ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ۇكىمەت وتىرىسىندا وتاندىق ەكوبەلسەندىلەرىمەن بىرلەسىپ, وڭىرلەردەگى ەكولوگيالىق احۋالدى جاقسارتۋعا بايلانىستى جول كارتالارىن تانىستىردى.
ۆەدومستۆو باسشىسى قورشاعان ورتانى جاقسارتۋعا باعىتتالعان ەكولوگيالىق كودەكستىڭ جوباسى ماجىلىستە ماقۇلدانىپ, سەناتتىڭ قاراۋىنا جىبەرىلگەنىن ايتتى.
«جاڭا ەكولوگيالىق كودەكستىڭ قابىلدانۋىن كۇتپەي «حالىق ۇنىنە قۇلاق اساتىن مەملەكەت» تۇجىرىمداماسىنا سايكەس, ەكولوگيالىق پروبلەمالار مەن ولاردى حالىقپەن, اسىرەسە بارلىق وڭىرلەردەگى ەكوبەلسەندىلەرمەن شەشۋ جولدارى قاراستىرىلدى. بارلىعى ون جەتى ونلاين كەزدەسۋ وتكىزىلدى. ولارعا جيىرما بەس مىڭعا جۋىق ادام قاتىستى», دەدى مينيستر.
وڭىرلەردەگى ەكولوگيالىق احۋالدى جاقسارتۋدى كوزدەيتىن ون جەتى جول كارتاسى ازىرلەندى. ايتالىق, قاراعاندى وبلىسىنىڭ ەكولوگيالىق جاعدايىن جاقسارتۋ ءۇشىن دايىندالعان جول كارتاسىندا ەلۋ جەتى ءىس-شارا قاراستىرىلعان. ولاردىڭ اراسىندا «ارسەلورميتتال تەمىرتاۋ» كاسىپورنىندا قازاندىق جانە گاز تازالاۋ جابدىعىن قايتا جاڭارتۋ, اك كۇيدىرۋ تسەحىن تەمىرتاۋ قالاسىنان تىس شىعارۋ جانە جەزقازعان قالاسىندا «قازاقمىس» كاسىپورنىنىڭ جاڭا كۇكىرت قىشقىلى تسەحىن سالۋدى ايتۋعا بولادى.
بۇل شارالار قورشاعان ورتاعا تەرىس اسەردى تومەندەتۋگە مۇمكىندىك بەرەدى. سونىمەن قوسا تەمىرتاۋ قالاسىندا وندىرىستىك اعىندى سۋلاردى تازارتۋ تورابىن جانە بالقاش پەن جەزقازعاندا جاڭا كارىزدىك تازارتۋ كەشەندەرىن سالۋ, «ارسەلورميتتال تەمىرتاۋ» قالدىقتارىن كادەگە جاراتۋ, جەزقازعاندا بيوەلەكتروستانساسىن سالۋ جانە «داريال-ۋ» جەرلەرىن قالپىنا كەلتىرۋ جوسپارلانعان.
الماتى بويىنشا جول كارتاسىندا جيىرما ءىس-شارا قاراستىرىلعان. ولاردىڭ ىشىندە: جەو-2 جانە جەو-3 گازعا اۋىستىرۋ, قالاعا ىرگەلەس جاتقان جەكە سەكتور اۋداندارىن گازداندىرۋ, كوممۋنالدىق قىزمەتتەر مەن قوعامدىق كولىك قىزمەتىندەگى اۆتوكولىكتەردى سىعىلعان تابيعي گازعا اۋىستىرۋ, ديزەلدى وتىنمەن جۇرەتىن قوعامدىق كولىكتەرگە كەزەڭ-كەزەڭىمەن تىيىم سالۋ, سول سەكىلدى كوگالداندىرۋ باعىتىنداعى جۇمىستار قاراستىرىلعان.