەسمي تۇردە حابارلادى. پاندەمياعا بايلانىستى جانە ءتۇرلى سەبەپتەرمەن بىرنەشە رەت كەيىنگە شەگەرىلگەن جەكپە-جەك اقش-تىڭ فلوريدا شتاتىندا ورنالاسقان Hard Rock Holly كازينو-قوناقۇيىندە وتەدى. بۇل ايقاستا گولوۆكين ءوزىنىڭ IBF بەلبەۋىن قورعاپ قالۋعا تىرىسادى.
ايتا كەتەيىك, گولوۆكين كاسىپقوي شارشى الاڭداعى سوڭعى جەكپە-جەگىن 2019 جىلدىڭ قازانىندا ۋكراينالىق سەرگەي دەرەۆيانچەنكومەن وتكىزىپ, ۇپاي سانىمەن باسىم تۇسكەن بولاتىن. ءدال وسى بوكس كەشىندە ونەر كورسەتكەن شەرەمەتا مەكسيكالىق وسكار كورتەستى نوكاۋتپەن جەڭگەن ەدى.